Jesaja 25
25
Een Dank Leet
1Du Har, best mien Gott,
ekj preis die un hool dienen Nomen en Ieaforcht;
du hast groosoatje Dinja jedonen
krakjt soo aus du lang trigj vespruakst.
Opp die kjenn wie ons secha veloten.
2Du hast de Staut gaunz venicht,
un de huage Mieren enne Grunt jebrocht.
De framde äare groosoatje Jebieda
sent nu opp emma wajch.
3Un doawäajen preist een stoakjet Launt die,
un jewaultmäsje Städa sent en Forcht ver die.
4De oame un dee waut Help fäld,
hast du en Noot beschizt un jeholpen;
du jeefst an Schutz vom Räajen,
un Schauten von de heete Sonn,
wan de hunjsche Fiend äwafollen
aus een Owwada em Winta. #Jes 4,6
5Du helst de drinjende Hett enne Wiltnis opp,
soo aus de Wolkjen de Hett von de Sonn trigjhoolen.
Soo dolsd du däm hunjschen sien Jeschrech.
6De Har, dee aules rejieet,
woat hia opp disen Boajch,
fa aule Velkja oppe Welt
eene scheene Moltiet utreeden.
Daut woat eene groote Moltiet sennen
met fatet Fleesch un oola Wien,
met Moakj un gooda kloara Wien. #Mat 22,2-4
7Hee woat daut Loaken aufdakjen,
waut äwa aule Velkja es,
un de Dakj von de Lenda wajchnämen.
8Gott de Har woat opp emma dän Doot wajchnämen.
Hee woat aulem en sien Volkj de Tronen wajchweschen;
un woat oppe gaunze Ieed,
dän schlajchten Nomen von sien Volkj, wajchnämen.
Dit haft de Har jesajcht. #1Kor 15,55; Opb 7,17
9Aun dän Dach woaren see sajen:
“Nu kjikjt. Dit es ons Gott,
no wäm wie jeluat haben,
daut hee ons raden wudd.
Dit es de Har opp wäm wie hopten;
well wie schaftich sennen un ons freien
daut hee ons jerat haft.” #Psa 48,15
10Un däm Harn siene Macht
woat disen Boajch Schutz jäwen.
De Moabita woaren doljedrekjt woaren,
soo aus Stroo enne Mestpras doljeklunjt woat.
11Un wan see uk met de Oarms langen,
soo aus een Schwama biem schwamen,
woat de Har äaren Stolt doch doldrekjen,
krakjt eendoont woo see met de Henj graupsen.
12Äare vesechade Städen un huage Mieren
woaren doljebroaken un enne Grunt jebrocht woaren.
Dee woaren jlikjs de Ieed em Stoff ligjen.
Currently Selected:
Jesaja 25: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
