2. Samuel 9

David un Mefi Boschet

1Un David säd, een Dach: Es doa noch wua eene Persoon von Saul siene Nokomen jebläwen, daut ekj däm kaun miene truhoatje Leew wiesen om Jonatan sient haulwen? 2Un am wort jesajcht von Ziba, dee Saul sien Deena jewast wia. Un see brochten Ziba ver David, un David säd to am: Best du Ziba? Un hee säd: Jo, un ekj sie dien Deena. #2Sam 16,1 3Un de Kjennich säd: Es doa noch wäa von Saul siene Nokomen, daut ekj däm kaun wiesen waut Gott siene truhoatje Leew es? Un Ziba säd to däm Kjennich: Doa es eena von Jonatan siene Säns. Daut es een Kjräpel. #2Sam 4,4 4Un de Kjennich säd: Wua es dee? Un Ziba säd: Dee wont en Lo Dabar bie Machir, Amiel sien Sän. #2Sam 17,27 5Un David schekjt Norecht no Lo Dabar, no Machir, Amiel sienen Sän, daut see Mefi Boschet brinjen sullen. 6Dan kjeem Mefi Boschet, dee Jonatan sien Sän un Saul sien Grootkjint wia, ver David un kjneed sikj ver am, un ieed am. Un David bejreest am: Mefi Boschet! Un hee säd: Ekj sie dien Deena. Waut kaun ekj fa die doonen? 7Un David säd: Hab nich Angst. Ekj well die truhoatje Leew bewiesen om Jonatan dienen Voda sient haulwen. Ekj woa die aul daut Launt jäwen woont Saul dien Grootvoda haud, un du saust emma bie mienen Desch äten. 8Un Mefi Boschet veieed David noch eemol un säd: Wäa sie ekj, daut du no soonen doodjen Hunt aus mie sust kjikjen wellen? 9Un de Kjennich leet Ziba Saul sien Deena komen un säd to am: Aules waut emol Saul un siene Famielje jehieed, hab ekj Mefi Boschet, dienen Harn sien Grootsän jejäft. #(9-11) 2Sam 19,29-30 10Du un diene Säns un diene Deena sellen daut Launt beoabeiden un daut arnten, soo daut dien Har sien Sän Broot to äten haft. Oba Mefi Boschet, dien Har sien Grootsän, saul emma aun mienen Desch äten. Ziba haud 15 Säns un 20 Deena. 11Dan säd Ziba to dän Kjennich: Wautemma du, mien Har un Kjennich, sajchst, woa ekj doonen. Von don aun eet Mefi Boschet aun David sienen Desch, soo aus däm Kjennich siene Säns. 12Mefi Boschet haud eenen jungen Sän dee heet Micha. Un aul Ziba siene Deena worden Mefi Boschet siene Deena. 13Soo kjeem Mefi Boschet en Jerusalem to wonen, un hee eet aun däm Kjennich sienen Desch. Mefi Boschet wia aun beid Feet lom. #2Sam 9,3

Currently Selected:

2. Samuel 9: PB

Highlight

Copy

Compare