1. Mose 13
13
Abram un Loot deelen sikj daut Launt en
1Un Abram jinkj trigj von Ägipten, met siene Fru un waut hee aules haud, un uk Loot, no daut Launt em Sieden Kanaan. 2Abram wia sea goot auf. Hee haud väl Vee un Selwa un Golt. 3Hee trock noch wada von daut Launt em Sieden Kanaan, soo wiet aus Betel, wua hee ea siene Zelten oppjestalt haud, tweschen Betel un Ai. 4Doa haud hee ea eenen Aultoa jemoakt. Un doa roopt Abram däm Harn aun. #1Mo 12,8
5Un Loot, dee met Abram wia, haud uk Vee un Schop un Zelten. 6See ieejenden soo väl, daut et too väl fa daut Launt wia, wan see toop bleewen. 7Doa wia emma Zank tweschen Abram siene Vee Hoads un Loot siene Vee Hoads. To dee Tiet wonden de Kanaanita un Perisita em Launt. 8Un Abram säd to Loot: Well wie ons nich tweschen ons zanken; wie sent doch Frintschoft. Un onse Hoads brucken sikj uk nich zanken. 9Hia es je een grootet Launt ver ons. Trakj een Enjskje auf von mie. Wan du nom Nuaden trakjst, trakj ekj nom Sieden. Un wan du nom Sieden trakjst, trakj ekj nom Nuaden. 10Loot kjikjt sikj rom un sach daut daut Jordan Tol gaunz bat Zoar goot Wota haud un aules soo leet aus däm Harn sien Goaden ooda daut Launt Ägipten. Dit wia ea de Har Sodom un Gomorra venicht haud. #1Mo 2,8-10 11Soo kjeem daut, daut Loot sikj daut Jordan Tol wäld. Hee trock dan met aules nom Oosten. Un soo trocken hee un Abram eena vom aundren. 12Abram wond dan en daut Launt Kanaan, wiels Loot mank de Städa em Tol wond. Hee neem sien Zelt uk noch soo wiet aus Sodom. 13De Mana en Sodom fieeden een schlajchtet Läwen. See eewden growe Sinden ver däm Harn. #1Mo 18,20; 19,4-9
14No däm daut Loot von am wia wieda jetrocken, säd de Har to Abram: Kjikj die emol goot om, nom Nuaden, Sieden, Oosten un Wasten. 15Aul daut Launt waut du seenen kaust woa ekj die un diene Nokomen jäwen, opp emma. #1Mo 12,7 16Ekj woa diene Nokomen soo väl aus dän Stoff oppe Ieed moaken. Wan wäa daut Stoff oppe Ieed talen kaun, dan woaren see diene Nokomen uk talen kjennen. #1Mo 28,14; 4Mo 23,10; 1Kjen 4,20 17Nu go derch daut Launt von eene Sied bat de aundre, un von een Enj bat daut aundre. Ekj woa die daut jäwen. 18Dan neem Abram siene Zelten un trock no de Ieekjenbeem bie Mamre, dicht bie Hebron. Doa bud hee eenen Aultoa fa däm Harn. #1Mo 14,13.24
Currently Selected:
1. Mose 13: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.