2. Mose 16
16
Gott jeft an Mauna un Fleesch
1De Jemeenschoft von Israeliten läd loos von Elim un kjeem no de Sin Wiltnis, dee tweschen Elim un Sinai es. Aun däm 15. Dach von de 2. Moonat no däm, daut see ut Ägipten rut kjeemen, kjeemen see doa aun.
2De Israeliten grumsaujden enne Wiltnis jäajen Moses un Aaron. #2Mo 17,2-3 3See säden: Wan de Har ons doch haud en Ägipten omjebrocht. Doa kunn wie weens bie däm Fleesch Gropen setten, un ons aun Broot saut äten. Nu hast du ons oba enne Wiltnis nenn jebrocht, daut wie hia aulatoop sellen fa Hunga stoawen. #2Mo 14,11 4Un de Har säd to Moses: Kjikj emol. Ekj woa Broot vom Himmel räajnen, un de Menschen woaren jieda Dach jenuach fa dän Dach oppsaumlen. Oba ekj woa an met dit aufproowen, auf see no mienen Rot horchen wellen ooda nich. #1Mo 22,1; 2Mo 16,15 5Aun däm sasten Dach sellen see daut aunreeden, waut see nenn brinjen, daut woat tweemol soo väl sennen aus aun aundre Doag. 6Un Moses un Aaron säden to de Israeliten: Wan daut Owent woaren woat, woa jie weeten daut et de Har wia, dee junt ut Ägipten rutbrocht. 7Un zemorjes woa jie seenen woo harlich dee es, wiels hee haft jun grumsaujen jäajen am jehieet. Ooda wäa meen jie sent wie, daut jie jäajen ons grumsaujen. 8Moses säd: De Har woat junt zeowes Fleesch jäwen, un zemorjes soo väl Broot aus jie wellen, wiels hee haft jun grumsaujen jehieet. Ooda meen jie daut wia mau jäajen ons? Wäa sent wie? Jun grumsaujen wia jäajen däm Harn.
9Dan säd Moses to Aaron: Saj de gaunze Jemeenschoft von Israeliten: Komt un stalt junt ver däm Harn. Hee haft jun grumsaujen jehieet. 10Un aus Aaron noch to de Jemeenschoft räd, kjikjten see no de Wiltnis opptoo, un doa kunnen see en eene Wolkj seenen, woo harlich de Har wia. #4Mo 12,5; 14,10; 16,19 11Un de Har säd to Moses: 12Ekj hab de Israeliten äa grumsaujen jehieet. Saj an: Wan daut Owentroot kjemt, woa jie Fleesch to äten haben, un zemorjes jenuach Broot fa aulem. Dan woa jie weeten, daut ekj de Har, jun Gott sie.
13Dan aus daut Owent wort, kjeemen doa Jachtväajel, soo daut see daut Loaga bedakjten. Un zemorjes wia doa eene Schicht Deiw runtom daut Loaga. #4Mo 11,31 14Un aus de Deiw sikj hoof, sagen see doa oppe Ieed enne Wiltnis fiene schorwje Kjreemels, soo aus Frost oppe Ieed. 15Aus de Israeliten daut sagen, fruagen see sikj unjarenaunda: Waut es dit? See wisten dan noch nich waut daut wia. Dan säd Moses an: Dit es daut Broot, daut de Har junt toom äten jeft. #2Mo 16,4; 5Mo 8,3; Joh 6,31; 1Kor 10,3 16Von dit sajcht de Har: Saumelt dit opp, een jieda eena, daut jie to äten haben. Saumelt twee Lieta fa jieda eenem en jun Zelt. 17De Israeliten deeden daut soo. Eenje saumelden een Deel, aundre weinich. 18Un aus see daut aufmauten, haud deejanja waut een Deel haud nich too väl, un deejanja waut weinich haud, haud nich too weinich. Een jiedra haud soo jesaumelt, aus hee toom Äten brucken kunn. #2Kor 8,15 19Un Moses säd: Kjeena doaf von dit fa dän näakjsten Morjen äwahoolen. #2Mo 16,4; Mat 6,34; Luk 11,3 20Oba eenje horchten nich no Moses un hilden waut äwa. Dan zemorjes wia daut voll Moden un daut stunk. Dit muak Moses sea onwellich. 21No däm saumelden see emma Dach fa Dach, soo väl aus see toom Äten brukten. Un wan de Sonn heeta wort, dan veschmolt daut äwaje.
22Aun däm sasten Dach saumelden see oba daut dobbelde, vea Lieta fa jiedrem. Dan kjeemen de Leidasch von de Jemeenschoft toop un säden Moses daut. 23Un Moses säd: De Har haft soo jesajcht: Morjen es de Dach toom reiwen, de Sabat. Dee blift heilich fa däm Harn. Bakt vondoag waut jie wellen un koakt soo aus jie wellen, un waut doa äwablift, daut hoolt fa dän näakjsten Dach. #1Mo 2,2-3 24Un see deeden daut, soo aus Moses an säd. See hilden daut Äten bat däm näakjsten Morjen, un doa wia kjeen schlajchtet Jeroch doabie, un doa wieren uk kjeene Moden. 25Moses säd: Ät daut vondoag. Vondoag es de Sabat, de Dach dee däm Harn jeweit es. Oppe Ieed woat kjeent sennen. 26Sas Doag sell jie oppsaumlen, oba aun däm säwenden Dach es de Sabat; dan woat doa nuscht sennen.
27Aun däm säwenden Dach aus eenje vom Volkj rut jinjen, om opptosaumlen, fungen see nuscht. 28Dan säd de Har to Moses: Woo lang woa jie stekjsennich sennen, un nich mienen Rot hoolen? 29Denkjt doaraun, daut de Har junt dän Sabat jejäft haft. Daut es wuarom jie aun däm sasten Dach, de dobbelde Mot Broot kjrieen. Aun däm säwenden Dach saul een jiedra aun sienen Plauz bliewen. Jie sellen dan nich rutgonen. 30Un soo reiwd sikj daut Volkj aum säwenden Dach.
31De Israeliten nanden daut Broot Mauna. Daut wia soo aus Korianda Sot, oba witt, un schmakjt no Schnetje met Honnich. 32Moses säd: De Har haft jesajcht: Twee Lieta von daut Mauna sell jie hoolen, soo daut de Menschen emma seenen kjennen, waut ekj junt enne Wiltnis to Äten jeef, aus ekj junt ut Ägipten brocht. 33Moses säd to Aaron: Nemm een Jefäs, un doo doa twee Lieta Mauna nenn. Dan sat daut ver däm Harn, soo daut et oppe Lenjd jehoolen woat. #Heb 9,4 34Un Aaron deed daut, krakjt soo aus de Har Moses daut jesajcht haud. Hee sad daut ver de Bundeskjist. 35De Israeliten eeten Mauna fa 40 Joa, bat see en daut Launt nenn kjeemen, wua see aunsiedlen kunnen, bat see aun de Jrens von Kanaan wieren. #Jos 5,12 36(Twee Lieta es een Tieendel von een Efa.)
Currently Selected:
2. Mose 16: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.