2. Samuel 8

David nemt de Nobavelkja en

(1Chr 18,1-13)

1Met de Tiet schluach David de Filista, daut see sikj hanjäwen musten un sikj nich lenja selfst rejieren kunnen. 2Un aus David de Moabita schluach, musten dee sikj hanlajen. Dan maut hee von de Rieej emma twee Lenjd von een Strank auf, un leet dee ombrinjen; un hee maut eene Lenjd von däm Strank, un hee leet dee aum Läwen. Dan musten de Moabita David deenen un pinkjlich Jelt brinjen. #1Sam 22,3

3Un David besiejd uk Hadad Eser, Rehob sien Sän, dee Kjennich en Zoba wia. Dit wort aus Hadad Eser opp däm Wajch no de nuadlichen Eufrat Jäajent wia, om doa sien Machtrajcht trigj entofieren. #1Sam 14,47 4David neem 1.700 Ritta von däm, un 20.000 Soldoten. David muak aul däm siene Pieed fa de Kjrichswoages lom, oba behilt jenuach Pieed fa 100 Woages. #Jos 11,9 5Un aus de Aramäa von Damaskus kjeemen om Hadad Eser en Zoba to halpen, brocht David 22.000 von dee äare Soldoten om. 6Dan stald David Armee Stazionen opp mank de Aramäa bie Damaskus un de Aramäa worden siene Deena un tolden am jieda Joa Jelt. De Har jeef David aulawäajen dän Siech, wuaemma hee hanjinkj. 7David neem de goldne Schilten, dee Hadad Eser siene aunjestalde jedroacht hauden, un brocht dee no Jerusalem. 8David neem uk een deel Brons von Tebach un Berotai, woont Hadad Eser siene Städa wieren.

9Aus Toi, de Kjennich en Hamat, hieed, daut David Hadad Eser siene gaunze Armee jeschloagen haud, 10schekjt hee sienen Sän Joram no Kjennich David om am to bejreessen un doafäa to lowen, daut hee Hadad Eser besiecht haud. Toi haud aul mieremol jäajen Hadad Eser jekjamft. Joram brocht veschiedne Dinja, waut von Selwa un Golt un Brons jemoakt wieren, no David. 11Un de Kjennich David weid de Sachen en fa däm Harn, soo aus hee uk daut Selwa un Golt deed, woont hee von aundre Lenda jebrocht haud, dee hee besiecht haud, 12von Edom, Moab, Amon, de Filista, Amalek, un waut hee von Hadad Eser, Rehob sien Sän, dän Kjennich en Zoba, jenomen haud. 13Un David kjrieech noch mea Aunerkjanunk aus hee de 18.000 Edomita en daut Solt Tol doot schluach. #Psa 60,2 14Un David stald Armee Stazionen opp en Edom en veschiedne Städa, un de Edomita musten David deenen. De Har jeef David aulawäajen dän Siech, wua hee uk hanjinkj. #1Mo 27,40; 4Mo 24,18; 2Sam 20,23-26; 1Chr 18,14-17

15Soo rejieed David äwa daut gaunze Israel, un hee brocht een rajchtet Jerecht äwa daut gaunze Volkj, daut see met eenaunda jerajcht omjinjen. 16Joab, Zeruja äa Sän, wia de väaschta von David siene Armee, un Joschafat, Ahilud sien Sän, oppbewoad de Bieekja von de Jeschicht von daut Kjennichrikj. 17Zadok, Ahitub sien Sän, un Ahimelech, Abjatar sien Sän, wieren Priesta, un Seraja wia de Schriewa. #1Sam 22,20; 2Sam 15,24; 1Kjen 2,27 18Benaja, Jojada sien Sän, wia de väaschta von de Kreeta un Pletta, David siene Wajchta, un David siene Säns wieren Priesta. #2Sam 15,18

Currently Selected:

2. Samuel 8: PB

Highlight

Copy

Compare