Jesaja 19
19
Daut Jerecht äwa Ägipten
1De Norecht äwa Ägipten es dise:
Kjikjt emol. De Har kjemt no Ägipten,
hee kjemt bosich opp eene Wolkj.
De Jetta en Ägipten woaren ver am zetren,
un de Lied woaren aulen Moot velieren.
2Ekj woa de Ägipta, eena jäajen dän aundren opphetzen,
daut see eena jäajen dän aundren kjamfen;
Nobasch woaren jäajen Nobasch kjamfen,
Städa woaren jäajen aundre Städa,
un een Poat vom Rikj jäajen daut aundre.
3De Ägipta woaren aulen Moot velieren
un ekj woa äare Plons to nuscht moaken;
see woaren dan de Jetta aunroopen
un dee waut met Jeista un Vestorwne räden, no Rot froagen.
4Ekj woa de Ägipta en de Macht
von eenen ruchloosen Leida jäwen;
een sea strenja Kjennich woat äwa an rejieren,
sajcht de Aulmajchtja, de Har, dee aules rejieet.
5Daut Wota em Niel woat veschwinjen,
un de Riefa woat vesajen un utdrieejen.
6De Kanols woaren stenkjrich woaren,
un de Riefasch en Ägipten vesajen un utdrieejen,
soo daut Schelp un Struck vefaulen woaren.
7Waut emma aum Riefa jreent, woat vedrieejen;
de jeseide Flekja aum Niel woaren soo drieech sennen
un met däm Wint wajchblosen,
daut et nuscht mea met dee meent.
8De Feschalied woaren truarich sennen.
Aul dee waut de Angel em Niel schmieten, woaren sikj bejaumren,
un dee waut met daut Nat feschen, woaren bedrekjt sennen.
9Dee waut met Flaus oabeiden, woaren Schoden haben,
beides dee waut kjamlen un dee waut wäwen.
10Daut woat schwoa sennen fa de Wäwa;
un de Hauntoabeida woat sikj nich Rot weeten.
11De Leidasch von Zoan sent schoslich,
un däm Kjennich siene Rotjäwa jäwen daumeljen Rot.
Woo kjennen dee noch sajen:
“Ekj staum von de jewizte;
ekj staum von dee waut ieescht emma Kjennichs wieren?”
12Wua sent dee von diene Mana,
waut werkjlich weis sent,
daut see die sajen kjennen,
waut de Har, dee aules rejieet,
äwa Ägipten beschloten haft?
13De Leidasch en Zoan un Memfis
sent schoslich un sent veleit worden;
dee waut em Launt sullen veropp gonen,
haben Ägipten veleit.
14De Har haft an eene vewerde Jesennunk jejäft,
un nu haben see Ägipten doaderch stolpren moakt,
krakjt soo aus een bedrunkna en sien ieejnet Kotz.
15Kjeena woat waut to Staund brinjen en Ägipten,
nich de Leidasch ooda dee waut hinjaraun gonen,
nich de rikja ooda de jeweenelja.
16Wan dee Tiet kjemt, woaren de Menschen en Ägipten aula soo enjstlich sennen aus Frues. Dee woaren sikj sea vefieren wan de Har, dee aules rejieet, met siene Macht äwa an kjemt. 17Dan woaren de Ägipta sikj fa daut Launt Juda enjsten, un jiedatsmol wan see denkjen aun daut waut de Har, dee aules rejieet, äwa an beschloten haft, woaren see sikj veschrakjen.
18Wan dee Tiet kjemt, woaren en fiew Städa en Ägipten de selwje Sproak jerät woaren aus en Kanaan, un dee woaren sikj aun dän Harn, dee aules rejieet, hoolen. Eent von dee Städa woat Ir Heres, de Sonnen Staut, sennen. #Jes 65,16; Jer 12,16
19Wan dee Tiet kjemt, woat doa medden en Ägipten een Aultoa fa däm Harn stonen, un oppe Jrens woat een Steenmol fa däm Harn sennen. #3Mo 26,1 20Daut woaren Tieekjens un Zeijen sennen en Ägipten fa dän Harn, dee aules rejieet. Un wan de Lied doa woaren dän Harn aunbäden, wan see unjadrekjt woaren, dan woat hee wäm schekjen daut see jeholpen woaren un daut dee an raden woat. 21De Har woat de Ägipta weeten loten wäa hee es, un de Ägipta woaren dan enseenen wäa hee es. Dee woaren am aunbäden, un Brauntopfa un Speisopfa fa am moaken. Dee woaren am äa Vespräakjen jäwen un daut utfieren. #Jes 66,19 22De Har woat de Ägipta bestrofen un dan wada opprechten. Dee woaren sikj no am kjieren, un hee woat no äare Jebäda horchen un an stoakj moaken.
23Wan dee Tiet kjemt, woat doa een gooda Wajch sennen von Ägipten bat Assierien, soo daut de Assiera woaren no Ägipten un de Ägipta no Assierien gonen, un de Ägipta un Assiera woaren toop dän Harn aunbäden. 24Wan dee Tiet kjemt, woat Israel de dredda sennen met Ägipten un Assierien, un een Säajen fa de gaunze Ieed sennen. #(24 un 25) 5Mo 4,20; Reema 15,10 25Un de Har, dee aules rejieet, woat an säajnen un sajen: Ekj jäw die, Ägipten, mien Volkj, un die Assierien, dee ekj jemoakt hab, un die Israel, mien besondret Volkj, mienen Säajen.
Currently Selected:
Jesaja 19: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
