Jesaja 60
60
Däm Harn siene Help kjemt
1De Har sajcht: Jerusalem, sto opp,
un lot dien Jesecht fa Freid strolen!
Een Licht es fa die oppjedacht,
un daut es äwa die oppjekomen,
woo harlich de Har es.
2Paus goot opp. Daut diestre woat de Ieed bedakjen,
daut de Velkja nich weeten, aun waut see sent.
Oba mien Licht woat äwa die strolen,
un daut woat aun die to seenen sennen,
woo harlich de Har es.
3De Velkja woaren no dien Licht komen,
un Kjennichs woat daut oppfaulen,
woo dach du strolst. #Jes 2,2-3; Opb 21,24
4Kjikj emol opp un rom die.
Aule vesaumlen sikj un komen hia toop;
diene Säns woaren von wiet auf komen
un diene Dajchta woaren em Oarm häajedroacht woaren. #Jes 49,18.22; 66,12
5Dan woascht du romkjikjen un dien Jesecht woat strolen;
dien Hoat woat butzen un du woascht die sea freien.
Dan woaren wieetvolle Sachen no die,
von äwarem Mäa jebrocht woaren,
un waut de Velkja soo groosoatich muak,
woat die tookomen.
6Doa woaren väl Kameelen en dien Launt sennen,
un junge Kameelen von Midian un Efa.
Aul dee von Saba woaren komen
un woaren Golt un Weiruak brinjen,
un dee woaren däm Harn lowen un preisen. #Psa 72,10; Mat 2,1-11
7Aul de Schop Häaden von Kedar woaren jebrocht woaren,
un de Bakj von Nebajot woaren die deenen;
dee woaren aunjebrocht sennen fa mienen Aultoa,
un daut Hus, woont doa wiest woo harlich ekj sie,
woa ekj sea straum moaken.
Gott woat de framde moaken die deenen
8Wäa sent dee, dee aus de Wolkjen flieejen,
un aus Duwen, dee no äare Städen komen?
9Aule Lenda luaren no mie,
aul ieeschtens de Tarsis Schäp
met diene Kjinja von wiet auf;
dee woaren äa Selwa un Golt met sikj brinjen,
daut see däm Harn, dienen Gott,
dee wäa fa Israel heilich es, ieren kjennen,
wiels hee die soo harlich jemoakt haft. #Jes 42,4; 55,5
10Framde woaren diene Mieren oppbuen,
un äare Kjennichs woaren die toojedonen sennen.
Ekj hab die en mienen Oaja doljeschloagen,
oba ekj woa een jenstjet Metleet äwa die haben. #Jes 54,8
11Diene Puaten woaren emma op stonen;
dee woaren Dach un Nacht nich too jemoakt woaren,
soo daut de Kjennichs von de Lenda
no de Rieej nenn komen kjennen,
met daut, waut an groosoatich muak. #Opb 21,25-26
12Daut Launt un daut Rikj, daut die nich deenen woat,
woat omkomen un gaunz enne Grunt jebrocht woaren.
13Daut waut Libanon soo harlich muak,
de Ziepressen, Buchsbeem un Taunen,
woaren die jebrocht woaren,
daut mien Heilichtum kaun straum jemoakt woaren.
Ekj well de Städ fa miene Feet,
to eene groosoatje Städ moaken.
14Dee waut die doljehoolen haben,
dee woaren nu äwajebekjt komen;
un dee waut die veachten deeden,
woaren sikj ver diene Feet hanschmieten.
Dee woaren dise Städ, “Däm Harn siene Staut”, nanen,
un uk, “Daut Zion von däm, dee fa Israel heilich es”. #Jes 14,2
15Wua du veloten un nuscht jeräakjent wieescht,
un wua kjeena derchreisen deed,
woa ekj daut moaken, daut du opp emma schmock latst,
un opp aule Tieden eene Freid best. #Jes 49,14
16Soo aus eene Mutta äa Kjint de baste Malkj jeft,
soo woaren de Velkja die fläajen,
un du woascht daut scheenste von de Kjennichs kjrieen.
Du woascht enseenen, daut ekj, de Har,
die von diene Fiend rad,
daut ekj die looskjeep,
un daut ekj dee sie,
wäa Jakob stoakj moakt. #Jes 49,23
17Enne Städ Brons, woa ekj die Golt brinjen,
un enne Städ Iesa, woa ekj Selwa brinjen;
enne Städ Holt, Brons, un enne Städ Steena, Iesa.
Ekj woa Fräd aunstalen aus diene Rejierunk,
un jerajcht sennen aus diene Oppsechta.
18Doa woat nich mea vebräakjen en dien Launt sennen
un nuscht vedorwen ooda beschädicht woaren.
Diene Mieren woascht du “Heil” nanen
un diene Puaten “Preis”.
Gott siene Städ
19Äwadach woat nich de Sonn dien Licht sennen,
un de Nacht woat nich de Mon die Licht jäwen;
de Har woat dan dien eewjet Licht sennen,
un du woascht harlich sennen, wiels hee dien Gott es. #Jes 24,23; Opb 21,23; 22,5
20Diene Sonn woat nich mea unjagonen,
un diene Mon woat nich kjlanda woaren;
de Har woat dien eewjet Licht sennen,
un diene Truadoag woaren to Enj sennen. #Joh 8,12; Jak 1,17
21Aul diene Lied woaren rajcht haundlen,
un du woascht opp emma dien Launt haben.
Du best daut Jewaus, daut ekj jeplaunt hab,
daut waut miene Henj jemoakt haben,
soo daut ekj woa veharlicht woaren.
22De kjlansta enne Famielje saul een groota Staum woaren;
de jerinjsta saul een stoakjet Volkj sennen;
ekj, de Har, woa dit haustich to de rajchte Tiet soo komen loten.
Currently Selected:
Jesaja 60: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
