2. Mose 14
14
Derch daut Mäa
1De Har säd to Moses: 2Saj de Israeliten see sellen bie Piehahirot, tweschen Migdol un daut Mäa, aunhoolen un sikj doa loagren. Jäajenäwa von Baal Zefon bie daut Mäa, sellen see daut Loaga oppschlonen. 3Dan woat de Kjennich denkjen, daut de Israeliten sikj enne Wiltnis faustjegonen haben. 4Un ekj woa däm Kjennich eene hoade Enstalunk jäwen, un hee woat junt hinjaraun joagen. Oba ekj woa mie derch däm Kjennich un siene gaunze Armee veharlichen, soo daut de Ägipta daut woat kloa woaren, daut ekj de Har sie. Un see deeden daut soo. #2Mo 4,21; Hes 28,22 5Aus däm ägiptischen Kjennich daut jesajcht wort, daut daut Volkj utjewaundat wia, dochten de Kjennich un siene Rejierungs Mana sikj daut noch emol no, un säden: Waut hab wie jedonen, daut wie de Israeliten haben gonen loten? Nu sent onse Oabeida wajch! 6Doamet leet hee sienen Kjrichswoagen reed moaken, un roopt siene Armee opp. 7Ieeschtens neem hee siene 600 besondre Kjrichswoages met, dan leet hee oba aule aundre Woages uk noch komen, met aul de Mana waut doatoo aunjestalt wieren. 8De Har muak däm Kjennich hoat enjestalt, soo daut hee de Israeliten hinjaraun juach. De Israeliten jinjen bosich verwoats. #2Mo 3,19-20 9De Ägipta met Pieed, Woages, Ritta un de gaunze Armee juagen an hinjaraun un holden an en, aus see noch bie Piehahirot bie daut Mäa jeloagat wieren, jäajenäwa von Baal Zefon.
10Aus de Israeliten sikj dan omkjikjten, un sagen däm Kjennich un de ägiptische Armee aunmarschieren, un an enholen, enjst an daut sea, un de Israeliten schrieejen no däm Harn. 11Un see säden to Moses: Wieren doa nich jenuach Jräwa en Ägipten, daut du ons must enne Wiltnis nenn brinjen toom stoawen? Wuarom hast du ons ut Ägipten rutjebrocht? 12Säd wie die nich, aus wie noch en Ägipten wieren: Lot ons toch. Daut es bäta fa ons, daut wie de Ägipta deenen, aus daut wie enne Wiltnis omkomen. 13Un Moses säd to daut Volkj: Habt nich Angst! Blieft staunthauft, un jie woaren seenen woo de Har junt vondoag noch raden woat. De Ägipta dee jie nu noch seenen woa jie nienich wada seenen, niemols! 14De Har selfst woat fa junt strieden. Blieft mau gaunz ruich. #5Mo 1,30; 2Chr 20,15.29; Jes 51,9
15De Har säd to Moses: Wuarom roop jie mie? Saj de Israeliten, see sellen verwoats gonen. 16Häw dienen Stock opp, un lang met diene Haunt äwa daut Mäa. Dan woat daut Wota sikj deelen, soo daut de Israeliten opp drieejen Grunt woaren kjennen derch daut Mäa gonen. 17Oba ekj woa de Ägipta hoat enstalen, soo daut see junt woaren hinjaraun komen. Ekj oba woa Aunerkjanunk kjrieen, derch daut waut ekj äwa däm Kjennich un siene Macht met Woages un Ritta doonen woa. 18Wan ekj mie stoakja aus däm Kjennich met siene Woages un Ritta bewiesen woa, dan woaren de Ägipta daut enseenen, daut ekj de Har sie.
19Un Gott sien Enjel, dee emma ver daut israelitische Häa jinkj, trock sikj trigj un stald sikj hinja daut Volkj han. Un de steile Wolkj von ver daut Volkj, stald sikj uk hinja daut Volkj han, #1Mo 16,7; 2Mo 13,21 20tweschen daut israelitische Häa un daut ägiptische Häa. Un de Wolkj jeef aun de eene Sied Licht, oba aun de aundre Sied wia daut diesta. Un derch de gaunze Nacht kjeemen see nich dicht toop. #Psa 105,39
21Dan strakjt Moses siene Haunt äwa daut Mäa, un de Har juach daut Mäa trigj met eenen stoakjen Oostwint, dee doa de Nacht äwa blosd un daut Mäa uteneen deeld, soo daut wua doa Mäa jewast wia, nu drieejet Launt wia. 22De Israeliten jinjen opp drieejen Grunt derch daut Mäa, un doa wia eene Waunt von Wota aun jieda Sied von an. #Jos 4,23; 2Kjen 2,8; Jes 11,15-16; 1Kor 10,1; Heb 11,29 23Un de Ägipta, met aul äare Pieed un Woages un Ritta, juagen an hinjaraun bat medden em Mäa. 24Dan bie daut ieeschte Morjenlicht, kjikjt de Har von de steile Wolkj von Fia un greiw un vewerd de ägiptische Armee. 25Hee leet de Räda aun äare Woages struf gonen, soo daut see schwoa wieda kjeemen. De Ägipta säden: Well wie ons hia von ver dise Israeliten wajchbrinjen, wiels de Har stritt fa an, un jäajen ons! 26De Har säd to Moses: Strakj diene Haunt äwa daut Mäa, daut daut Wota saul trigj ranen, äwa de Ägipta un äare Woages un äare Ritta. 27Un Moses strakjt siene Haunt äwa daut Mäa, un aus de Morjen väabruak, leet sikj daut Mäa trigj en siene Städ. Aus de Ägipta daut sagen spooden see sikj trigj, un randen no daut Wota opptoo. Un de Har muak een Enj met de Ägipta em Mäa. 28Daut Wota hoof sikj dan aun, un bedakjt däm Kjennich siene Woages, un de gaunze ägiptische Armee, dee an hinjaraun jekomen wieren. Nich een Ägipta kjeem met sien Läwen doavon. 29De Israeliten oba jinjen derch daut Mäa, opp drieejen Boddem. Daut Wota stunt aus eene Waunt aun jieda Sied. 30Dän Dach wäad de Har de ägiptische Armee auf, un holp de Israeliten. De Israeliten sagen de doodje Ägipta, aus dee oppem Launt nopp speelden. 31Aus de Israeliten de groote Jewault sagen, met woone de Har jäajen de Ägipta kjeem, haud daut Volkj Forcht fa däm Harn, un see kjrieejen grootet vetruen em Harn, un en sienen Deena Moses. #2Mo 19,9; 2Chr 20,20
Currently Selected:
2. Mose 14: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.