Hesekiel 38

Äwa Gog un Magog

1Un mie wort kloa, waut de Har to sajen haud. Hee säd: 2Menschensän, recht die no Gog opptoo, en daut Launt Magog, dee de väaschta Leida von de Meschech un Tubal Velkja es. Un profezei wäajen am #1Mo 10,2; Hes 27,13; 32,26; 39,6 3un saj: Dit es waut Gott de Har sajcht: Horch emol, ekj woa noch met die veräakjnen, Gog, wan du uk de jratsta Leida von de Meschech un Tubal Velkja best. 4Horch emol, ekj woa die romdreien un woa een Hoaken en dien Mul saten, un die met diene gaunze Armee, aul de Pieed un Mana un äa goodet Jereetschoft, wajch schlapen. Daut es een grootet Häa, een jiedra met een Schilt un Schwieet. 5Du hast Mana von Persien, von Kusch, un von Libien, un jieda eena drajcht een Schilt un eenen Kjrichshoot. 6Dan hast du uk noch de gaunze Armee von Gomer un von daut Togarma Volkj, daut noch wieda em Nuaden es. Du hast eene groote Armee un väl Volkj unja die. #Hes 27,14 7Roop diene Mana un moak die met aul diene Häaden, dee rom die sent, reed. Paus goot opp no dee. 8No een langet stoot, daut es noch lang han, woa jie jeroopt woaren, jäajen een Launt daut sikj no Kjrichstieden veholt haft. Daut es een Volkj, daut von mank väle Velkja toop jebrocht es worden, un dan opp de israelitische Boaj wont. De Städa en de Boaj wieren lang vedorwen, oba nu es daut Volkj rut jefieet von mank de Velkja, wua see vestreit wieren, un wonen aula onen jestieet. 9Jie woaren verwoats gonen un oppkomen aus een Jewittastorm. Jie un june gaunze Armee un aul de Velkja, dee met junt sent, woaren soo sennen aus eene Wolkj, dee daut Launt bedakjt.

10Dit es waut Gott de Har sajcht: Aun dän Dach woascht du die waut utdenkjen, un du woascht eenen beesen Plon moaken 11un die selfst sajen: “Ekj woa jäajen daut Launt, wua kjeene Mieren rom de Darpa sent, gonen. Ekj woa äwa dee komen, dee stell un onvestieet läwen. De Städa stonen aula onen Wenj un haben kjeene Puaten ooda Stangen toom aufwäaren.” 12Jie woaren de Darpa, dee emol vedorwne Ruinen wieren, oba nu wada bewont sent, beplindren un bestälen. Dit es jäajen daut Volkj, daut von mank de Velkja trigj toopjesaumelt es, un sikj Vee un veschiednet aunjegonen haben, un wonen medden mank de Menschen oppe Ieed. #Rech 9,37 13Saba, Dedan un de Haundels Mana von Tarsis met aul äare Mana, utjelieet toom Kjrich, woaren sajen: Best du jekomen om ons to bestälen, un hast du aul dien Häa toop jeroopt toom beplindren? Woascht du Selwa un Golt wajchnämen, un Vee un aundre Sachen saumlen, om die eenen grooten Jewenst to moaken?

14Doawäajen profezei, Menschensän, un saj to Gog: Dit es waut Gott de Har sajcht: Es daut nich soo, daut du die woascht aunräajen aun dän Dach wan Israel, mien Volkj, onjestieet wont? 15Un du, un dee Velkja met die, woaren von june Städ em wietsten Nuaden oppkomen. Jie woaren opp Pieed rieden, un een grootet Häa un eene stoakje Armee sennen. 16Du woascht jäajen mien Volkj Israel komen aus eene Wolkj, dee daut gaunze Launt bedakjt. Ekj woa die loten äwa mien Launt komen, daut ekj ver aule Velkja aun die, Gog, wiesen kaun, waut daut meent, daut ekj heilich sie. Dit woat noch emol een Dach passieren, soo daut aule Velkja weeten woaren, wäa ekj sie. 17Dit es waut Gott de Har sajcht: Du best doch dee von wäm de Profeeten en Israel, dee mie deenden, aul lang jeprofezeit haben, daut du äwa Israel komen wurscht. #(17 un 18) Zef 3,8

18Un wan daut ieescht soo romkjemt, daut Gog jäajen Israel kjemt, woat miene Wutt stieen, sajcht Gott de Har. 19Ekj woa daut nich vedroagen kjennen un mie oajren, un doawäajen saj ekj: Doa woat onbedinjt en dee Tiet een grootet Ieedbäben em Launt en Israel sennen, 20un jieda Fesch em Wota un jieda Voagel enne Loft, aule Tieren oppe wiede Stap un aules waut sikj opp daut Launt bewäacht ooda kjript, un aule Menschen oppe gaunze Ieed woaren sikj schudren wan ekj kom. Un de Boaj woaren doljeräten woaren, un jieda Eewa un jieda Mia woat faulen. 21Ekj woa daut Schwieet äwadäl roopen von aulawäajen opp miene Boaj, sajcht Gott de Har. Un Gog siene Mana woaren sikj eena dän aundren aufschaufen. #(21-23) Opb 20,8-9 22Ekj woa väl Menschen loten krank woaren un vom Schwieet stoawen, un woa schlemmen Plauzräajen un Hoagel un Fia un Schwäwelblitt opp am un sien Häa schmieten, un opp de väle Velkja waut met am sent. 23Soo woa ekj wiesen, daut ekj harlich un heilich sie, un woa ver väl Velkja wiesen, wäa ekj sie, un see woaren enseenen, daut ekj de Har sie.

Currently Selected:

Hesekiel 38: PB

Highlight

Copy

Compare