1. Mose 50
50
1Un Josef bruak bie sienen Voda toop un hield un kust am. 2Un Josef bestald aun siene Deena, dee de Doodes besorjden, daut see sienen Voda sullen reed moaken toom begrowen. 3Soo aus see daut hauden, dieed daut 40 Doag am reed to moaken toom begrowen. De Ägipta truaden 70 Doag fa am. 4Aus see de jeweenelje Doag jetruat hauden, säd Josef to däm Kjennich sien Rot: Bitscheen, sajcht däm Kjennich, 5Mien Voda bestald aun mie ea hee storf, daut ekj am sull en Kanaan begrowen en de Heel, dee hee doa selfst reedjemoakt haud. Nu bedd ekj, lot mie, bitscheen, de Reis moaken un mienen Voda doa begrowen. Dan kom ekj uk trigj. #1Mo 47,29-30 6Un de Kjennich säd: Go un begrow dienen Voda, soo aus hee die muak met een Eit vespräakjen.
7Un Josef muak sikj oppem Wajch om sienen Voda en Kanaan to begrowen. Un aul däm Kjennich siene Deena un aunjestalde Mana enne Hauptstaut un enne Prowinsen fuaren met. 8Un Josef siene Deena un Breeda un Jakob siene Famielje fuaren uk. Bloos äare Kjinja un äare Schop un Vee bleewen en Goschen. 9Un eene Häad von Ritta un Kjrichswoages fuaren uk. Daut jeef eene sea groote Baund. 10Aus see dan aun jant Sied vom Jordan bie Atad bat de Städ toom draschen kjeemen, hilden see doa aun un truaden fa säwen Doag. See wieren sea truarich un hielden lud. 11Un aus de Kanaanita sagen, woo see opp de Städ toom draschen bie Atad truaden, säden see: De Ägipta haben een sea grootet Truafast. Dan wort de Städ “Ägipta Trua” jenant.
12Jakob siene Säns deeden, waut äa Voda bestalt haud. #1Mo 49,29 13Siene Säns neemen am no Kanaan un begrowden am bie Machpela en de Heel, waut doa opp de Stap es, oosten von Mamre. Dee haud Abraham von däm Hetita, Efron, jekoft, daut et siene wia fa een Graufhoff. #1Mo 23,13-20 14Un aus hee sien Voda begroft haud, reisd Josef toop met siene Breeda, un aul dee waut met an jereist wieren, trigj no Ägipten.
Josef un siene Breeda
15No däm daut äa Voda jestorwen wia, säden Josef siene Breeda unja sikj: Veleicht woat Josef nu sienen Oaja opp ons uteewen un ons bestrofen, fa daut beese waut wie am aunjedonen haben. #1Mo 27,41 16Dan schekjten see eene Norecht no Josef un säden: Ons Voda bestald ea hee storf, 17daut wie die sajen sullen: Vejeff, bitscheen, diene Breeda fa äa Äwaträden un Sind jäajen die. Doawäajen kom wie nu un froagen daut du ons, dee wie dienen Voda sienen Gott deenen, onse Sind vejäwen wurscht. Un Josef hield aus hee daut hieed.
18Un siene Breeda kjeemen no am un kjneeden sikj met äare Kjap bat oppe Ieed ver am un säden: Kjikj emol. Wie jäwen ons han aus diene Sklowen. 19Oba Josef säd to an: Enjst junt nich soo. Sie ekj en Gott siene Städ? 20Jie muaken eenen beesen Plon jäajen mie, oba Gott haud eenen gooden Plon fa mie, daut väle sullen aum Läwen jehoolen, soo aus daut vondoag es. #1Mo 45,5.7 21Enjst junt nich lenja. Ekj woa junt un june Kjinja jäwen, daut jie läwen kjennen. Soo treest un vesechad hee an.
22Un Josef wond en Ägipten met sien Voda siene Nokomen. Josef läwd 110 Joa. 23Un Josef läwd noch, daut hee Efraim siene Kjinja un Grootkjinja sach, un uk de Kjinja von Manasse sienen Sän Machir. Hee freid sikj to dee aula. 24Un Josef säd to siene Breeda: Ekj woa boolt stoawen. Oba met de Tiet woat Gott no junt komen, un junt ut dit Launt rut leiden un en daut Launt nenn, daut hee Abraham, Isaak un Jakob opp een Eit vesproaken haft. 25Un Josef bestald aun Israel siene Säns un säd: Gott woat junt halpen komen, un dan sell jie miene Knoakes met nämen von hia. #2Mo 13,19; Jos 24,32 26Un Josef storf aus hee 110 Joa oolt wia. Un see besorjden am, soo aus see doa de Doodes besorjden un läden am en een Soakj en Ägipten.
Currently Selected:
1. Mose 50: PB
Highlight
Share
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.