Jesaja 24
24
De Har woat de gaunze Ieed bestrofen
1Horcht emol.
De Har woat de Ieed utriemen,
un woat aules vedoawen.
Hee woat de Ieed vekrumplen
un de Menschheit veschechren.
2Daut woat de Priesta krakjt soo gonen aus daut Volkj,
däm Wieet krakjt soo aus däm Oabeida,
de Kjäakjsche soo aus de Wieetsche,
däm Vekjeepa soo aus däm dee kjaft,
däm wäa utliet soo aus däm wäa doa borcht,
däm wäa goot auf es soo aus däm oamen.
3De Welt woat bat opp daut latste ladich sennen;
dee woat gaunz beplindat sennen;
doa haft de Har sien Wuat to jejäft.
4De Stapen sent vewalkjt un vedrieecht,
de gaunze Welt litt un woat schwak;
de Ieed un de Wolkjenhimmel vekomen.
5De Ieed es von de Menschen veschwient worden,
doaderch daut see de Jesazen nich jehoolen haben,
un de Jebooten vedreit un dän eewjen Bunt jebroaken haben.
6Un doawäajen veschlinjt een Fluch de Ieed,
un de Menschen lieden unja äare Schult;
de Menschen oppe Ieed veschwinjen aus Holt em Fia,
un doa bliewen nich väl äwa.
7De Wiendruwenhakj es vedrieecht,
un doa es meist kjeen Wien mea;
dee waut ieescht soo jlekjlich wieren,
sent nu gaunz jeschloagen.
8De Drommeln äa reizen es stell jeworden,
de schaftje äa schrieen es ut,
un de Hoapen woaren nich mea jespält.
9Kjeene sinjen noch biem Wien drinkjen,
un wäa noch drinkjt, däm es daut betta.
10En de Staut es aules twei un derch eenaunda,
aule Hiesa sent toojeschloten un loten kjeenem nenn.
11Oppe Gaussen woat jeschullen, daut kjeen Wien es;
aulet scheengonen es to Enj;
de Freid es em Launt veschwungen.
12Enne Staut es aules vedorwen,
un de Puaten sent to Wrak veschloagen.
13Soo woat daut oppe gaunze Ieed gonen,
un mank aule Velkja;
daut woat sennen aus een Oliewenboom, dee ladich jeschloagen es,
ooda een Wiengoaden, wan ieescht nojeläst es.
14Vom Wasten woaren de Lied roopen;
dee woaren lud räden un sinjen,
von woo harlich de Har es.
15Em Oosten sellen see am preisen,
delenjd daut Mäa lot see dän Harn ieren,
dee wäa en Israel Gott es.
16Äwa de gaunze Ieed hieet eena sinjen:
“De Jerajchta es harlich.”
Oba ekj säd: Ekj woa sea älendich;
un ekj hab kjeene Krauft. Woo saul daut noch?
Doa es soo väl onopprechtjet,
doa es soo väl onopprechtjet.
17Furchtboaret schrieen, em Loch faulen un faustbinjen,
kjemt opp aule Menschen oppe Ieed.
18Wäa doa wajchrant,
wan ut Angst jeschräajen woat,
dee felt en een Loch,
un wäa ut daut Loch kjemt,
veschlenjt sikj en een Nat.
Daut Owwada haft kjeene Mot,
un daut Fundament von de Ieed scheddat. #1Mo 7,11; Jer 48,43-44; Amos 5,19
19De Ieed es gaunz vebroaken.
De Ieed es opjeräten
un es sea vescheddat. #2Pet 3,10
20De Ieed schwankt aus een bedrunkna,
dee jeft sikj aus eene Kot em Wint.
Äare Sinden sent ar too schwoa jeworden;
dee woat hanfaulen un nich wada oppstonen.
21Wan dee Tiet kjemt, woat de Har
dee, dee bowa de Ieed jebeeden,
un de Kjennichs oppe Ieed, bestrofen. #Jer 46,25; Dan 10,13
22Dee woaren faustjenomen
un em Jefenkjnis jeschmäten woaren;
dee woaren en een Loch bemoakt woaren
un no eene lange Tiet bestroft woaren.
23Dan woat de Mon sikj schämen,
un de Sonn woat sikj trigjtrakjen;
wäajen de Har, dee aules rejieet,
woat oppem Zion Boajch en Jerusalem Kjennich sennen,
un woat ver de Leidasch wiesen, woo harlich hee es.
Currently Selected:
Jesaja 24: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
