2. Chronik 31
31
Hiskia deit dän Tempeldeenst en Ordnunk brinjen
1Aus dit Fast to Enj wia, jinjen de vesaumelde Israeliten ieescht noch en de aundre Städa von Juda, un vebruaken de Jedenkjsteena un hakten de Ascherabilda om. See vestieeden uk de huage Opfastäden un Aultoaren von de framde Jetta, en gaunz Juda, Benjamin, Efraim un Manasse, bat nuscht von dee äwableef. Un dan jinjen see wada trigj no äare Woninjen en äare Städa. #5Mo 7,5; 2Kjen 18,4; 2Chr 29,1-36
Hiskia deit daut räajlen daut de Priesta un Leviten vesorcht worden
2Hiskia stald de Priesta un Leviten no äare Deenstgruppen opp, jieda eenem no siene Oppgow, waut hee em Tempel, en däm Harn siene Woninj, to doonen haud: De Priesta sullen de Brauntopfa un Dankopfa brinjen, un de Leviten sullen an doabie halpen un däm Harn met Musikj un Jesank lowen. 3De Kjennich jeef sienen Deel vom Kaptol fa daut Brauntopfa aum Morjen un aum Owent, un fa de Brauntopfa aum Sabat, aum Niemon un aun de Fastdoag, soo aus en däm Harn sien Jesaz jeschräwen steit. #4Mo 28,1—29,39 4Hee säd uk to de Enwona von Jerusalem, daut see dän Deel, waut de Priesta un Leviten troff, jäwen sullen, soo daut dee sikj gaunz fa äare Oppgow hanjäwen kunnen, soo aus daut em Harn sien Jesaz väajeschräwen es. 5Un aus dis Opproop bekaunt jejäft wort, brochten de Israeliten rikjlich von daut ieeschte, waut see jearnt hauden: Jeträajd, Wien, Eelj, Honnich un aule Sorten Frucht von äare Goades, un uk daut tieende Deel von aul äa Enkomen, soo aus daut väajeschräwen es. #2Mo 23,19; 5Mo 14,22-23 6Uk de Israeliten un dee von Juda, waut en de aundre Städa von Juda wonden, brochten dän Tieenden von äare Rinda un Schop un dän Tieenden von daut waut see däm Harn, äaren Gott, jeweit hauden, un läden daut Hupen aun Hupen han. #3Mo 27,32 7En de dredde Moonat fungen see daut aun opptostopslen, un en de säwende Moonat hauden see daut mau ieescht foadich.
8Aus Hiskia un de väaschte Mana kjeemen un de Hupes sagen, lowden see däm Harn un sien Volkj Israel. 9Hiskia fruach de Priesta un Leviten, wua dise Hupes häakjeemen. 10Un de Priesta Asarja, de väaschta von Zadok siene Nokomen, säd to am: Von dee Tiet aun, aus daut Volkj aunjefongen haft, de Aufgowen en däm Harn sienen Tempel to brinjen, hab wie jejäten un sent saut jeworden, un doa es noch väl äwajebläwen. De Har haft sien Volkj soo rikjlich jesäajent, daut dit aula äwajebläwen es.
11Dan jeef Hiskia de Aunordnunk, biem Tempel Väarotstowen entorechten. Un aus dee enjerecht wieren, 12wort doa aules sorjfeltich jeloagat: De Ieeschtlinjsfrucht von de Arnt, de tieenda Deel von aul daut Enkomen un de jeweide Opfagowen. Aus väaschta Oppsechta äwa disen Väarot wort de Levit Konanja aunjestalt, un sien Brooda Schimi aus tweeda Oppsechta. 13Un Jehiel, Asasja, Nahat, Asael, Jerimot, Josabad, Eliel, Jismachja, Mahat un Benaja worden Oppsechta, dee unja Konanja un sienen Brooda Schimi stunden, soo aus de Kjennich Hiskia, un Asarja, de Tempelväastona, daut aunjeordnet hauden. 14De Oppsecht äwa de Gowen, waut friewellich fa Gott jejäft worden, haud de Levit Kore, Jimna sien Sän, dee Puatenwajchta aun daut oostne Puat wia. Hee haud uk de friewelje Opfagowen, waut däm Harn jebrocht worden, aun de Priesta to vedeelen, un soo uk de besondasch heilje Deelen von de Opfa, waut bloos von de Priesta durwen jejäten woaren. 15Un unja siene Leidunk stunden Eden, Minjamin, Jeschua, Schemaja, Amarja un Schechanja, waut am en de Wonstäden von de Priesta bie siene Oabeit jewessenhauft unjastetten deeden. See sorjden doafäa, daut aule Priesta en de veschiedne Deenstgruppen räajelmässich äa Deel kjrieejen, de oole soo aus de junge. 16See hauden uk eene List jemoakt fa de Priesta, waut no äare Deenstgruppen räajelmässich no Jerusalem gonen musten, om doa em Tempel de Opfadeensten to verechten, waut jieda Dach to doonen wieren. De List schloot aule Junges un Mana en, waut dree Joa un doaräwa wieren. 17De Priesta wieren no äare Volkjsgruppen no oppjetieekjent. Un de Leviten worden uk, von 20 Joa un doaräwa, no äare Deenstgruppen un Oppgowen no en de List enjedroacht. 18Un en de List worden uk de Famieljes enjedroacht, de Frues, Säns un Dajchta. Wiels de Mana bestendich em Deenst fa däm Harn stunden, worden de Famieljes uk to äaren jeweiden Staunt metjetalt.
19Uk fa de Priesta, de Nokomen von Aaron, waut opp äare Weidflekja bie de Städa wonden, worden en jieda Staut Mana bie Nomen bestemt, waut aul de Mana von de Priesta Famieljes äaren Deel aun Gowen utdeelen musten. Un soo uk aul dee, dee aus Leviten enjeschräwen wieren. 20Soo muak Hiskia daut en gaunz Juda. Hee deed, waut ver däm Harn, sienen Gott, rajcht un goot wia un bewees am doamet daut hee tru wia. 21Un aus hee däm Tempeldeenst wada en Ordnunk brocht, un däm Harn sien Jesaz un siene Jebooten wada respakjt veschauft, deed hee daut aula, wiels hee sienen Gott met sien gaunzet Hoat jehorchen wull. Un doawäajen leet de Har daut uk goot utfaulen. #Psa 1,3
Currently Selected:
2. Chronik 31: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
