Jesaja 10
10
Äwa dee waut Menschen utnutzen
1Woo saul daut bloos met dee,
waut een Schriewen oppstalen,
soo aus sikj daut nich jehieet,
un dee, dee de Lied utnutzen,
met daut waut see velangen; #(1-4) Jes 5,8-23
2dee waut daut Jesaz vedreien,
daut Lied nich daut äaje kjrieen,
dee, dee de oame en mien Volkj
nich äa rajcht jäwen,
daut see de Wätfrues bestälen
un de Weisenkjinja utnutzen.
3Waut woa jie aun dän Dach doonen,
wan de Strof un daut Onheil von wiet auf kjemt?
Wäa woat junt dan halpen,
ooda wua woa jie jun Scheens loten,
4daut jie nich toopbräakjen aus Jefangne,
ooda hanfaulen mank dee waut doljeschloagen woaren?
Un äwa aul dit lat hee nich no met sien Oaja;
hee helt siene Haunt noch emma huach.
Daut Jerecht äwa Assur
5Woo woat daut noch emol met Assur gonen,
dee mien Reemen en mien Oaja
un de Stock en miene Haunt wia,
aus ekj miene Wutt uteewd. #Jes 10,15
6Ekj schekjt an jäajen een Volkj,
daut mienen Oaja reizt,
doaderch daut see mie nich jehorchten;
see sullen daut beplindren un bestälen
un an vetraumplen aus Blott oppe Gaussen.
7Oba see dochten sikj daut aundasch
un neemen sikj schlajchtet väa;
see wullen Velkja utroden,
un nich bloos een poa.
8See säden sikj:
Onse Kommandaunten sent Kjennichs.
9Sent mie Kalne un Karkemisch
un Hamat un Arpad nich aula äwareen?
Un uk Samaria un Damaskus?
10Ekj hab met miene Macht kunt Velkja
dolschlonen, dee väl Jetta hauden;
mea un schmokre Jetta
aus Samaria un Jerusalem haben. #(10 un 11) 2Kjen 18,33-35
11Un sull ekj met Jerusalem un äare Jetta
nich krakjt soo doonen
aus met Samaria un äare Jetta?
12Wan de Har ieescht foadich es met siene Oabeit opp däm Zions Boajch un en Jerusalem, woat hee dän assierischen Kjennich doafäa bestrofen, daut hee sikj soo väl meend, un daut hee soo onveschämt prauzich wia. #Jes 37,36 13Hee jleewd sikj:
“Met miene ieejne Macht hab ekj daut jedonen,
soo kluak un fäich sie ekj;
ekj hab de Jrensen tweschen Velkja velascht
un hab mie jenomen, waut wieetvoll wia,
un däm vestat, dee jemietlich saut.
14Miene Haunt haft daut Nast jefungen,
wua de Velkja äa Jelt hauden;
soo aus eena Eia toopsaumelt, dee vestreit sent,
hab ekj de Lenda toopjeropt;
kjeene Flicht rieed sikj,
kjeen Schnowel piepst.”
15Sull eene Akjs mea von sikj selfst denkjen,
aus von däm, dee dee enne Haunt haft?
Ooda jleeft eene Soag sikj selfst wichtja
aus däm, wäa dee trakjt?
Daut sull jrod, daut de Stock däm opphoof,
wäa dän Stock opphäft;
ooda daut de Kjneppel däm enne Haunt nemt,
dee nich von Holt jemoakt es. #Jes 10,5
16Doawäajen woat de Aulmajchtja,
de Har, dee aules rejieet,
de jestukte Assiera nu veschmachten loten,
un daut, waut an soo groosoatich muak,
woat met een Fia vebrennen.
17Dee, wäa daut Licht fa Israel es,
woat een Fia sennen,
un äa Heilja woat eene Flaum sennen;
un hee woat äa Onkrut un Distlen
en eenen Dach dolbrennen. #5Mo 4,24
18Un äa schmocket Akalaunt un Jäajenden met Woolt,
woaren gaunz vedorwen woaren,
soo aus wan wäa von eene schlemme Krankheit vemuckat.
19De Beem, waut en dän Woolt äwabliewen,
woaren soo weinich sennen, daut een Kjint dee talen kaun.
Dee waut äwabliewen
20Wan dee Tiet kjemt,
woaren dee, dee von Israel äwajebläwen sent,
un dee, dee daut derchjemoakt haben von Juda,
sikj nich mea opp däm veloten, dee an schleit,
oba see woaren een vollet vetruen opp däm Harn haben,
dee wäa en Israel heilich es. #(20 un 21) Jes 6,13; 7,3
21Mau weinich von Jakob siene Nokomen woaren äwabliewen,
un dee woaren trigj no Gott komen, dee Macht haft.
22Un wan jie Israeliten
sullen soo väl sennen aus doa Saunt aum Mäa es,
woaren doa doch mau weinich äwabliewen un trigjkomen.
Daut Wuat es nu jejäft worden,
un de Strof un daut vedoawen, daut jie vedeent haben,
kjemt aus eene groote Äwaschwamunk. #Reema 9,27
23Wiels Gott de Har, dee aules rejieet,
woat daut gaunze Launt vedoawen,
soo aus hee beschloten haft. #Jes 28,22
24Nu sajcht Gott de Har, dee aules rejieet: Mien Volkj, dee jie en Zion wonen, habt nich Angst fa de Assiera. Dee woaren junt met een Stock schlonen, un äaren Kjneppel äwa junt hoolen, soo aus junt daut emol en Ägipten jinkj. 25Oba sea boolt woat mien Oaja sikj utjespält haben, un miene Wutt woat opp äa vedoawen jerecht sennen. 26De Har, dee aules rejieet, woat siene Wipp opp an brucken, soo aus hee bie däm Oreb Boajch deed, aus hee de Midianita dolschluach, un hee woat dän Stock soo brucken aus hee emol äwa de Ägipta deed, bie daut Mäa. #2Mo 14,26-27; Rech 7,25; Psa 83,10 27Un wan dee Tiet kjemt, woat de Laust, waut du oppe Schulren drajchst, von die jenomen woaren, un daut Joch von opp dien Jenekj woat tweijebroaken woaren.
28Nu komen see no Aja, nu derch Migron,
un en Michmas spikjren see äare Sachen opp;
29nu gonen see derch de Boaj delenjd dän schmaulen Stich,
un bliewen en Geba to Nacht.
Rama flautat,
un Gibea, Saul siene Staut, es oppe Flucht.
30Daut scheene Galim gaulemt;
de Lied en Lajescha lajen sikj läach;
Anatot weet sikj nich Rot. #1Sam 25,44
31Von Madmena ranen de Mana,
von Gebim flichten see fuat.
32Noch vondoag sat sikj de Armee en Nob
un scheddat de Fust jäajen dän scheenen Zions Boajch,
jäajen dän Boajch, wua Jerusalem steit. #1Sam 21,2
33Oba paust opp,
de Aulmajchtja, de Har, dee aules rejieet,
woat de Asta met Wucht aufhaken;
hee woat dee, dee steil stonen, dolschlonen,
un dee, dee groot sent, toschaund moaken.
34Daut Iesa woat dän dichten Woolt dolhacken,
un de groosoatja Libanon woat nich stonen bliewen.
Currently Selected:
Jesaja 10: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
