Jesaja 26
26
Onse Staut es sea stoakj
1Wan dee Tiet kjemt, woat dit Leet en Juda jesungen woaren:
Wie haben eene sechre Staut;
de Har rat ons;
hee jeft ons groote Mieren.
2Moakt de Staut Puaten wieda op.
Daut Volkj daut dän Gloowen helt
un rajcht ver am besteit, saul nengonen. #Psa 118,20
3Wäa dän Gloowen aun die helt,
un sikj gaunz opp die velat,
däm jefst du Fräd, ennare Fräd.
4Velot die emma opp däm Harn,
bie Gott däm Harn best du emma secha. #5Mo 32,4
5Hee sat dee rauf, dee huach rut wonen,
un ritt de prauzje Staut dol;
hee brinjt dee enne Grunt
un schmitt dee em Stoff han.
6De Feet von de oame un utjenuzte
gonen äwa dee un veklunjen dee.
7De Har moakt dän Wajch
fa dän opprechtjen jlei;
hee moakt dee äaren Wajch jlikj.
8Wie luaren no daut waut du deist,
uk wan du strofen motst;
mien jratstet velangen es
die lowen un preisen.
9Enne Nacht bang ekj mie no die,
un mien Jeist es hinjaraun no die.
Wan du de Welt rechten deist,
lieren de Menschen, waut rajcht es. #Psa 63,7
10Oba de gottloosa lieet doa nich von,
wan du jnädich to an best;
uk en een goodet Launt deit hee orrajcht
un sitt nich woo harlich du, Har, best.
11 Har, du hast diene Haunt oppjehowen,
oba dee seenen daut nich;
wies an emol woo du fa dien Volkj oppkjemst.
Wies an daut du kjeenem vedroagen kaust, buta dien Volkj,
un dan woaren dee sikj schämen motten.
Jo, lot an en daut Fia komen,
waut du fa onse Fiend hast. #Jes 37,32
12Doch, du Har woascht ons Fräd jäwen;
aules waut wie soowiet haben kunt foadich brinjen,
hast du fa ons jedonen. #Jes 9,6
13 Har, dee du ons Gott best,
doa rejieren noch aundre Leidasch äwa ons,
oba wie aunerkjanen bloos die.
14De aundre Leidasch stoawen un haben nich Läwen;
dee sent aus Schauten un kjennen nich oppstonen,
wiels du hast an bestroft un venicht,
daut nich mea von dee jerät woat.
15 Har du hast ons Volkj jrata jemoakt.
Du hast ons Volkj jrata jemoakt,
un hast die harlich jewäsen;
du hast aul onse Jrensen wieda rut jesat.
16 Har, en schwoare Tieden sieekj wie die;
aus du ons bestrofen deetst, bäd wie die aun. #Hos 5,15
17Wäajen daut, waut du leetst opp ons komen,
wia wie aus eene Fru dee doa schricht,
un sikj en äare Weeen kjremt. #Joh 16,21; Opb 12,2
18Wie kjremden ons, aus de Fru en äare Weeen,
oba waut doa väakjemt es bloos Wint.
Wie haben ons Launt nich kunt wäaren,
un haben de Menschen von de Lenda nich doljekjräajen.
19Oba diene Vestorwne, Har, woaren läwen,
diene Doodes woaren oppstonen;
muchten dee, dee unjare Ieed ligjen,
oppwakjen un fa freid sinjen;
Har du jefst Läwen soo aus de Deiw zemorjes,
un du jefst dän Deiw opp dee waut oppe Ieed dol ligjen. #Hes 37,1-14; Mat 27,52-53
20Got en june Hiesa, mien Volkj,
un schlut de Däaren hinja junt too;
vestäakjt junt een kortet stootje,
bat sien Oaja sikj utjetoopt haft. #Mat 6,6
21De Har kjemt väa von siene Städ,
un bestroft de Menschen oppe Ieed,
fa daut waut see orrajcht jedonen haben;
dan woat de Ieed dee väabrinjen waut omjebrocht sent,
un woat dee nich lenja vestäakjen. #1Mo 4,10-11; Opb 18,24
Currently Selected:
Jesaja 26: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
