Jesaja 13
13
Woo Babel daut gonen woat
1Dit es waut Jesaja, Amoz sien Sän, groot wort äwa Babel: #Jer 23,33
2Opp eenen kolen Boajch stalt eene Flag opp,
roopt lud un wenjt met de Haunt,
daut see derch de Leidasch äare Puaten gonen.
3Ekj hab dee, dee ekj mie jeheilicht hab
un waut sikj to miene Majestät freien,
oppjeroopt, daut see mienen Oaja utfieren.
4Horcht no daut lude omhäagonen oppe Boaj,
aus wan doa sea väl Menschen sent.
Horcht no daut Jelud von väle Lenda,
von väle Velkja dee doa toopjekomen sent.
De Har, dee aules rejieet,
moakt een Häa reed fa dän Kaumf.
5Dee komen von wiet häa, wieda aus wie vestonen,
un de Har es met an un brukt an
en sienen Oaja, de Ieed to venichten.
6Hielt un schriet!
wiels däm Harn sien Dach es dicht bie;
dee kjemt met een grootet vedoawen
vom däm dee aule Macht haft. #Joel 1,15
7Dan woaren eenem jiedren siene Henj schlaup sennen,
un jiedrem woat sien Moot veschorren;
8dee woaren sikj fa Angst nich Rot weeten,
dee woaren aungonen un benomen sennen,
dee woaren sikj kjremmen aus eene Fru en äare Weedoag.
See gloaren sikj met fiaroode Jesechta aun
un weeten sikj nich Rot.
9Däm Harn sien Dach kjemt grausom,
en sienen Oaja un siene Wutt;
un de Ieed woat venicht woaren,
un de Sinda woaren utjerot woaren.
10De Orion un de aundre Stierns woaren nich mea schienen;
de Sonn woat biem oppgonen kjeen Licht jäwen;
un de Mon woat nich mea schienen. #Hes 32,7; Joel 2,10; Amos 5,8; Mat 24,29
11Ekj woa de Welt bestrofen,
fa aul daut, waut dee veschulcht haft,
un de gottloose fa äare Sinden.
Ekj woa een Enj moaken von dee,
dee driest un huachnäsich Jewault eewen.
12Von Menschen woat daut weinja jäwen aus Golt,
weinja Mana aus Golt von Ofir.
13Aun dän Dach wan ekj mienen Oaja looslot,
woa ekj, de Har, dee aules rejieet,
dän Himmel aum zetren brinjen,
un de Ieed vom Fundament schedren
en miene Wutt.
14Soo aus een Ree oppe Jacht
ooda Schop onen een Hoad
woaren aule äa ieejnet Volkj sieekjen
un no äa ieejnet Launt flichten.
15Wan noch wäa jefungen woat,
dän woaren see stäakjen,
un wäa jejräpen woat,
woat met daut Schwieet omjebrocht.
16See woaren daut seenen,
daut äare kjliene Kjinja dootjeschloagen woaren,
daut äare Hiesa bestolen woaren,
un daut met äare Frues Schaund jedräwen woat. #Psa 137,8-9
17Ekj woa de Meeda jäajen an opphetzen,
dee nich hinjaraun no Selwa sent,
un om Golt nuscht romjäwen.
18Dee woaren de junge Mana met däm Boagen scheeten,
un hoatnakich met Bäbes vehaundlen
un kjeen Metlieden fa Kjinja haben.
19Babel es de schmokste Staut mank de Velkja,
un met dee meenen de Chaldäa sikj väl,
oba Gott woat dee venichten,
soo aus hee Sodom un Gomorra deed, #1Mo 19,24-25
20daut enne komende Tieden doa nienich
wada wäa wonen ooda bliewen woat,
un kjeene Araba äare Zelten doa oppstalen,
ooda Hoads äare Schop doa grosen loten.
21Doa woaren bloos wille Tieren sikj Tus moaken,
un waut von de Jebieda äwablift woat voll Ulen sennen;
de Straussen woaren doa läwen,
un wille Kosen woaren doa sprinjen. #(21 un 22) Jes 34,13
22Wille Hunj woaren en de Paulausten julen,
un Kajotes en de Hiesa, wua see lostich wieren.
Dee Tiet woat boolt hia sennen,
daut woat aul nich lang dieren.
Currently Selected:
Jesaja 13: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
