Jesaja 23

Daut Jerecht äwa Tierus un Sidon

1De Norecht äwa Tierus un Sidon:

Schriet lud, jie groote Tarsis Schäp,

wiels Tierus es enne Grunt jebrocht.

Kjeen Hus steit noch; de Howen es wajch.

Wan jie von daut Launt Kittim trigj komen,

woa jie de schlemme Norecht kjrieen. #Hes 27,12

2Woat stomm en jun Trua,

aul jie waut velenjd daut Mäa wonen.

Jie Haundelsmana von Sidon,

dee jie june Haundelsmana äwa daut Mäa schekjten,

3un Jeträajd von Schihor aum Niel Riefa

äwa daut groote Wota brinjen leeten.

Jie wieren de Tweschenhendla fa de Velkja.

4Schäm die nu, Sidon.

Wiels daut Mäa, daut majchtje Mäa sajcht:

Du kaust nich mea eene Staut sennen,

un du woascht nich mea junge Mana opptrakjen,

un kjeene junge Mejales mea haben.

5Aus see en Ägipten de Norecht äwa Tierus hieeden,

veschrock dee daut sea.

6Flicht wiet wajch, no Tarsis.

Hielt doch, dee jie aum Mäa wonen.

7Es dit de selwje Staut, dee emma soo schaftich wia?

dee aul von lang häa aufstaumen deed,

un dee wiet fua un doa Siedlungen muak?

8Wäa haft dit jäajen Tierus jeplont?

Jie saden Kroonen wua jie wullen,

un june Haundelsmana wieren Leidasch;

june Haundelsmana wieren äwa de gaunze Welt aunjeseenen.

9De Har, dee aules rejieet, plond daut,

om dän Stolt ut junen Ieajiez doltoschlonen,

un toom aul dee, dee oppe Ieed jeieet worden,

toschaund to moaken.

10Sieekjt derch jun Launt jie Tarsis Schäp;

hia es kjeene Städ toom stelhoolen mea. #Hes 27,12

11De Har haft siene Haunt äwa daut Mäa jestrakjt,

un haft de Velkja un äare Kjennichs jescheddat;

hee haft sien Wuat jejäft,

daut de Mieren en Kanaan vedorwen sellen.

12Hee säd:

Du woascht nich mea met Freid sinjen,

du beschämde Staut Sidon;

un wan du uk no Kittim foascht

woascht du doa kjeenen Fräd finjen.

13Kjikjt, waut de Chaldäa jedonen haben. Dit wieren nich de Assiera. See haben eene Wiltnis von de Staut jemoakt. See stalden Torms rom de Staut toom dee ennämen, un bruaken äare groosoatje Paulausten dol. 14Lot de Mana opp de Tarsis Schäp schrieen, wiels doa es kjeene vesechade Städ fa an jebläwen.

15Wan dee Tiet kjemt, woat Tierus fa 70 Joa vejäten woaren, von ojjefäa soo lang aus een Kjennich läft. Oba no de 70 Joa, woat daut met Tierus soo gonen, aus daut en daut Leet von de Hua sajcht:

16Nemm diene Hoap un go rom enne Staut,

dee haben von die vejäten, du Hua;

sinj diene Leeda un späl diene Hoap

dan komen de Kunden noch wada.

17Wiels wan de 70 Joa om sent, woat de Har de Staut Tierus wada loten äa oolet Jeschaft driewen, un see woat wada met aule Lenda romschwienen un äaren Vedeenst von dee nämen. 18Dan woat äa Omgank un Vedeenst däm Harn jehieren. Enne Städ daut see sikj daut wajchlajen, woat daut goodet Äten un feine Kjleeda jäwen fa dee, dee soo läwen aus däm Harn daut jefelt.

Currently Selected:

Jesaja 23: PB

Highlight

Compare

Copy