2. Chronik 9
9
De Kjennijin von Saba kjemt Salomo besieekjen
(1Kjen 10,1-13)
1Salomo wort soo bekaunt, daut uk de Kjennijin von Saba von am hieed. See muak sikj opp un kjeem no Jerusalem, om sien Weeten derch Rotselfroagen oppe Proow to stalen. See kjeem met eene groote Grupp, waut ar bejleiten deeden, un äare Kameelen wieren schwoa belot met scheenrikjende Eelj, Golt un diere Steena. Un aus see no Salomo kjeem, läd see am de Rotsels väa, waut see sikj utjedocht haud. #Mat 12,42 2Un Salomo jeef ar opp aules Auntwuat, waut see fruach, uk de schwierichste Froagen brochten am nich en Veläajenheit. 3Un aus de Kjennijin von Saba Salomo siene Weisheit sach, un daut Hus, Waut hee jebut haud, 4daut Äten fa sienen Desch, de Settordnunk fa siene Beaumten, daut oppträden von de Deena un äare Kjleeda, un de Deena, dee met Jedrenkjen oppträden deeden un äare Kjleeda, un siene Brauntopfa, waut hee däm Harn em Tempel opfad, dan velua see von staunen de Beharschunk. 5Un see säd to Salomo: Daut stemt, waut ekj en mien Launt von diene Doten un von diene Weisheit jehieet hab. 6Ekj wull daut oba nich jleewen, bat ekj kjeem un daut met miene ieejne Uagen sach. Un nich emol de Halft von diene groote Weisheit es mie jesajcht worden. Du best jrata aus daut, waut ekj von die jehieet hab. 7Woo jlekjlich sent diene Deena un diene Aumtslied, dee de gaunze Tiet ver die stonen un diene kluake Wieed hieren! 8Jeloft es de Har, dien Gott, dee jefaulen aun die jehaut haft, om die opp sienen Troon to saten aus Kjennich fa dän Harn, dienen Gott! Wiels dien Gott Israel goot es, un daut fa emma hoolen well, doawäajen haft hee die äwa an toom Kjennich jesat, daut du fa Rajcht un Jerajchtichkjeit sorjst. #1Chr 29,23 9Un see jeef däm Kjennich 120 Zentna Golt un sea väl scheenrikjende Eelj un väl diere Steena. Un daut jeef niemols mea soone wieetvolle Eelj aus dee, dee de Kjennijin von Saba däm Kjennich Salomo jeef.
10Uk de Deena von Hiram un von Salomo, waut Golt von Ofir holden, brochten Sandelholt un diere Steena. 11Un Salomo leet von daut Holt Trapen moaken fa dän Harn sienen Tempel un uk fa daut Kjennichshus, un Hoapen un Zitta fa de Sinja. Soon Holt haud em Launt Juda verhäa noch niemols wäa jeseenen.
12De Kjennich Salomo jeef de Kjennijin von Saba aules, waut ar jefoll un wua see am no fruach, mea aus de Gaustjeschenkja, waut see däm Kjennich jebrocht haud. Un see muak sikj met dee, dee ar bejleiten deeden, toop opp un reisd trigj no äa Launt.
Salomo siene Pracht, sien grootet Vemieejen, un siene Macht
(1Kjen 10,14-29)
13Daut Jewicht von Golt waut Salomo en een Joa jeleewat wort, wieren 666 Zentna. 14Un buta däm noch daut Golt, waut de groote Jeschaftslied un de Hendla enbrochten. Uk de arabische Kjennichs un de Vewaultasch äwa de Prowinsen brochten Golt un Selwa no Salomo. 15Von daut leet de Kjennich Salomo 200 groote Schilten moaken un dee met Golt betrakjen. Fa jieda Schilt worden säwen Kilo Golt jebrukt. 16Un 300 kjliene Schilten leet hee moaken, wua jieda Schilt met dreeunhaulf Kilo Golt betrocken wort. Un de Kjennich brocht dee en daut Libanonwoolt Hus. #1Kjen 7,2 17De Kjennich leet uk eenen grooten Kjennichstool von Aulfenbeen moaken un dän met Golt betrakjen. 18Un de Stool haud sas Stoopen un eene goldne Footbenkj, waut aun däm Stool faust wia, un haud aun beid Sieden von de Sett Oarmlänen, un twee Leiws stunden biesied de Oarmlänen. 19Un twalf Leiws stunden opp de sas Stoopen aun beid Sieden. Soowaut es sest niemols fa irjent een Kjennichrikj jemoakt worden. 20Aule Drinkjdinja, waut Salomo haud, wieren von Golt, un aul daut Jereetschoft en daut Libanonwoolt Hus wia von reinet Golt. Wiels Selwa hilden see en Salomo siene Tiet fa wieetloos. 21Wiels däm Kjennich siene Schäp fuaren met Hiram siene Scheppmana toop no Tarsis, un dee Schäp kjeemen mau eemol en dree Joa trigj, beloden met Golt, Selwa, Aulfenbeen, Open un Peihons. 22Soo wort de Kjennich Salomo jrata aun Vemieejen un aun Weisheit aus aule Kjennichs oppe Ieed. 23Un aule Kjennichs oppe Ieed hauden een velangen Salomo to seenen, om siene Weisheit to hieren, waut Gott am en sien Hoat jejäft haud. 24Aula brochten see am Jeschenkja, selwane un goldne Dinja, fastliche Kjleeda, Jewäaren, wieetvolle Eelj, Pieed un Mulasch. Un soo jinkj daut jieda Joa.
25Un Salomo haud 4.000 Pieed un Woages un 12.000 Rittasch. Een Deel von dee haud hee en Jerusalem, un de äwaje wieren en de Städa unjajebrocht, waut hee doafäa utjebut haud. 26Salomo wia Kjennich äwa aule Kjennichs en daut gaunze Launt vom Eufrat bat aun daut Launt von de Filista un bat aun de ägiptische Jrens. 27Un de Kjennich brocht daut bat doa, daut et en Jerusalem soo väl Selwa jeef aus Steena un soo väl Zeedaholt aus Mulbäabeem en de onjlikje Launtschoft. 28Un Pieed worden Salomo ut Ägipten un ut aule aundre Lenda enjefieet.
Daut Enj von Salomo siene Rejierunk
(1Kjen 11,41-43)
29Aules, waut daut sest noch äwa Salomo to sajen jeft, vom Aunfank bat aum Enj, daut es notoläsen en de Berechten von dän Profeet Natan, en de Profezeiungen von Ahija von Silo un en de Openboarungen, waut de Profeet Jedo äwa Jerobeam, Nebat sienen Sän, jekjräajen haft. #1Kjen 11,29-39 30Salomo rejieed en Jerusalem 40 Joa äwa gaunz Israel. 31Un Salomo läd sikj bie siene Vodasch to Ru, un hee wort en sien Voda siene Staut begroft. Un sien Sän Rehabeam wort Kjennich en siene Städ. #1Kjen 14,21
Currently Selected:
2. Chronik 9: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
