Hesekiel 39

Gog woat bestroft un begroft

1Un du, Menschensän, profezei wäajen Gog un saj: Dit es waut Gott de Har sajcht: Horch emol Gog. Ekj woa noch met die veräakjnen, dee du de Volkjsleida best von de Meschech un Tubal Velkja. #Hes 38,2 2Ekj woa die romdreien un leiden un von em wietsten Nuaden häabrinjen jäajen de Boaj en Israel. 3Un ekj woa die dän Boagen ut de linkje Haunt schlonen, un de Feilen ut diene rajchte Haunt. 4Un du un dien gaunzet Häad Kjrieja un aul diene Menschen woaren opp de Boaj en Israel tofaul komen. Un ekj woa de wille Tieren un aul de Väajel waut Os fräten loten die oppfräten. 5Du woascht oppe opne Stap hanfaulen, wiels ekj daut jesajcht hab, sajcht Gott de Har. 6Ekj woa een Fia opp Magog un aul dee, dee ruich en daut Launt biem Mäa wonen, faulen loten; un see woaren enseenen, daut ekj de Har sie. 7Un ekj woa mienen heiljen Nomen bekaunt jäwen mank mien Volkj, de Israeliten, un woa mienen heiljen Nomen nich wada loten toschaund woaren. Un de Velkja woaren enseenen, daut ekj de Har sie, un daut ekj de Heilja en Israel sie. 8Horcht mau. Dis Dach kjemt, un dee woat romkomen, sajcht Gott de Har. Dit es de Dach von däm ekj jerät hab.

9Dan woaren de Lied von en de israelitische Städa rutgonen un de Jewäaren vebrennen. See woaren de groote un de kjliene Schilten, un de Boages un de Feilen, un de Kjneppels un Spiessen vebrennen. Daut woat säwen Joa dieren bat see aules vebrent haben. #Jes 9,4 10See woaren daut nich needich haben daut see Holt oppe Stap holen, ooda daut see Beem em Woolt dolhacken. See woaren von de Jewäaren Fia moaken. See woaren dee bestälen, dee an bestolen haben, un von dee plindren, dee an beplindat haben, sajcht Gott de Har. #Jer 30,16

11Un wan dee Dach ieescht kjemt, dan woa ekj Gog en Israel en daut Tol begrowen loten, wua dee waut opp Reisen sent derchfoaren, oosten vom Mäa. Un daut woat dän Wajch fa dee waut opp Reisen sent toostalen. Daut es wua Gog un aul siene Menschen woaren begroft woaren. Un see woaren daut “Daut Tol von Gog sien Häa” nanen. 12Daut woat de Israeliten säwen Moonat nämen aul de Doodes to begrowen, un äa Launt von dee rein moaken. 13Aule Menschen em Launt woaren doaraun schaufen, dee to begrowen; un see woaren eene Aunerkjanunk aun dän Dach kjrieen, wan ekj bewiesen woa, daut ekj harlich sie, sajcht Gott de Har. 14Un see woaren Mana aunstalen, daut dee emma wada derch daut Launt gonen toom de Doodes begrowen, dee noch opp daut Launt jebläwen sent. No säwen Moonat woaren see dise Mana aunstalen. 15Un wan see em Launt romgonen un noch wada Knoakes von Menschen finjen, woaren see doa een Tieekjen oppstalen, bat dee, dee dee begrowen motten, dee uk en “Daut Tol von Gog sien Häa” begrowen. 16Un doa woat eene Staut sennen, dee “De Staut vom Häa” jenant woat. Un soo woaren see daut Launt rein moaken.

17Un Menschensän, dit es waut Gott de Har sajcht: Roop emol de Väajel, un aules waut flicht, un uk aule wille Tieren oppe opne Stap, un saj to an: Jie sellen komen un junt saumlen. Jie sellen von aule Rechtungen komen to mien Opfamol, daut ekj fa junt schlacht. Daut woat een grootet Opfamol sennen opp de Boaj en Israel, un jie sellen Fleesch fräten un Bloot drinkjen. #Opb 19,17-18 18Jie woaren Fleesch von stoakje Soldoten fräten un Bloot drinkjen von dee waut Leidasch oppe Ieed wieren. Doa woa jie von Bakj un Lama, von Kosen un Bolles fräten. Un daut es aula soont aus Mastvee von Baschan. 19Bie daut Opfamol, waut ekj junt doa schlacht, woa jie junt fat äten bat jie voll sent, un Bloot drinkjen bat jie bedrunken sent. 20Jie woaren junt aun mienen Desch voll fräten von Pieed un Rittasch, von stoakje Kjrichsmana un aul de Soldoten, sajcht Gott de Har.

Israel woat wieda läwen

21Ekj woa aule Velkja wiesen woo harlich ekj sie, wan ekj daut enfia waut rajcht es, un miene Krauft opp an uteew. 22Un de Israeliten woaren von dän Dach aun un wiedahans enseenen daut ekj, de Har, äa Gott sie. 23Un de Velkja woaren weeten, daut de Israeliten wäajen äare Sinden worden en de Jefangenschoft jefieet. Daut wia wäajen see soo onveschämt ver mie häajinjen, daut ekj mien Jesecht von an wajchdreid, un an enne Macht von äare Fiend jeef, dee an ombrochten. #Jes 54,8 24Aus ekj mien Jesecht von an wajch dreid, jeef ekj an waut see met äa orreinet Läwen un äare Sinden vedeent haben.

25Un doawäajen sajcht Gott de Har: Nu woa ekj Jakob sien wiedakomen wada säajnen. Ekj woa mie om aul de Israeliten kjemren un doaropp stonen bliewen, daut mien Nomen heilich blift. #Hes 16,53-63 26See woaren äare Schaund un aul daut, en waut see mie sent ontru jewast, vejäten, wan see ieescht ruich en äa Launt wonen, un doa kjeena es, fa däm see sikj enjsten. 27Ekj woa an von mank de Velkja trigj brinjen, un an von de Lenda, dee an fientlich sent, toopsaumlen. Ekj woa mie aun an ver väle Velkja wiesen, daut ekj heilich sie, 28un see woaren enseenen, daut ekj, de Har, äa Gott sie. Doarenn daut ekj an mank de Velkja schekjt un wada oppsaumeld, un nich eenen trigj leet, woaren see enseenen daut ekj de Har äa Gott sie. 29Un ekj woa mien Jesecht nich wada von an wajch dreien, wan ekj mien Jeist opp daut Volkj Israel utjeet, sajcht Gott de Har. #Hes 36,26-27; Joel 3,1

Currently Selected:

Hesekiel 39: PB

Highlight

Copy

Compare