YouVersion Logo
Search Icon

2. Mose 15

15
Daut Dankleet von de jerade
1Aus dit aula wort, sungen Moses un de Israeliten dit Leet fa däm Harn:
Ekj woa vom Harn sinjen;
hee haft waut groosoatjet jedonen;
hee haft Pieed un Ritta em Mäa jeschmäten. #Opb 15,3
2Met däm Harn sie ekj stoakj,
wäajen däm Harn sinj ekj,
de Har haft mie jerat.
Hee es mien Gott, un am well ekj preisen.
Hee es mien Voda sien Gott;
ekj woa am huach achten. #Psa 118,14; Jes 12,2
3De Har es een Kjrieja, sien Nomen es Har. #2Mo 3,15; 14,14; Psa 46,10
4Däm Kjennich siene Kjrichswoages un Armee
haft hee em Mäa jeschmäten,
siene huach aunjestalde vesoopen em Schelpmäa.
5Deepet Wota rand äwa an äwa,
un see vesunken aus Steena.
6Diene rajchte Haunt, Har, es groosoatich stoakj;
met diene rajchte Haunt, Har, drekjst du dän Fient dol.
7En diene groosoatje Majestät schmeetst du dee,
waut jäajen die wieren, dol;
aus du dienen Oaja loos leetst, veweschst du dän Fient,
soo aus Fia daut Stoppel vewescht.
8Met eenen Puff ut diene Näs, klompst du daut Wota opp,
un dan stunt daut aus eene Waunt;
daut deepe Mäa wia jeronnen. #Jes 51,10
9De Fient pucht noch:
Ekj woa de Israeliten hinjaraun joagen un enholen,
ekj woa mie äare wieetvolle Sachen toodeelen;
ekj woa mie aun an volfräten;
ekj woa an met mien Schwieet venichten.
10Du deetst met dien Odem blosen,
un dan bedakjt an daut Mäa;
dee vesunken aus Blie en een deepet Wota.
11Woona von de Jetta es soo aus du, Har?
Wäm siene heilje Städ es soo groosoatich;
wäa es soo harlich un soo to bewundren?
Wäa deit soone Wunda? #2Mo 8,6; 18,11; Psa 86,8
12Du strakjst diene Haunt ut,
un doamet veschlukt de Ieed an.
13Met truhoatje Leew leitst du daut Volkj,
woont du friejemoakt hast;
met diene Krauft wiests du an no dien heiljet Tus.
14De Lenda haben jehieet, un de Filista fercht daut; #Jos 2,9-11
15De Volkjsleida en Edom schudat daut;
de Leidasch en Moab sent met Forcht benomen;
de Kanaanita vejinkj de Moot.
16Groote Forcht woat opp an komen.
See woaren onverieet aus een Steen sennen,
wäajen diene groote Krauft, Har,
bat daut Volkj woont du jerat hast,
gaunz vebie gonen kaun.
17Du brinjst an gaunz bat opp däm Boajch,
dee dien Oafgoot es, un plaunst an.
Daut es de Städ, Har,
wua du wonen woascht,
daut Heilichtum, Har,
daut du met diene Henj jebut hast. #Psa 78,54
18De Har woat von emma bat opp emma rejieren! #Psa 93,1
19Aus däm Kjennich siene Pieed un Woages un Ritta em Mäa nenn jinjen, dan brocht de Har daut gaunze Mäa trigj äwa an. Oba de Israeliten jinjen derch daut Mäa, opp drieejen Boddem. #2Mo 14,22-29 20Dan neem Mirjam, de Profeetin, dee Aaron siene Sesta wia, eene Drommel enne Haunt. Un aule Frulied jinjen ar hinjaraun met äare Drommeln un äaren Daunz. #Psa 68,26 21Un Mirjam funk aun to sinjen:
Well wie vom Harn sinjen;
Hee haft waut groosoatjet jedonen;
Hee haft Pieed un Ritta em Mäa jeschmäten.
Gott jeft an scheenet Wota
22Moses leid de Israeliten vom Schelpmäa no de Schur Wiltnis. See reisden dree Doag enne Wiltnis onen daut see wua Wota fungen. #1Mo 20,1 23Aus see dan no eene Städ kjeemen, kunnen see daut Wota, waut doa wia, nich drinkjen, wiels daut soo betta wia. See nanden de Städ Mara, wiels daut Wota soo betta wia. 24Daut Volkj grumsaujd to Moses: Waut sell wie drinkjen? #2Mo 16,2
25Un Moses roopt däm Harn aun un de Har wees am een Stekj Holt, woont Moses dan em Wota nenn schmeet. Un daut Wota wort scheenet Wota. #1Mo 22,1
De Har jeef an doa eene Ordnunk un een Jesaz un hee proowd an auf. 26Hee säd: Wan jie no däm Harn junen Gott krakjt horchen woaren, un daut doonen woaren, waut hee von junt velangt, un jie junt bemieejen woaren, daut to hoolen, waut hee junt väasajcht, dan woaren de Krankheiten, dee ekj äwa de Ägipta brocht, nich opp junt komen. Ekj sie de Har. Ekj sie dee, dee junt jesunt moakt. #1Mo 20,17; 5Mo 7,15; 32,39; Psa 30,3; Jes 57,18
27Dan kjeemen see no Elim. Doa wieren twalw Kjwalen un 70 Paulmbeem. Un see loagaden sikj doa wua daut Wota wia.

Currently Selected:

2. Mose 15: PB

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy