YouVersion Logo
Search Icon

1. Mose 11

11
Menschen erhäwen sikj jäajen Gott
1To eene Tiet hauden see oppe gaunze Ieed bloos eene Sproak un aula de selwje Wieed. 2Un aus de Menschen vom Oosten wieda trocken, kjeemen see no eene groote Stap en de Jäajent von Schinar. Doa siedelden see aun. 3Un see säden to eenaunda: Nu emol aun de Oabeit! Well wie ons Tieejlen moaken un dee goot hoat brennen. See hauden dan Tieejlen fa Steena un Pekj fa Zement. 4Un see säden: Nu emol aun de Oabeit! Well wie ons eene Staut buen, un eenen Torm dee bat aum Himmel rieekjt. Well wie ons eenen Nomen moaken, daut wie nich oppe gaunze Ieed vestreit woaren. 5Un de Har kjeem rauf un besach sikj de Staut un dän Torm, dän de Menschen sikj buden. #1Mo 18,21; Psa 14,2 6Un de Har säd: Nu kjikj. Daut es aules een Volkj un dee räden aula eene Sproak. Dit es noch mau de Aunfank von daut waut see doonen woaren. Boolt woaren see aules doonen kjennen waut an biefelt. #(6-9) Apost 2,1-11 7Well wie emol rauf gonen un an de Sproak vestieren, soo daut see nich eena dän aundren vestonen kjennen. 8Un soo vestreid de Har an äwa de gaunze Ieed, un see hieeden opp met de Staut buen. #5Mo 32,8; Luk 1,51 9De Staut wort Babel jenant, wiels de Har an doa äare Sproak vestieed. Un von doa vestreid de Har an äwa de gaunze Ieed.
Een Menschen Rejista bat Abraham
(1Chr 1,24-27)
10Dit sent Sem siene Nokomen. Aus Sem 100 Joa oolt wia, haud hee eenen Sän, Arpachschad. Daut wia twee Joa no de Äwaschwamunk. #(10-26) 1Chr 1,24-27; 1Mo 10,21-22; Luk 3,34-36 11Von dan aus Arpachschad jebuaren wia, läwd Sem noch 500 Joa, un haud noch mea Kjinja. 12Aus Arpachschad 35 Joa oolt wia, haud hee eenen Sän, Schelach. 13Arpachschad läwd noch 403 Joa von dan aus Schelach jebuaren wia, un haud noch mea Kjinja. 14Aus Schelach 30 Joa oolt wia, haud hee eenen Sän, Eber. 15Un Schelach läwd noch 403 Joa no däm daut Eber jebuaren wia, un haud noch mea Kjinja. 16Aus Eber 34 Joa oolt wia, haud hee dän Sän, Peleg. 17Un Eber läwd noch 430 Joa no däm daut Peleg jebuaren wia, un haud noch mea Kjinja. 18Aus Peleg 30 Joa oolt wia, haud hee eenen Sän, Regu. 19Un Peleg läwd noch 209 Joa no däm daut Regu jebuaren wia, un haud noch mea Kjinja. 20Aus Regu 32 Joa oolt wia, haud hee eenen Sän, Serug. 21Un Regu läwd noch 207 Joa no däm daut Serug jebuaren wia, un haud noch mea Kjinja. 22Aus Serug 30 Joa oolt wia, haud hee eenen Sän, Nahor. 23Un Serug läwd noch 200 Joa no däm daut Nahor jebuaren wia, un haud noch mea Kjinja. 24Aus Nahor 29 Joa oolt wia, haud hee eenen Sän, Terach. 25Un Nahor läwd noch 119 Joa no däm daut Terach jebuaren wia, un haud noch mea Kjinja. 26Aus Terach 70 Joa oolt wia, haud hee de Säns, Abram, Nahor un Haran.
27Dit sent Terach siene Nokomen. Terach haud dree Junges. Daut wieren Abram, Nahor, un Haran. Un Haran wia Loot sien Voda. 28Haran storf ver sien Voda Terach storf, un storf en daut Launt wua hee jebuaren wia, en Ur mank de Chaldäa. 29Abram un Nahor befrieden sikj. Abram siene Fru heet Sarai, un Nahor siene Fru heet Milka. Milka un Jiska äa Voda wia Haran. #1Mo 22,20 30Sarai kunn kjeene Kjinja haben.
31Un Terach läd loos von Ur mank de Chaldäa, om no Kanaan to trakjen. Hee neem sienen Sän, Abram, met sikj, un uk sienen Grootsän, Loot, Haran sien Sän, un siene Schwieedochta, Sarai, dee Abram siene Fru wia. Oba aus see bat de Staut Haran kjeemen, bleewen see doa. #Jos 24,2; Neh 9,7 32Terach storf en Haran aus hee 205 Joa oolt wia.

Currently Selected:

1. Mose 11: PB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy