2. Chronik 7
7
Salomo sien Opfafast
(1Kjen 8,62-66)
1Aus Salomo sien Jebäd to Enj jebät haud, foll Fia vom Himmel un vebrend daut Brauntopfa un de Schlachtopfa, un däm Harn siene Harlichkjeit muak dän Tempel voll, #2Mo 40,34; 3Mo 9,24; 1Kjen 18,38 2soo daut de Priesta nich en dän Tempel nengonen kunnen, wiels däm Harn siene Harlichkjeit daut Hus voll muak. 3Un aule Israeliten sagen, woo daut Fia rauffoll un woo däm Harn siene Harlichkjeit sikj bowa däm Tempel seenen leet. Un see follen opp äare Kjneeen met daut Jesecht no de Ieed oppe Flua un bäden däm Harn aun un dankten am met dise Wieed: De Har es jenstich, siene truhoatje Leew hieet niemols opp! #2Chr 5,13-14; Psa 106,1
4Dan opfaden de Kjennich un daut gaunze Volkj ver däm Harn. 5De Kjennich Salomo opfad 22.000 Rinda un 120.000 Schop. Un soo weiden de Kjennich un daut gaunze Volkj daut Gotteshus en. 6De Priesta stunden en äare Deenst Aufdeelungen un de Leviten hauden sikj met äare Musikj Instrumenten oppjestalt, waut de Kjennich David fa dän Gottesdeenst toom Dankleeda sinjen haud moaken loten. De Leviten deeden doamet de Psalmen, David siene Dankleeda, bejleiten. Uk nu lowden see däm Harn met daut Leet: Siene truhoatje Leew hieet niemols opp! De Priesta stunden an jäajenäwa un blosden met Trompeeten, un daut gaunze Volkj Israel stunt. 7Un Salomo weid de Medd von däm Väahoff en, waut ver däm Harn sien Hus wia, un vebrend doa de Brauntopfa un daut Fat von de Dankopfa, wiels de bronsna Aultoa, waut Salomo haud moaken loten, too kjlien wia, om aule Brauntopfa, Ätesopfa un daut Fat opptonämen. #2Chr 4,1
8Toop met de Tempel Enweiunk fieeden Salomo un daut gaunze Volkj Israel eene Wäakj lank daut Loofboodenfast. Daut wia eene groote Vesaumlunk waut toopjekomen wia, von Hamat em Nuaden bat aun daut ägiptische Tol em Sieden. 9Aum achten Dach hilden see eene Vesaumlunk, wiels de Enweiunk von däm Aultoa hilt säwen Doag aun, un daut Fast uk säwen Doag. #4Mo 7,10 10Soo leet hee aum 23. Dach en de 7. Moonat daut Volkj froo un met gooden Moot äwa aul daut goode, waut de Har aun David, Salomo un sien Volkj Israel jedonen haud, no Hus gonen.
Gott auntwuat Salomo
(1Kjen 9,1-9)
11Salomo brocht däm gaunzen Bu von däm Harn sien Hus un von daut Kjennichs Hus toom Aufschluss. Un aules, waut hee sikj doabie väajenomen haud uttobuen, aun däm Harn sien Hus un aun sien Hus, wia goot utjefollen.
12De Har deed sikj Salomo en dee Nacht openboaren un säd to am: Ekj hab dien Jebäd erhieet un mie dise Städ toom Opfahus utjewält. #5Mo 12,5-6; Jes 56,7; Mrk 11,17; Joh 2,16 13Wan ekj dän Himmel veschluten woa, daut et nich räajent, ooda von Graushoppa daut Launt kolfräten lot, ooda eene jefäadelje Krankheit mank mien Volkj komen lot, 14un mien Volkj, wua mien Nomen äwa jenant es, sikj deemootjen woat, daut see bäden un miene Jäajenwuat sieekjen un sikj nie oppmoaken un von daut beese loten, dan well ekj daut Jebäd vom Himmel ut erhieren un äare Sinden vejäwen un uk däm Schoden em Launt wada heelen. 15Soo sellen miene Uagen nu op sennen un miene Uaren oppmoakjsom sennen opp de Jebäda von dise Städ. #2Chr 6,40 16Soo hab ekj nu dit Hus jewält un daut to eene heilje Städ jemoakt, daut mien Nomen doa fa emma wonen saul, un miene Uagen un mien Hoat sellen doa aulentiet sennen. 17Un wan du soo ver mie läwen woascht, aus dien Voda David ver mie jeläft haft, daut du aules deist, waut ekj die saj, un miene Jebooten un Rajchten helst, 18dan well ekj dän Troon von diene Kjennichs Harschoft bestendich moaken, soo aus ekj met dienen Voda David eenen Bunt jeschloten hab un jesajcht: Die saul daut nich aun eenen Maun fälen, dee äwa Israel rejieet. #2Chr 6,16 19Wan jie oba von mie aufdreien un miene Jebooten un Rajchten, waut ekj junt väajelajcht hab, veloten un aundre Jetta deenen un aunbäden gonen, 20dan woa ekj Israel utrieten ut daut Launt, waut ekj an jejäft hab, un dit Hus, waut ekj to eene Woninj fa mienen Nomen bestemt hab, woa ekj dan von ver miene Uagen wajchsteeten un to Veachtunk un Spott mank aule Velkja moaken. #5Mo 28,63; 1Kjen 14,15 21Un ver dit Hus, waut nu noch soo huach erhowen es, woaren dee aula, waut doa dan vebiegonen woaren sikj veschrakjen un sajen: Wuarom haft de Har dit Launt un dit Hus soo enne Grunt jebrocht? #(21 un 22) 5Mo 29,23-28; Jer 22,8-9 22Un dan woaren see sajen: Wiels see dän Harn, äare Vodasch äaren Gott, veloten haben, dee an ut Ägipten rut jefieet haud, un see sikj aun aundre Jetta hongen un dee aunbäden un deenden, doawäajen haft hee aul dit Onheil äwa an jebrocht.
Currently Selected:
2. Chronik 7: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
