2. Mose 1
1
De Israeliten en Ägipten
1Dit sent Israel siene Säns, dee een jiedra met siene Famielje toop met Jakob no Ägipten trocken: #(1-5) 1Mo 46,8-27 2Ruben, Simeon, Levi, Juda, 3Isachar, Sebulon, Benjamin, 4Dan, Naftali, Gad un Asser. 5Jakob siene Nokomen wieren 70 Menschen. Josef wia aul en Ägipten.
6Dan storwen Josef un aul siene Breeda, un aul dee waut von siene Tiet wieren. #1Mo 50,26 7Israel siene Nokomen vemieeden sikj, daut eena aulawäajen met dee räakjnen must, wiels see soo sea tooneemen. Daut Launt wia eefach voll von an. #(7-22) Apost 7,17-19 8Dan kjeem doa een niea Kjennich opp äwa Ägipten, dee nuscht von Josef wist. 9Dee säd to sien Volkj: Kjikjt emol, de Israeliten vemieren sikj soo, daut see ons noch äwanämen kunnen. 10Horcht emol! Waut kjenn wie met an doonen, daut see ons nich too väl woaren, soo daut wan Kjrich utbräakjen sull, see met eemol jäajen ons sent, un sikj utem Launt brinjen. 11Dan stalden see Oppsechta äwa an aun, un wullen an met schwoare Oabeit unjadrekjen. See musten de Väarot Städa, Pitom un Ramses, fa dän Kjennich oppbuen. #1Mo 15,13; 47,11 12Oba soo väl dolla see dee toosaden, soo väl dolla neem daut Volkj too un vespreed sikj, soo daut de Ägipta daut onheimlich wort. 13De Ägipta dreewen de Israeliten to de Oabeit, daut see dee kjwälden #1Mo 15,13 14un daut Läwen betta muaken. See velangden, daut see Tieejlen un Zement muaken, un veschiedenste Oabeit oppe Flekja deeden, emma soo schwoa, daut see daut meist nich dwinjen kunnen.
15Aus de ägiptischa Kjennich sach, woo daut Volkj tooneem, roopt hee de hebräische Weemitta, Schifra un Pua, un säd an: 16Wan jie bie de hebräische Frues halpen, dan wan daut kjliene een Junkje es, sell jie daut doot moaken, un wan daut een Mejalkje es, sell jie daut aum Läwen loten. 17De Weemitta oba jleewden aun Gott un deeden nich, waut de Kjennich säd. See leeten de Junkjes uk aum Läwen. 18Dan leet de ägiptischa Kjennich de Weemitta komen un säd to an: Wuarom hab jie daut soo jedonen? Wuarom hab jie de Junkjes aum Läwen jeloten? 19De Weemitta säden toom Kjennich: Daut es, wäajen de hebräische Frues nich soo sent aus de ägiptische. De hebräische Frues sent soo stoakj, daut de Weemutta nich reed kjemt, ea daut Kjint jebuaren es. 20Gott wia goot to de Weemitta, un daut Volkj vemieed sikj un wort noch jrata. 21Wiels de Weemitta Forcht hauden fa Gott, jeef hee an uk äare ieejne Famieljes. 22Dan muak de Kjennich een Jesaz fa sien gaunzet Volkj un säd: Schmiet jieda kjlienet hebräischet Junkje em Niel Riefa, oba de Mejalkjes lot läwen.
Currently Selected:
2. Mose 1: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.