2. Chronik 8
8
Waut Salomo wieda unjaneem
(1Kjen 9,10-28)
1Salomo bud 20 Joa aun däm Harn sien Tempel un aun sienen Paulaust. 2Un no däm bud hee de Städa ut, waut Hiram am jejäft haud, un besiedeld dee met Israeliten. 3Dan jinkj hee jäajen Hamat Zoba un neem dee en. 4Hee bud uk Tadmor en de Wiltnis ut, un aule Städa, waut hee en Hamat aunjelajcht haud, bud hee met Korn Spikjasch ut. 5Daut bowaschte uk daut unjaschte Bet Horon bud hee opp to fauste Städa, met Mieren un Puaten, waut stoakj to veräajlen jinjen. 6Uk en Baalat un aule Väarotstäda, waut Salomo haud, un aule Städa wua hee siene Woages un Rittasch haud, en Jerusalem, opp de Libanon Boaj un en daut gaunze Launt von sien Rikj bud hee aules ut, waut hee sikj väajenomen haud.
7Aul daut Volkj, waut äwajebläwen wia von de Hetita, Amorita, Perisita, Hiwita un Jebusita, dee nich to Israel jehieeden, 8dee äare Nokomen, waut Israel nich utjerot haud, un em Launt äwajebläwen wieren, muak Salomo to Sklowen bat aun disen Dach. #Jos 16,10 9Oba von de Israeliten muak Salomo kjeenem toom Kjnajcht fa sien Woakj, dee muak hee to Soldoten, to Befälshaba äwa siene Truppen un to Kjamfa met de Woages em Kjrich. 10Un 250 haud Salomo aus hechste Oppsechta aunjestalt, waut äwa de Oabeida to jebeeden hauden.
11Un Salomo brocht de Dochta von däm Kjennich en Ägipten ut de Davidstaut en daut Hus, waut hee fa ar jebut haud. Hee säd: Miene Fru saul nich en däm Kjennich David sien Hus wonen. Dee Riem sent een Heilichtum, wiels däm Harn siene Bundeskjist doa nenjekomen es. #1Kjen 3,1
12No däm aus de Tempel foadich wia, brocht Salomo däm Harn räajelmässich Brauntopfa opp däm Brauntopfa Aultoa, waut hee ver däm Väarum vom Tempel jebut haud, #2Chr 4,1 13soo aus väajeschräwen wia em Jesaz Moses, aule Doag to opfren, aum Sabat, aum Niemon un aun de dree Fasta em Joa. Aum Fast met daut onjesuade Broot, aum Wäakjenfast un aum Loofboodenfast. #3Mo 23,1-44; 4Mo 28,2.9.11.17.26; 29,12 14No de Aunwiesungen, waut Salomo von sienen Voda David jekjräajen haud, deeld hee de Priesta en veschiedne Gruppen en, woo see äaren Deenst verechten sullen. Hee stald uk de Gruppen von Leviten aun, daut see de Priesta holpen un fa daut Jesank em Tempel sorjden, soo aus jieda Dach daut foddad. Uk de Puatenwajchta worden fa jieda eenselnet Puat en Deenstgruppen enjedeelt, soo aus David, de Gottesmaun, daut aunjeordnet haud. #1Chr 23,1—26,19 15Un see haundelden en kjeene Sach aundasch, aus de Kjennich fa de Priesta un Leviten, ooda fa daut Tempelkaptol aunjeordnet haud. 16Soo wort aules utjefieet, waut Salomo sikj väajenomen haud, von däm Dach aun aus daut Fundament fa dän Tempel jelajcht wort bat aun däm Dach wua de Tempel, däm Harn sien Hus, gaunz foadich wia.
17En dee Tiet kjeem Salomo no Ezjon Geber un no Elat aun de Kaunt vom rooden Mäa en daut Launt Edom, 18wiels Hiram schekjt am dort Schäp met erfoarne Scheppmana han, waut met daut Mäa goot bekaunt wieren, un dee säajelden met Salomo siene Mana toop no daut Launt Ofir un brochten Salomo von dort 450 Zentna Golt.
Currently Selected:
2. Chronik 8: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
