Liera 7
7
1Goot aunjeseenen sennen es bäta aus scheene Saulw; de Dach, wan eena stoaft, es bäta aus de Dach wan eena jebuaren es. #Spr 22,1 2Daut es bäta en een Hus nengonen, wua see truaren, aus en een Hus nengonen, wua een Fast jehoolen woat; wiels een jiedra kjemt no daut Enj, un dee waut läwen, sullen doaraun denkjen. 3Truaren es bäta aus lachen; wiels derch eene schwoare Erfoarunk, woat eena een bätra Mensch. 4Een weisa Mensch es met sien Hoat doa wua see truaren; oba de Schosel es met sien Hoat wua jespost woat.
5Daut es bäta wan eena doano horcht, wan eena von eenen weisen Mensch belieet woat, aus no de Leeda von Schosels to horchen, 6wiels de Schosels äa spossen es nuscht mea wieet, aus daut kjnistren von een Distelfia unjarem Gropen. Daut es nich to vestonen, waut daut bediet. 7Ojjerajchta Jewenst lat däm Weisen toom Schosel woaren, un wäa bekoft es, kaun nich kloa seenen.
8Waut foadich moaken es bäta aus waut aunfangen. Daut es bäta wan eena jeduldich es, aus wan eena stolt es. 9Lot die nich leicht enoajren; wiels de Schosel drajcht dän Oaja em Hoat. #Jak 1,19 10Jleew nich, daut et frieejoa bäta wia aus vondoag; een kluaka Mensch jleeft daut nich. 11Weis sennen es soo väl wieet aus een Oafgoot; dee kjennen jiedren eenen halpen. 12Soo aus Jelt eenem Schutz jeft, soo beschizt uk de Weisheit. Daut Väadeel oppe lenjd es, daut de Weisheit däm Weisen daut Läwen behelt. #Spr 3,1-2
13See goot no, waut Gott jedonen haft. Kaun wäa daut jlikj moaken, waut Gott veboagen haft? #Liera 1,15 14Wan daut goot jeit, dan frei die; un wan daut schwoa jeit, dan denkj no: Gott haft beides de goode un de schwoare Doag jemoakt, un soo kjenn wie nich weeten, waut doa komen woat.
15Ekj hab opp dise Ieed, dee soo schwoa to vestonen es, välet en mien Läwen nojeseenen. Ekj hab jeseenen woo goode opprechtje Menschen mau een kortet Läwen haben, un woo de beese Menschen lang läwen en äa gottlooset Läwen. #Liera 8,14; Psa 73,12-14 16Denkj nich too sea, daut du em rajchten best, un hool die nich too sea doafäa, daut du weis best. Wuarom wurscht du die daut Läwen vedoawen? #Luk 18,11-12 17Jeff die nich to een gottlooset Läwen han, un sie nich een Schosel, soo daut du nich stoawen motst, ea de Tiet toom stoawen doa es. 18Paus opp daut du die aun dit helst, un daut nich velists. Wäa Ieaforcht fa Gott haft, bespoat sikj väl Trubbel.
Wäa kaun jerajcht sennen?
19De Weisheit jeft eenen kluaken Mensch mea Macht aus tieen Mana, dee de Staut rejieren. 20Kjeen Mensch oppe Ieed es soo jerajcht, daut hee bloos goodet, un nuscht orrajchtet deit. #Psa 14,3 21Nemm die nich aules aun, waut de Menschen sajen; lot die daut nich steeten, wan dien Kjnajcht die schelt; 22wiels du weetst, du hast äwa aundre uk foaken jeschullen.
23Aul dit veschiedne hab ekj en Weisheit oppe Proow jestalt. Ekj neem mie väa, ekj wudd weis sennen, oba ekj funk de Auntwuaten nich. 24Ekj funk kjeene Auntwuaten fa aules waut doa passieet un es; daut es too wiet auf von daut, waut eena vesteit, un es väl too deep fa eenem. Wäa kaun daut vestonen?
Reine Weisheit es nich to haben
25Ekj muak mie daut to Oppgow, met mien Vestaunt de Weisheit notoseenen, un no dee to froagen un to sieekjen, soo daut ekj miene Froagen beauntwuaten kunn, un daut ekj vestunt woo schoslich daut es, wan eena gottloos es, un woo domm daut es, wan eena schoslich es. #Psa 14,1 26Waut ekj finj es, daut eene Persoon, dee doa plont woo see een Nat un eene Schlenj oppstalen kaun, un dee met de Henj helt, soo aus met eenen Strank, es betra aus de Doot. Dee, to wäm Gott sikj freit, woat nich von äa faustjenomen; oba de Sinda felt en äare Macht. #Spr 2,16-22 27Nu horch emol waut ekj jefungen hab, sajcht de Liera. Ekj hab välet nojeseenen om to vestonen, wua daut aula hanspetzen deit; 28ekj hab mie mien gaunzet Läwen doamet bemieecht, un ekj hab daut nich foten kunt. (Daut woat jesajcht:)
Eena finjt eenen Maun mank dusent,
oba kjeene Fru doa mank.
29Oba horch, daut eensje waut ekj jefungen hab es, Gott haft de Menschen opprajcht jemoakt, un de Mensch sieekjt sikj väle Wäaj em Läwen. #1Mo 1,27
Currently Selected:
Liera 7: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
