Jesaja 22

Eene Woarnunk fa Jerusalem

1Dit es de Norecht äwa daut Tol wua see seenen:

Waut es met junt jeworden,

daut jie aula oppem Dak nopp gonen?

2Aulawäajen schrieen de Menschen,

de Staut es voll von dee waut sinjen un sikj freien.

Dee waut opp june Gaussen jestorwen sent,

sent nich vom Schwieet ooda Kaumf jeschloagen.

3June Leidasch sent aula wiet wajchjerant,

oba dee sent jefungen un faustjenomen worden

onen sikj met Boagen un Feilen to wäaren;

4Un doawäajen saj ekj:

Kjikjt nich no mie;

lot mie bettalich hielen

un vesieekj mie nich to treesten,

wan mien scheenet Volkj venicht woat. #Jer 8,23

5Gott de Har, dee aules rejieet, haud eenen Dach bestemt,

wua daut Tol wua see seenen, vegrult, vetraumpelt un vestimmelt wort,

wua de Stauts Mieren doljebroaken worden,

un een Roopen om Help bat enne Boaj to hieren wia.

6Von Elam kjeemen see met Jereetschoft un Woages un Ritta,

un von Kir brochten see äa Schilt äwadäl.

7Dan wieren de baste Täla voll Pieed un Woages,

un de Soldoten stalden sikj ver daut Stautspuat han,

8un Juda kunn sikj nich wäaren.

Aun dän Dach docht jie aun daut Libanonwoolt Hus un daut Jereetschoft waut doa wia, 9un jie besagen junt, opp woo väl Städen de Mia aun de Davidstaut oppjeräten wia. Jie deeden von daut läajre Wotaloch Wota holen. #Jes 7,3 10Jie schazten de Hiesa en Jerusalem auf un säden woone jie wudden dolbräakjen toom de Stautswaunt stoakja moaken. #Jer 33,4 11Jie muaken eene Zista tweschen de beid Mieren, fa daut Wota von daut oole Wotaloch. Aul daut vesto jie to doonen, oba jie kjieeden junt nich no däm, dee dit aula deed, un jeewen nich acht opp däm, dee daut wiet em verut jeplont haud.

12En dee Tiet roopt Gott de Har, dee aules rejieet,

daut jie hielen un truaren sullen,

daut jie dän Kopp schäaren sullen,

un Sakkjleeda auntrakjen sullen.

13Oba enne Städ daut jie daut deeden,

muak jie junt Spos un een Fast;

jie schlachten Ossen un Schop,

jie eeten Fleesch un drunken Wien un säden:

“Well wie äten un drinkjen,

morjen woa wie stoawen.” #1Kor 15,32

14Oba de Har, dee aules rejieet, säd to mie:

“Dit Orrajcht woa ekj an nienich vejäwen

soo lang aus see läwen.”

Dit es waut Gott de Har, dee aules rejieet, sajcht.

Eene Norecht fa Schebna un Eljakim

15Dan schekjt Gott de Har, dee aules rejieet, mie no Schebna, dee de Äwasechta fa däm Paulaust wia, daut ekj am sajen sull: #Jes 36,3 16Wäa jleefst du daut du best? Es sest wäa von dien Frintschoft hia begroft, ooda wuarom hakst du hia oppem Boajch een Grauf ut fa die? 17Horch emol, du jleefst du best stoakj, oba de Har woat die veschmieten. Hee woat die to hoolen kjrieen un die wajchschmieten. 18Hee woat die faust toopwekjlen un aus een Baul en een grootet opnet Launt schmieten. Doa woaren diene straume Kjrichswoages tosplät komen un du woascht doa stoawen. Du best eene Schaund opp dien Wieet sien Hus. 19Ekj woa die ut dien Aumt rutschmieten, un du woascht nich mea soo huach aunjestalt sennen.

20Wan dee Tiet kjemt woa ekj mienen Deena Eljakim, Hilkija sien Sän, roopen 21un am dän Rock von dien Aumt jäwen, un am dän Mauntel ombinjen, dee een Tieekjen von dien Aumt es. Ekj woa am daut Machtrajcht jäwen, waut du nu hast, daut hee aus een Voda fa de Lied en Jerusalem un en Juda sennen woat. #1Mo 45,8 22Un ekj woa am aul de Macht jäwen, dee David siene Nokomen haben. Waut hee opschlitt woat kjeena tooschluten, un waut hee tooschlitt woat kjeena opschluten. #Opb 3,7 23Hee woat siene Städ soo secha sennen aus een enjeschloagna Noagel, un hee woat huach aunjeseenen sennen von siene gaunze Famielje.

24Oba wan sien Voda siene Nokomen un Famielje sikj gaunz opp am veloten woaren, Kjinja un Aunjehieeje, soo aus wan Gropes un Schleew aula opp eenen Noagel jehongen woaren, 25dan, soo sajcht de Har, dee aules rejieet, woat de Noagel, waut soo faust enjeschloagen wia, nojäwen. Dan woat hee faulen met aul daut toop waut aun am honk. Dit sajcht de Har.

Currently Selected:

Jesaja 22: PB

Highlight

Compare

Copy