Hesekiel 40

De Profeet kaun Jerusalem seenen

1Dan kjeem daut emol, daut wia krakjt aum 10. Dach von de 1. Moonat, en daut 25. Joa, daut wie faustjenomen wieren un uk daut 14. Joa von dan aus de Staut enjenomen wort, daut däm Harn siene Krauft en mie kjeem un ekj no Jerusalem jenomen wort. #Hes 1,3 2Ekj wort en eene Openboarunk von Gott no daut Launt Israel jebrocht un opp eenen sea huagen Boajch nopp jestalt. Un doa ver mie, nom Sieden han, sach ekj waut jebudet, soo aus eene Staut. #Sach 14,10 3Oba nu horch. Aus hee mie doahan jebrocht haud, wia doa een Mensch. De Mensch leet no jeräwnet Brons, un hee haud eenen lienzeichnen Baunt un een Motstock enne Haunt. Hee stunt doa bie een Puat, #Hes 47,3; Sach 2,5; Opb 21,15 4un hee säd to mie: Menschensän, paus sea opp; kjikj waut ekj doo, un horch no waut ekj saj. Bemieej die aules to behoolen waut ekj die wies, wiels du best doatoo häajekomen, daut ekj die dit wiesen kaun, un du daut Volkj Israel daut weeten latst.

5Doa wia eene Mia runtom däm Tempelhoff. De Mia wia soo dikj aus sien Motstock lank wia, un uk soo huach aus sien Motstock lank wia. De Motstock, dän de Mensch enne Haunt haud, wia sas Ellen lank. Dit wieren Ellen dee eene Hauntbreet lenja sent aus de jeweenelje Ellen. #1Kjen 6,1-38; Hes 40,5—42,20

6Dan jinkj hee no daut Puat, waut aun de oostne Sied wia, un jinkj opp de Stoopen nopp. Un hee maut de Schwal von daut Puat, un dee wia een Motstock breet. 7Dan wieren doa Stowen aun de Sied. Dee wieren emma een Motstock breet un een Motstock nenn. De Wenj tweschen de Stowen wieren 5 Ellen breet. Un de Schwal, wua daut dan nenn jinkj, wia uk een Motstock breet. 8Un hee maut de Väastow em Puat, 9un dee wia acht Ellen, un dee groota Post twee Ellen. Un de Väastow vom Puat wia opp daut Enj wua de Tempel wia. 10Un en daut Puat wieren aun jieda Sied dree Stofkjes, aula jlikje breet, un de Past aula jlikje breet. 11Un hee maut woo breet de Gank em Puat wia, un daut wieren tieen Ellen. Un de Gank wia 13 Ellen lank. 12Aun de väaschte Kaunt von de Stofkjes, aun beid Sieden vom Gank, wia eene läaje Waunt, eene El huach. Dee Stofkjes wieren sas Ellen deep. 13Un hee maut daut Puat von de hinjaschte Waunt von een Stofkje bat de hinjaschte Waunt aun daut Stofkje äwarem Gank, un daut wieren 25 Ellen. De Däaren wieren jäajenäwa von eenaunda. 14Un hee maut de Däa von de Väastow un daut wieren 20 Ellen. Biesied daut Puat rieekjt de Väahoff bat aun dän grooten Post. 15Von wua eena von buten em Puat nenn kjeem bat aun de Väastow aun de benna Kaunt vom Puat, wieren 50 Ellen. 16De Stofkjes un de Väastow hauden Fenstren opp däm Hoff nopp aun beid Sieden von daut Puat. Un aun de Past wieren Paulmbläda jeschnizt.

17Un hee brocht mie en däm Väahoff nenn. Un doa wieren 30 Stowen aun de butakaunt, runtom dän Hoff, un doa wieren uk runtom plaute Steena jelajcht ver de Stowen. 18De plaute Steena wieren uk bat aun jieda Puat un uk biesied jieda Puat jelajcht. Dit wia de läajra Steena Stich. 19Un hee maut woo breet de Väahoff wia, von daut Puat aun de Butawaunt bat aun daut Puat no däm Bennahoff, un daut wieren 100 Ellen. Un bie daut nuadne Puat wia daut krakjt soo.

20Hee maut daut Puat daut aun de nuadne Sied wia un von buten em Väahoff jinkj. Hee maut woo lank un woo breet daut wia. 21Un daut haud krakjt soo, emma dree Stofkjes aun jieda Sied un de Past, un de Väastow, un aules wia krakjt soo groot aus bie daut ieeschte Puat. Daut gaunze Puat wia 50 Ellen lank un 25 Ellen breet. 22Un de Fenstren un de Väastow, un uk de Paulmbläda, wieren aula krakjt soo aus daut Puat aun de oostne Sied. Daut haud säwen Stoopen, dee eena nopp gonen must, un haud uk de Väastow aun de benna Kaunt. 23Un jäajenäwa von dit nuadne Puat wia een Puat en dän Bennahoff nenn, krakjt soo aus aun de oostne Sied. Un hee maut woo wiet daut von daut eene Puat bat daut aundre wieren, un daut wieren 100 Ellen.

24Un no daut, brocht hee mie no de siedne Kaunt vom Hoff, un doa wia uk een Puat. Un hee maut daut Puat, de Väastow un bat däm Post, un daut wia krakjt soo aus bie de aundre Puaten. 25Un doa wieren runtom Fenstren un uk en de Väastow, krakjt soo aus bie de aundre. Un daut Puat wia 50 Ellen lank un 25 Ellen breet. 26Un doa wieren säwen Stoopen, dee eena must nopp gonen, un doa wia eene Väastow aun de benna Kaunt, un doa wieren uk Paulmbläda aun de Past aun jieda Sied nenjeschnizt. 27Un doa wia uk een Puat en däm Bennahoff nenn von de siedne Sied. Un hee maut woo wiet daut wia von daut butaschte siedne Puat bat daut bennaschte siedne Puat, un daut wieren 100 Ellen.

28Un hee brocht mie vom Sieden derch daut Puat em Bennahoff nenn. Un hee maut daut Puat, un daut haud krakjt de Mot aus de aundre Puaten. 29Un daut haud krakjt soo de Stofkjes, de Past, de Väastow aules krakjt soo groot, un uk de Fenstren enne Wenj un runtom de Väastow. Un daut Puat wia 50 Ellen lank un 25 Ellen breet. 30Un de aundre Puaten wieren uk 50 Ellen lank un 25 Ellen breet. 31Oba hia wieren de Väastowen en de Puaten aun daut Enj waut em Väahoff jinkj, un doa wieren Paulmbläda en de Past jeschnizt. En de Puaten nom Bennahoff wieren acht Stoopen.

32Un hee brocht mie em Bennahoff no de oostne Sied no daut Puat. Un hee maut daut Puat un daut wia krakjt soo groot aus de aundre. 33Daut haud de Stofkjes un de Past un Väastow aula krakjt soo groot, un uk de Fenstren en de Wenj un runtom de Väastow. Un daut Puat wia 50 Ellen lank un 25 Ellen breet. 34Un de Väastow wia aun de Sied wua de Väahoff wia, un doa wieren Paulmbläda aun beid Sieden jeschnizt un doa wieren acht Stoopen, dee eena must nopp gonen.

35No daut brocht hee mie no daut nuadne Puat un hee maut daut, un daut wia krakjt soo groot aus de aundre. 36Daut haud krakjt soone Stofkjes un Past un Väastow un de Fenstren runtom. Un daut wia 50 Ellen lank un 25 Ellen breet. 37Un de Väastow wia nom Väahoff opptoo, un de Paulmbläda wieren en de Past jeschnizt aun beid Sieden. Un doa wieren acht Stoopen nopp to gonen.

38Derch eene Däa en de Väastow von daut Puat jinkj eena en eene Stow nenn, wua daut Brauntopfa jewoschen wort. 39Un en de Väastow vom Puat wieren aun beid Sieden twee Schlachtdeschen, wua daut Brauntopfa, daut Sindopfa un daut Schultopfa jeschlacht wort. 40Un buta de Väastow, dicht bie de Stoopen, waut en daut nuadne Puat nengonen, wieren aun beid Sieden twee Deschen. 41Daut meent doa wieren 4 Schlachtdeschen aun jieda Sied, un 8 Schlachtdeschen aules toop en dit Puat, opp dee de Opfa jeschlacht worden. 42De vea Schlachtdeschen, waut fa daut Brauntopfa sent, wieren von behakte Steena jemoakt, emma aundathaulw Ellen lank un aundathaulw Ellen breet un eene El huach. Un daut Fleesch wort opp de Deschen jelajcht. 43Un doa wieren runtom Hoakes aunjebrocht, dee eene Hauntbreet lank wieren. Un daut Fleesch wort opp dee Deschen jelajcht.

44Un doa wieren twee Stowen biesied däm Bennahoff. De Stow biesied daut nuadne Puat wia nom Sieden han op, un de Stow aun de siedne Kaunt wia nom Nuaden han op. 45Un hee säd: De Stow dee nom Sieden op es, es fa de Priestasch, waut em Heilichtum deenen, 46un de Stow dee nom Nuaden op es, es fa de Zadoksche Priesta, dee aum Aultoa deenen. Dit sent de eensje Leviten, waut derwen ver däm Harn komen om am to deenen. #1Kjen 1,8.39; 1Chr 5,34-41; Hes 43,19; 44,15; 48,11

47Un hee maut dän Väahoff, un dee stunt em veakaunt, 100 Ellen lank un 100 Ellen breet. Un de Aultoa stunt ver däm Tempel. #Hes 43,13

48Un hee brocht mie en de Väastow vom Tempel un hee maut doa de Past. Dee wieren 5 Ellen aun jieda Sied. Un daut Puat wia 14 Ellen, un de Mieren aun jieda Sied von daut Puat wieren 3 Ellen. 49De Väastow wia 20 Ellen breet un 12 Ellen dän aundren Wajch. Dee Stow haud eene Trap von 10 Stoopen dee nopp jinjen. Un aun jieda Sied, biesied de Däarenjerechta, stunt een Post. #1Kjen 7,21

Currently Selected:

Hesekiel 40: PB

Highlight

Copy

Compare