Jeremia 19
19
Een Leemtopp woat tweijebroaken
1Dit es waut de Har säd: Go un kjeep die eenen Leemtopp biem Toppstrikja, un nemm eenje von de Leidasch vom Volkj un väaschte von de Priesta, 2un got rut no daut Ben Hinnom Tol, jrod buta daut Schoawel Puat. Doa saj an waut ekj die saj. #Jer 7,31 3Saj to an: Horcht no waut de Har sajcht, jie Kjennichs en Juda un Lied von Jerusalem. Dit es waut de Har, dee aules rejieet, un Israel äa Gott es, sajcht: Horcht emol, ekj woa soon Schoden äwa dise Staut brinjen, daut dee, dee daut hieren, daut enne Uaren zinjren woat. #2Kjen 21,12 4Ekj woa dit doonen, wiels see mie veloten haben, un haben dise Städ wadalich jemoakt, doaderch daut see hia Opfa jemoakt haben fa aundre Jetta, soone aus see un äare Elren, un de Kjennichs von Juda nich kjanden, un wiels see opp disen Plauz väl mol oschuldje äa Bloot vegoten haben. 5See haben de huage Opfastäden fa Baal oppjebut un doa äare Kjinja vebrent en Brauntopfa fa Baal, un soont hab ekj nich velangt ooda jesajcht, un soont es mie nich emol biejefollen. #(5-7) Jer 7,31-33; 3Mo 18,21
6Un doawäajen woat daut soo romkomen, daut see dit Tol nich mea daut “Ben Hinnom Tol”, ooda daut “Tofet Tol” nanen woaren, oba daut “Schlacht Tol”. 7Un ekj woa daut vedoawen, waut Juda un Jerusalem opp disen Plauz väahaben, un ekj woa an loten unja daut Schwieet von äare Fiend, dee waut an nom Läwen stonen, omkomen. Un ekj woa äare Doodes loten von de Väajel enne Loft, un von de wille Tieren oppe Stap vefräten. 8De Schoden, dee äwa dise Staut komen woat, woat soo groff sennen, daut dee waut doa vebie komen, daut schudren woat, un dee woaren sikj tieren, äwa waut doa aules jeworden es. 9Un ekj woa daut soo wiet brinjen, daut see daut Fleesch von äare ieejne Kjinja äten woaren. Menschen woaren daut Fleesch von aundre Menschen äten, wiels de Noot soo groff sennen woat. Soo woat daut sennen wan de Fient, dee an nom Läwen steit, an beloagren un toosaten woat. #3Mo 26,29; 5Mo 28,53
10Un du saust dän Leemtopp ver de Mana, dee met die jegonen sent, tweibräakjen 11un to an sajen: Dit es waut de Har, dee aules rejieet, sajcht: Soo aus eena, eenen Toppstrikja sienen Leemtopp tweibrakjt, soo daut dee nich wada foadich jemoakt kaun woaren, soo woa ekj dit Volkj un dise Staut tweibräakjen. Un see woaren en Tofet begrowen, wiels sest kjeen Plauz mea es. #Jes 30,12-14; Jer 7,32 12Daut es waut ekj met dise Städ, un de Lied von hia doona woa, sajcht de Har, bat dise Staut no Tofet lat. 13Un de Jebieda en Jerusalem, un däm Kjennich von Juda siene Jebieda, un aule Hiesa wua oppem Dak Weiruak jebrent woat fa de Stierns, un wua Wien jeopfat woat to framde Jetta, dee woaren krakjt soo orrein sennen aus Tofet. #2Kjen 23,12; Jer 32,29; Zef 1,5
14Un aus Jeremia trigj kjeem von Tofet, daut es je wua de Har am hanschekjt, daut hee doa profezeien sull, don jinkj hee em Väahoff vom Harn sien Hus, un säd doa to daut gaunze Volkj: 15Dit es waut de Har, dee aules rejieet, un Israel äa Gott es, sajcht: Ekj woa nu aul dän Schoden opp dise Staut brinjen un opp aul de Städa hia, woonen ekj wäajen an jerät hab, wiels see soo ieejenkoppich sent, un nich no miene Wieed horchen wellen.
Currently Selected:
Jeremia 19: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
