Jesaja 59
59
Jie brinjen selfst de schwoare Tiet opp junt
1Horcht emol.
Däm Harn sien Oarm es nich too kort,
daut hee nich raden kaun.
Siene Uaren sent nich doof jeworden,
daut hee nich mea hieren kaun. #Jes 50,2
2Doa es waut tweschen junt un Gott jekomen,
waut jie selfst veschulcht haben;
june Sinden haben am doatoo jebrocht,
sikj wajchtodreien un nich no junt to horchen.
3Jie sent schuldich von Jewault eewen,
un daut doonen waut orrajcht es;
waut jie sajen, es nich soo,
un jun fuschlen es schlajcht. #Jes 1,15
4Kjeena es jerajcht en waut hee velangt,
kjeena rät de Woarheit em Jerecht.
Dee beroopen sikj opp Zeijen, dee nuscht weeten,
un bliewen nich bie de Woarheit.
Dee nämen sikj daut väa, waut nich goot es,
un fieren daut ut, waut eene Sind es. #Psa 7,15
5Daut es aus wan see Schlangen Eia brooden,
un een jeftjet Spandenjewäw spennen;
wäa de Eia at, stoaft doavon
un wan daut Ei tweijeschloagen woat,
kjemt doa eene jeftje Schlang rut.
6Waut see wäwen, es nich fa Kjleeda to brucken,
un waut see spennen, daucht nich toom toodakjen.
Waut see foadich brinjen, es waut beeset,
un äare Henj doonen, waut schlajcht es.
7See spooden sikj, wan see orrajcht doonen kjennen,
un sent boolt reed een Läwen to nämen;
äare Jedanken sent schlajchte Jedanken,
un wua see gonen, woat velazt un vedorwen. #(7 un 8) Reema 3,15-17; Spr 1,16; Jer 2,34
8See vestonen nich frädlich to haundlen,
un vesieekjen nich daut rajchte to doonen.
See haben veschiednet krommet väa,
waut nich to dän Fräd deenen kaun.
Daut Volkj bekjant äare Sinden
9Met aul dit, sent wie wiet auf von daut waut rajcht es,
un wie komen nich bat doa, wua wie jerajcht sent.
Wie luaren daut saul oppkloaren, un daut blift dunkel;
wie wachten, daut saul dach woaren,
un gonen em diestren rom.
10Wie langen em diestren aus een blinja,
soo aus dee, dee nich seenen kjennen;
wie stolpren äwadach aus em Tweediesta,
un mank de stoakje aus Doodje. #5Mo 28,29
11Wie gnorren aula aus de Boaren
un gurren aus de wille Duwen;
wie luaren, daut rajcht jehaundelt saul,
oba soont jeft daut nich.
Wie hopen opp de Radunk,
oba daut es wiet auf.
12Du weetst woo foaken wie jefollen sent,
un onse Sinden stonen jäajen ons.
Ons Vegonen es ons sea em Stich,
un wie weeten, waut wie orrajcht jedonen haben. #Jer 14,7
13Wie sent nich jehuarsom jewast,
un haben däm Harn nich siene Städ jejäft;
wie haben ons von Gott sienen Wajch jedreit.
Wie räden von aundre auflaupsen un jäajenaun sennen;
wie räden Läajes, dee wie ons trajchtjelajcht haben.
14Daut rajchte doonen es ons nich wichtich,
un jerajcht sennen blift wiet auf;
daut opprechtich sennen stolpat oppe Gaussen,
un de Woarheit haft kjeenen Plauz.
15Opprechtich sennen es nich mea,
un wäa nich orrajcht deit, woat utjenuzt.
De Har woat halpen
De Har sitt daut un am jefelt daut nich,
daut nich nom rajchten jeseenen woat.
16Hee sach, daut doa kjeena wia,
un am wundat daut, daut kjeena doa waut met deed.
Dan rad hee met sienen ieejnen Oarm,
un wiels hee jerajcht es, kunn hee daut derchfieren. #Hes 13,4-5
17Hee kjeem äwadäl met rajcht doonen,
aus wan daut sien Brostschilt
un sien radenda Hoot wia;
runtom kunn eena seenen, woo veläajen hee wia,
un daut hee Rach eewen wudd.
18Hee woat bestrofen, doano aus see jedonen haben;
dee waut jäajen am sent, woaren sienen Oaja kjrieen.
Siene Fiend woat hee jäwen, waut see vedeent haben;
hee woat wiet un breet trigjtolen.
19Dan woaren see em Wasten Forcht haben fa sienen Nomen,
un dee em Oosten fa woo harlich hee es;
hee woat aus een rietendet Wota komen,
daut vom Harn sien Odem jeschowen es.
20Hee woat dee raden, dee en Zion sent,
un Jakob siene Nokomen, dee sikj von de Sind wajchdreien.
Dit sajcht de Har. #Reema 11,26
21Fa mien Poat es dit mien Bunt met an, sajcht de Har. Mienen Jeist, dee en die es, un de Wieed, dee ekj die en dien Mul jejäft hab, woaren nich von die jenomen woaren, un nich von diene Kjinja jenomen woaren, un dee woaren fa aule Tieden nich von june Nokomen jenomen woaren, sajcht de Har. #Jer 1,9
Currently Selected:
Jesaja 59: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
