Jesaja 55
55
De Har kroacht toom Bunt
1Nu komt, wäm doa darscht! Hia es Wota fa junt.
Jie, dee kjeen Jelt haben, komt, kjeept, un ät.
Komt un kjeept Wien un Malkj
onen Jelt ooda betolen. #Joh 7,37; Opb 22,17
2Wuarom vebruck jie jun Jelt fa soont,
waut nich Broot es,
ooda jun Vedeenst fa daut,
waut nich tofräd stalen kaun?
Horcht no waut ekj saj,
dan woa jie goodet to äten kjrieen,
un junt to daut scheenste em Läwen freien.
3Horcht no daut, waut ekj saj, un komt no mie;
lot junt dit groot woaren, dan woa jie Läwen haben.
Ekj woa eenen Bunt met junt moaken,
dee opp emma bestonen woat,
un junt truhoatich goot sennen,
soo aus ekj David wia. #2Sam 7,8-16; Jer 31,31-34; Apost 13,34
4Ekj sad junt han, daut jie Zeijen wieren,
dee de Velkja leiden un jebeeden deeden.
5Nu woa jie Velkja roopen, waut junt framd sent;
soone waut junt nich kjanen, woaren aunjerant komen,
wiels de Har jun Gott, dee waut fa Israel heilich es,
junt soo harlich jemoakt haft.
6Sieekjt junt däm Harn,
soo lang aus hee sikj finjen lat;
roopt am wan hee noch dicht bie es. #Jer 29,13-14; Amos 5,4
7De beesa saul nich mea soo läwen aus ieescht,
un de Sinda saul aundre Jedanken fieren.
Lot am trigj nom Harn komen,
daut hee am kaun jenstich sennen.
Lot am sikj no Gott kjieren, dee väl vejeft. #Hes 18,27; 33,11; Psa 130,4
8Jie denkjen nich soo aus ekj denkj,
un june Wäaj sent nich soo aus miene Wäaj,
sajcht de Har. #Reema 11,33
9Soo väl hecha aus de Himmel äwa de Ieed es,
soo väl hecha sent miene Wäaj aus june Wäaj,
un es mien denkjen aus jun denkjen.
10Krakjt soo aus de Räajen un daut Schnee vom Himmel faulen,
un doa nich wada trigj hangonen,
oba de Ieed wessat,
daut dee fruchtboa es un waussen lat,
un Sot toom seien un Broot toom äten jeft,
11soo saul mien Wuat, woont ekj räd, sennen.
Daut woat nich ladich no mie trigjkomen;
daut woat daut doonen, waut ekj haben wull,
un daut doonen, wuatoo daut jejäft es. #Mat 13,8
12Jie woaren junt freien wan jie rutgonen,
un jie woaren frädlich jeleit woaren.
De Boaj un de Humpels woaren ver junt oppschrieen un sinjen,
un de Beem woaren äare Henj klautschen. #Jes 44,23
13De Ziepres woat dan enne Städ von Spekjasch,
un enne Städ Struck woaren de Mirten waussen.
Daut woat eene Aunerkjanunk fa däm Harn sennen,
daut opp emma blift un nich wajchjeit. #Jes 41,19-20
Currently Selected:
Jesaja 55: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
