Jeremia 21
21
Schlemme Norecht fa däm Kjennich
1Dit es de Norecht, dee Jeremia von däm Harn kjrieech, aus emol Paschhur, Malkija sien Sän, un de Priesta Zefanja, Maaseja sien Sän, von dän Kjennich Zedekia no Jeremia jeschekjt worden. De Kjennich wull haben, #Jer 39,1-10; 29,25-26; 37,3; 52,24 2daut Jeremia fa an sull däm Harn no Rot froagen, wiels de babelonischa Kjennich, Nebukadnezar, met siene Armee jäajen an kjeem. Hee wull weeten, auf de Har veleicht doch wada, soo aus aul mea mol, däm Fient derch een Wunda wudd toom trigj trakjen brinjen.
3Un Jeremia säd an, daut see sullen Zedekia sajen: 4Dit es waut de Har, dee Israel äa Gott es, sajcht: Horch emol, ekj woa daut Jewäa toom omwenjen brinjen, daut jie en june Macht haben, un waut jie jäajen dän babelonischen Kjennich un de Chaldäa brucken, dee june Staut omrinjt haben. Un ekj woa junt medden en dise Staut toopsaumlen. 5Ekj selfst woa jäajen junt kjamfen, met eene stoakje Haunt un een Oarm, dee nich meed woat. Ekj woa met Oaja un Wutt un onen Metleet opp junt komen. 6Un ekj woa dee, dee en dise Staut sent, beides Menschen un Tieren, derch eene schlemme Krankheit ombrinjen. 7Un wan ekj daut ieescht jedonen hab, soo sajcht de Har, dan woa ekj Zedekia, dän Kjennich von Juda un siene aunjestalde un de Menschen en dise Staut, waut de Krankheit, daut Schwieet un de Hungaschnoot äwastonen, enne Henj von däm Kjennich Nebukadnezar jäwen. Ekj woa junt enne Macht von june Fiend, un von dee, dee junt no daut Läwen stonen, äwajäwen. Dee woaren kjeenem veschoonen, un junt onen Jnod ooda Metleet met daut Schwieet aufschaufen.
8Un to daut Volkj saust du sajen: Dit es waut de Har sajcht: Horcht emol, ekj woa junt sajen, woonen Wajch jie läwen woaren, un opp woonen Wajch jie stoawen woaren. #5Mo 30,15 9Dee waut en dise Staut bliewen, woaren vom Schwieet un von Hungaschnoot un von Krankheiten stoawen; oba wäa ut dise Staut rut jeit un sikj de Chaldäa, dee runtom june Staut sent, äwajeft, dee woat met sien Läwen doavon komen aus een Schauz, dee em Kjrich veschoont blift. #Jer 38,2 10Ekj sie mie eenich, schlajchtet jäajen dise Staut to brinjen, un nich goodet, sajcht de Har. Ekj woa däm babelonischen Kjennich loten dise Staut ennämen un dee dolbrennen. #Jer 34,2
11Un to de Famielje von däm Kjennich von Juda saj: Horcht waut de Har to sajen haft: 12Jie, dee jie vom Kjennich David aufstaumen, dit es waut de Har to junt sajcht:
Stalt aule Dach june Sachen trajcht;
un halpt dee, dee beschummelt woaren,
von dee, dee an bestälen;
sest woat mien Oaja junt brennen,
aus een Fia, woont kjeena utmoaken kaun,
wäajen daut beese, waut jie jedonen haben. #Jer 22,3; 7,20
13Horch emol, Jerusalem,
dee du huach äwa daut Tol
en de vesechade Staut wonst,
ekj sie jäajen die;
du sajchst: Wäa kaun ons waut aundoonen,
un wäa woat derch onsen Schutz derchbräakjen.
14Ekj woa junt bestrofen, sajcht de Har,
doano aus jie daut vedeent haben;
ekj woa een Fia en junen Woolt aunstekjen,
daut aules runtom vebrennen woat. #Hes 21,3; Gal 6,7
Currently Selected:
Jeremia 21: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
