1. Mose 12
12
Gott roopt Abram
1De Har säd to Abram: Velot dien Launt, diene Lied, un dien Voda sien Hus un go no een Launt daut ekj die wiesen woa. #4Mo 23,9; Apost 7,3; Heb 11,8 2Ekj woa von die een grootet Volkj moaken, un ekj woa die säajnen. Ekj woa dien Nomen wiet bekaunt moaken, un du woascht een Säajen sennen. #1Mo 24,1.35; Psa 72,17 3Ekj woa dee säajnen dee die säajnen, un ekj woa eenen Fluch opp dee brinjen, dee eenen Fluch opp die brinjen, un derch die woaren aule Velkja oppe Ieed jesäajent. #1Mo 18,18; 22,18; 26,4; 28,14; 2Mo 23,22; Apost 3,25; Gal 3,8
4Soo muak Abram sikj oppem Wajch, krakjt soo aus de Har am jesajcht haud, un Loot trock met am. Abram wia 75 Joa oolt aus hee Haran veleet. 5Abram neem Sarai, siene Fru, un Loot, sien Brooda sien Sän, un waut see dan noch hauden toop jesaumelt, un uk de Deena dee hee en Haran jekjräajen haud, un jinkj no Kanaan opptoo. En Kanaan 6jinkj hee derch daut Launt un kjeem no Sichem, no däm grooten Boom More. To dee Tiet wieren de Kanaanita noch em Launt. #1Mo 35,4; Jos 24,25-26 7Dan kjeem de Har no Abram un säd: Ekj woa diene Nokomen dit Launt jäwen. Dan bud Abram doa eenen Aultoa fa däm Harn, dee no am jekomen wia. #1Mo 13,15; 15,18; 17,8; 35,12; 2Mo 6,4.8; 32,13; Jos 21,43; Apost 7,5 8Von doa jinkj hee en de Boaj nenn, oosten von Betel. Hee stald siene Zelten doa opp, met Betel nom Wasten un Ai nom Oosten. Abram bud doa eenen Aultoa fa däm Harn un roopt am doa aun. #1Mo 4,26 9Abram trock emma wieda en daut Launt em Sieden nenn.
Abram un Sara äare Reis no Ägipten
10Nu wia doa eene schlemme Hungaschnoot em Launt, daut Abram opp een stootje doawäajen no Ägipten jinkj. 11Aus see dan bat Ägipten kjeemen, säd Abram to siene Fru, Sarai: Du best soone schmocke Fru, 12daut wan de Ägipta die seenen, woaren see sajen: Dit es siene Fru, un see woaren mie doot moaken un die läwen loten. 13Saj an daut du miene Sesta best. Dan woat daut nich soo schlemm fa mie sennen, un see woaren mie nich wäajen die doot moaken.
14Dan aus Abram en Ägipten nenn trock, sagen de Ägipta daut siene Fru sea schmock leet. 15Aus däm Kjennich siene Volkjsleidasch ar sagen, lowden see ar ver am. Dan wort see en däm Kjennich sien Hus jebrocht, 16un om äat haulwen jeef de Kjennich Abram Schop, Rinda, Äsels, Deena, un Kameelen. 17De Har, oba, brocht schlemme Krankheiten en däm Kjennich sien Hus nenn wäajen Sarai, Abram siene Fru.
18Dan roopt de Kjennich Abram un säd: Waut hast du mie hia jedonen? Wuarom sätst du mie nich daut see diene Fru wia? 19Wuarom sätst du mie: See es miene Sesta? Un äwa däm hab ekj ar aus Fru jenomen. Hia es diene Fru. Nemm ar un go wieda. 20Un de Kjennich schekjt waut Mana daut see am, met siene Fru un aules waut hee haud, ut daut Launt rut brochten.
Currently Selected:
1. Mose 12: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.