Jesaja 9
9
Een Licht kjemt
1Daut Volkj, daut em diestren romjinkj,
haft een grootet Licht jeseenen;
opp dee, waut en daut doljeschloagne Launt wonden,
schient daut nu dach. #Luk 1,79
2Du hast daut to een wunda scheenet Launt jemoakt;
du latst an daut sea scheen gonen.
See freien sikj, aus wan
see eene groote Arnt jekjräajen haben,
soo aus Mana, dee doa schrieen,
wan enjedeelt woat,
waut see em Kjrich jenomen haben.
3Du hast daut Joch, waut an doldrekjt,
dän Stock met dän see äware Schulren kjrieejen,
un de Wipp met dee see jejoacht worden,
aula tweijebroaken,
soo aus du emol de Midianita dolschluachst. #Rech 7,14-15.22; Psa 81,7
4Jieda Steewel von de Soldoten,
dee em Kjrich marschieeden,
un jieda Mauntel, waut bloodrich wia,
woat soo aus Brenholt vebrent woaren.
5Wiels ons es een Kjint jebuaren,
wie haben eenen Sän jekjräajen,
un hee haft daut Rajcht to rejieren.
Hee woat de wundaboara Rotjäwa,
de majchtja Gott, de eewja Voda,
un de Frädensprins jenant woaren. #Jes 22,22; Micha 5,1; 4,3
6Sien Machtrajcht un de Fräd unja am
woat onen Enj toonämen;
hee woat opp David sien Troon setten
un sien Rikj opprechtich
un no daut waut rajcht es
von nu aun un opp emma rejieren.
De Har, dee aules rejieet,
woat dit en sienen Iewa doonen. #2Sam 7,12-13; Psa 72,3-4; Jes 11,1-5; Luk 1,32
Daut Jerecht äwa Israel
7De Har haft sien Wuat äwa Jakob jejäft,
un daut es opp Israel raufjekomen;
8de Lied wisten aula doavon,
en Efraim un en Samaria,
oba see säden huachnäsich:
9Onse Tieejlen sent jefollen,
oba wie woaren met jesoagde Steena fresch buen.
Onse Mulbäabeem sent aufjehakt,
oba wie woaren Zeeda en dee äare Städ saten.
10Un nu lat de Har Rezin stoakj woaren,
daut hee jäajen an komen woat;
de Har moakt de Fiend reed.
11Hee lat de Aramäa vom Oosten
un de Filista vom Wasten
sikj aun Israel voll fräten.
Un äwa aul dit lat hee nich no met sien Oaja;
hee helt siene Haunt noch emma huach.
12Un doch kjieet daut Volkj sikj nich trigj
no däm, dee an schleit;
see velangen nich
däm Harn, dee aules rejieet.
13Dan schneet de Har an en eenen Dach
dän Kopp un dän Zoagel auf,
beides de huage Asta un daut läaje Loof. #Jes 10,33
14De Leidasch un de huach Aunjeseene sent de Kopp,
un de Profeeten, dee junt väalieejen, sent de Zoagel.
15De Leidasch en dit Volkj haben de Lied veleit,
un dee, waut sikj leiden leeten, sent veloaren.
16Un doawäajen woat mien Har
de junge Mana nich veschoonen,
un hee woat kjeen Metlieden haben
met de Weisen un de Wätfrues.
Dee haben sikj aula vesindicht,
un doonen waut orrajcht es;
aul äa räden es frajch.
Un äwa aul dit lat hee nich no met sien Oaja;
hee helt siene Haunt noch emma huach.
17Daut beese flaumt aus een Fia
daut en Distlen un Dornen brent,
un dän dichten Woolt aunstekjt
un huagen Ruak jeft.
18Daut Launt vebrent, un de Menschen
sent aus Brenholt em Fia, ver däm Oaja
von däm Harn, dee aules rejieet.
Kjeena kjemt fa sienen näakjsten opp.
19See rieten sikj waut aun de rajchte Sied aun,
oba wellen bloos mea;
see nämen waut aun de linkje Sied,
un sent doch noch nich tofräd.
See nämen soogoa von äa ieejnet Frintschoft.
20De Lied von Manasse nämen von Efraim,
un de Lied von Efraim nämen von Manasse,
un aulebeid nämen see von Juda.
Un äwa aul dit lat hee nich no met sien Oaja;
hee helt siene Haunt noch emma huach.
Currently Selected:
Jesaja 9: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
