Jesaja 18
18
Daut Jerecht äwa Kusch
1Woo woat daut doch met daut Launt Kusch gonen,
wua de bosje Boots oppe Riefasch surren. #Zef 3,10
2Dee schekjen Norecht delenjd däm Niel Riefa
en Boots dee von Schelp jemoakt sent.
Schekjt dee Boots nu trigj no daut Launt,
daut soo väl Riefasch haft,
un een Volkj haft daut groot jewossen es
un glaute Hut haft,
daut wiet un breet jefercht woat,
wiels see soo stoakj un jewaultmässich omhäagonen;
3Lot aule Menschen oppe Ieed,
un dee, dee jie oppe Welt wonen, häahorchen.
Wan de Flag oppem Boajch woat oppjehowen woaren, dan kjikjt;
un wan de Trompeet blost, dan horcht.
4Dit es waut de Har to mie sajcht:
Ekj woa von opp miene Städ kjikjen,
soo eendrajchtich aus de Hett von de Sonn opp Meddach,
un soo jeduldich aus de Deiw, wan jie arnten.
5Ver de Arnt, wan daut Blieechsel oba aul vedrieecht es,
ea de Wiendruwen gaunz riep sent,
woaren de Scheeren de Ranken aufschnieden,
un de Stam aufjehakt un toop jeschmäten woaren.
6Un dee woaren bliewen aus Fooda
fa de Hofkjes von enne Boaj,
un de wille Tieren oppem Launt.
Un de Väajel woaren doa em Somma fräten,
un em Winta veschiedne Tieren von oppem Launt.
7Un wan dee Tiet kjemt,
woat daut grootjewosne Volkj met de glaute Hut,
waut dolla to ferchten es aus sest wäa,
wiels see soo stoakj un jewaultmässich sent,
von en äa Launt, daut soo väl Riefasch haft,
no däm Zions Boajch Gowen brinjen
fa däm Harn, dee aules rejieet. #Psa 68,30.32; Apost 8,27
Currently Selected:
Jesaja 18: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
