Jesaja 8

Juda un Aram woaren tofaul komen

1Eemol säd de Har to mie, ekj sull opp eene groote Tofel un soo daut aulemaun daut läsen kunn, de Wieed nopp schriewen: Maher Schalal Hasch Bas. #8,1 Dee Nomen bediet Haustich bestälen, schwind waut nämen. 2Un de Har säd hee wull twee aunjeseene Mana haben, däm Priesta Uria, un Secharja, Jeberechja sien Sän, daut dee zeijen kunnen, daut ekj daut oppjeschräwen haud. 3Eene jewesse Tiet lota hauden miene Fru un ekj eenen Sän, un de Har säd ekj sull am dän Nomen, Maher Schalal Hasch Bas, jäwen, 4wiels ea daut Junkje wudd kjennen Voda ooda Mutta roopen, wudd de assierischa Kjennich daut waut en Damaskus soon grooten Wieet haft, un daut, waut en Samaria wieet es wajchtodroagen, veschlapt haben. #2Kjen 16,9; Jes 7,16

5Een aundret mol säd de Har to mie:

6Daut Volkj haft daut Wota von Siloah,

daut soo ruich velenjd rant, veacht,

un sent nu met Forcht benomen

von Rezin un Remalja sienen Sän.

7Nu kjennen see sikj doaropp veloten,

daut de Har daut groote un stoakje

Wota vom Eufrat brinjen woat,

un met dit meen ekj dän assierischen Kjennich

un siene gaunze Armee.

Dee woaren äwa aule Wotaleidinjen

un aule Riefasch äwaschwamen,

8un dee woaren äwa Juda komen

aus eene Äwaschwamunk bat aun dien Jenekj.

Dee woat siene Flichten äwa die spreeden

un dien gaunzet Launt bedakjen, Oo Immanuel. #Jes 7,14

9Reffelt junt, jie Velkja,

oba daut woat nich toorieekjen;

lot aule Velkja bat wiet auf hieren,

doot waut jie kjennen,

oba daut woat nich toorieekjen;

doot waut jie kjennen,

oba daut woat nich toorieekjen.

10Moakt eenen weisen Plon,

oba dee woat nich utkomen;

sajcht waut jie doonen kjennen,

oba daut woat nich utkomen,

wiels Gott es met ons, Immanuel!

Daut Wuat saul bestonen

11De Har läd siene Haunt opp mie un sad mie trajcht. Hee säd ekj sull nich soo doonen aus daut Volkj deed. 12Jleew nich daut daut, waut dit Volkj jleewd, jäajen daut Launt es, werkjlich jäajen daut Launt es; enjst die nich fa daut, fa waut see sikj enjsten; lot die nich veschrakjen. 13Hool däm Harn, dee aules rejieet, heilich; hab Forcht fa am un lot die von am schrakjen. #Mat 10,28 14Hee woat eene heilje Städ sennen; hee woat de Lied en beides Israel un Juda em Stich sennen un see woaren wäajen am hanfaulen; hee woat eene Faul un eene Schlenj fa de Lied en Jerusalem sennen. #Reema 9,33 15Väle woaren wäajen am stolpren un faulen un sikj enne Grunt brinjen; see woaren enne Schlenj komen un faustjenomen woaren.

16Moakt secha, daut miene Jinja de Lia soo biebehoolen, aus dee no mie jekomen es, un daut see daut Wuat nich velieren. #Dan 12,4 17Ekj woa daut aufluaren, waut de Har doonen woat, un oppaussen, waut hee deit, wan hee uk siene Gonst von Jakob siene Nokomen wajchjenomen haft. 18Ekj un miene Kjinja, dee de Har mie jejäft haft, sent de Tieekjens, dee de Israeliten woarnen, wäajen waut de Har, dee aules rejieet, un dee opp däm Zion Boajch wont, met de Israeliten deit. #Jes 8,3; 7,3; Heb 2,13

19Wan de Lied junt sajen: Jie motten de Jeista von de Vestorwne un dee waut besondre Ensecht en Sachen haben, froagen, dee waut brumlen un fuschlen un sajen: Sull een Volkj nich äare Jetta froagen? Sullen see nich de Doodje no Rot froagen fa dee waut läwen? #2Kjen 1,3 20Oba ekj saj junt: Recht junt nom Wuat un de Lia; wäa daut nich deit, woat kjeen Morjenroot seenen.

21Dee woaren sea jeschloagen un hungrich em Launt romgonen; un wan see vom Hunga lieden, dan woaren see met äaren Kjennich un äaren Gott veläajen woaren un enne Hecht kjikjen un am veachten. 22Wan see rauf no de Ieed kjikjen, woat aules diesta un schlemm loten; see woaren von Angst benomen woaren, un em diestren vejoacht woaren. 23Oba fa dee, dee en Seelenangst wieren, woat daut nich dunkel bliewen. To eene Tiet muak hee de Jäajenden von Sebulon un Naftali veacht, oba daut woat soo romkomen daut dee gaunze Jäajent vom Wajch aum Mäa bat aun de aundre Sied vom Jordan, wua de aundre Velkja wonen, woat harlich jemoakt woaren. #2Kjen 15,29; Psa 107,10-14; Mat 4,12-16

Currently Selected:

Jesaja 8: PB

Highlight

Compare

Copy