Jesaja 61
61
De Har woat raden
1Gott däm Harn sien Jeist es opp mie jekomen,
daut ekj daut doonen kaun, wuatoo de Har mie jesaulft haft.
Hee schekjt mie no dee, dee lieden,
daut ekj an eene goode Norecht brinj;
no dee, dee derch waut schwoaret gonen,
daut ekj an Moot toospräakj;
daut ekj de faustjenomne saj,
see kjennen looskomen
un friewoaren von daut, waut an binjt. #Jes 11,2; Mat 11,5; Luk 4,18-19
2Ekj saul bekaunt jäwen,
daut daut Joa von däm Harn siene Gonst
un de Dach, wua Gott de Sind bestroft, nu aunfangt;
daut hee aul dee Troost jeft, waut nu truaren. #3Mo 25,10.13; Jes 63,4
3De Har sajcht, daut dee, dee en Zion wonen,
woaren waut aunstendjet enne Städ Ausch oppem Kopp droagen,
un Eelj aus to een Fast, enne Städ toom truaren brucken.
Daut woat von an jesajcht woaren,
daut see aus Ieekjen fa daut rajchte enstonen;
un daut see vom Harn aunjeplaunt sent,
daut see wiesen woo harlich hee es.
4See woaren opp daut oole Fundament fresch buen
un daut opprechten, waut enne Grunt jebrocht wia;
see woaren de doljebroakne Städa oppbuen,
waut aul Jennerazionen vebroaken wieren. #Jes 58,12
5Lied von aundre Velkja woaren komen june Schop weiden,
un framde woaren jun Launt fa junt oabeiden
un june Wiengoades besorjen. #Jes 60,10
6Un jie woaren aus däm Harn siene Priesta bekaunt sennen,
un jie woaren onsen Gott siene Deena jenant woaren.
Jie woaren junt to de Schaza von aundre Velkja freien,
un jie woaren junt derch äa Rikjtum waut meenen. #2Mo 19,6; 1Pet 2,5.9
7Doafäa daut mien Volkj dobbelt jeläden haft,
un haft must Schaund lieden,
woaren see nu een dobbeldet Poat en äa Launt kjrieen,
un eene Freid haben, dee opp emma blift.
8Ekj sie de Har, dee daut jleicht Sachen rechtich derchtofieren
un daut orrajchte un stälen nich vedroagen kaun;
ekj woa bestendich doano jäwen aus see vedeent haben,
un woa eenen Bunt met an moaken, dee opp emma väahelt. #Jes 54,10; 55,3
9Äa Volkj woat mank de Velkja bekaunt sennen,
un äare Nokomen en de Lenda;
dee waut daut seenen, woaren vestonen daut dit Volkj
vom Harn eenen Säajen jekjräajen haft.
10Ekj frei mie jehierich fa däm Harn,
un miene Seel jeit daut sea scheen met mienen Gott.
Sien Heil es om mie, soo aus een Rock,
un sien jerajcht sennen, soo aus een Äwarock.
Wie sent soo jlekjlich aus Brutlied,
dee sikj to Kjast aunjetrocken haben. #Mat 22,11-12
11Krakjt soo aus de Ieed daut Kjiensel väabrinjt,
ooda aus daut Sot em Goaden oppjeit,
soo lat Gott de Har jerajcht sennen oppkomen,
un goodet von sikj jesajcht woaren en aule Lenda.
Currently Selected:
Jesaja 61: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
