Jesaja 54
54
De Har nemt de Schaund un moakt aunjeseenen
1Frei die, dee du kjeene Kjinja hautst,
bliew nich mea stell;
komm äwadäl met sinjen,
dee du nich schwanga jewast best.
Dee waut nu tosied jesat es,
woat mea Kjinja haben aus de Befriede,
sajcht de Har. #Jes 49,20; Gal 4,27
2Moak dän Hoff fa dien Zelt jrata.
Rakj de Zeltdakjen wieda rut un spoa nich;
bruck lenjre Strenj, un stoakjre Zeltstekjels.
3Du woascht nu rajchtsch un linkjsch utbreeden.
Diene Nokomen woaren Velkja oawen,
un du woascht velotne Städa besiedlen.
4Hab nich angst,
du woascht die nich schämen brucken;
du woascht nich vespott woaren,
du woascht nich veacht sennen.
Du woascht de Schaund von diene junge Joaren vejäten,
un nich mea doaraun denkjen,
woo du aus Wätfru veacht wieescht. #Psa 25,7; Jer 51,5
5Dee wäa die jemoakt haft es dien Maun,
sien Nomen es, de Har, dee aules rejieet.
Dee wäa fa Israel heilich es, rat die vom Fient;
hee es Gott äwa de gaunze Welt.
6De Har roopt sikj die nu,
krakjt aus wan du eene aufjestade Fru wieescht,
dee gaunz doljeschloagen wia;
kaun wäa de Fru von siene Jugent tosied saten?
frajcht dien Gott. #Jes 50,1
7Ekj hab die fa een stootje tosied jesat,
oba woa sea leeftolich sennen,
wan ekj die trigj toopsaumel. #Psa 30,6
8Een stootje rand mie de Oaja äwa,
soo daut ekj mie von die wajchdreid;
oba ekj woa emma leeftolich
un jenstich to die sennen,
sajcht de Har, dee die vom Fient rat. #Jes 60,10; Kloag 3,31-32
9Soo aus ekj emol to Noah säd:
Daut Wota woat nienich wada de Ieed bedakjen,
soo jäw ekj nu mien faustet Vespräakjen,
daut ekj nich woa veläajen met junt woaren
un nich mea schellen woa. #1Mo 9,11-17
10Wan uk de Boaj vegonen wudden
ooda Humpels wieda jesat worden,
wudd miene truhoatje Leew fa die nich vegonen,
un mien Frädens Bunt nich tosied jesat woaren,
sajcht de Har, dee waut äwrich fa die haft. #Hes 37,26
11Du ojjlekjelje, dee kjeen Troost funk,
dee du aules hanhoolen must,
ekj woa kostboare Steena en diene Mieren saten,
un Safiersteena fa dien Fundament lajen. #(11 un 12) Opb 21,18-21
12Diene Däakja sellen von Rubinen sennen,
diene Puaten von kostboaret Steen,
un de gaunze Mia von diere Steena.
13Aul diene Kjinja woaren sikj vom Harn lieren loten,
un dee woaren tofräd un sea jlekjlich sennen. #Joh 6,45
14Daut woat bie die von Grunt opp rajcht häagonen.
Doa woat kjeena sennen waut die unjadrekjt,
die woat kjeena enjsten ooda grulen.
15Wan wäa met die stritt, dan es daut nich von mie;
wäa die aunjript, woat derch die tofaul komen.
16Ekj sie deejanja, wäa dän Schmett häajestalt haft,
dee met de Blosbaulj oppe Kolen blost,
un daut Jewäa fa dän Kjrich häastalt;
un ekj sie deejanja, wäa dän häastald,
dee daut groote vedoawen brocht. #2Sam 24,16
17Kjeena kaun soont häastalen,
waut junt venichten woat;
un een jiedra, dee die wäajen waut vekloacht,
däm woascht du met diene Auntwuat stell moaken.
Soo woat dee, dee däm Harn deenen, daut gonen;
soo woa ekj daut enfieren, daut Sachen rajcht gonen,
sajcht de Har.
Currently Selected:
Jesaja 54: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
