2. Chronik 2
2
1Salomo stald 70.000 Mana aun, toom Lausten droagen, un 80.000, waut manke Boaj en Juda Steena haken sullen. Un 3.600 stald hee aus Oppsechta äwa dee aun. 2Dan schekjt Salomo Mana no Hiram, däm Kjennich von Tierus, un leet am sajen: Soo aus du met mienen Voda David deetst un schekjst am Zeedaholt, daut hee sikj eenen Paulaust buen kunn, fa sikj toom wonen, soo doo daut uk met mie. #1Chr 14,1 3Un kjikj, nu well ekj däm Harn, mienen Gott sienen Nomen, een Hus buen, waut am jeweit sennen saul. Doa bennen saul scheenrikjendet Ruakopfa ver am jebrocht un jeweidet Broot reedjemoakt, un aum Morjen uk aum Owent, aum Sabat, aum Niemon un aun däm Harn, onsen Gott, siene Fastdoag Brauntopfa jebrocht, soo aus hee Israel daut fa aule Tieden aunjeordnet haft. 4Daut Hus, waut ekj buen well, saul groot sennen, wiels ons Gott es jrata aus aule aundre Jetta. #Psa 86,8 5Fa am jeit ieejentlich kjeen Hus to buen. De gaunze Himmel, soo onen Enj wiet, aus dee uk es, es fa am noch too kjlien! Woo kaun ekj am dan een Hus buen? Bloos een Heilichtum, wua am Opfa jebrocht woaren, kaun ekj am buen. #1Kjen 8,27; 2Chr 6,18 6Soo schekj mie nu eenen begowden Maun, waut sea schmocke Oabeiten von Golt, Selwa, Brons un Iesa moaken kaun. Un waut sikj uk met roode, met bleiwroode un bleiwe Wolloabeiten vesteit, un uk aulahaunt Bilda uttooabeiden vesteit. Hee saul aul dise Oabeiten met de Kjensla von Juda un Jerusalem toop derchfieren, waut hia bie mie sent, un mien Voda David aul aunjestalt haft. 7Un schekj mie Zeedastam un Ziepressenstam un Sandelholt von de Libanon Boaj, wiels ekj weet, woo goot diene Lied dort opp däm Libanon Holt to haken vestonen. Un miene Oabeida sellen met diene toop oabeiden, 8daut mie väl Buholt reedjemoakt woat. Wiels daut Hus, waut ekj buen well, saul groot un prachtvoll sennen. 9Un doafäa well ekj diene Lied, de Holthakasch, dee daut Holt behaken, 4.000 Tonnen Weit, 4.000 Tonnen Joascht, 4.000 Tonnen Wien un 4.000 Tonnen Eelj to Noarunk jäwen.
10Doaropp auntwuad Hiram, de Kjennich von Tierus, en eenen Breef un schekjt däm no Salomo, wua daut bennen säd: Wiels de Har sien Volkj goot es, haft hee die toom Kjennich äwa an jemoakt. 11Wieda schreef Hiram: Jeloft es de Har, Israel äa Gott, dee Himmel un Ieed jemoakt haft, daut hee däm Kjennich David eenen weisen, kluaken un vestendjen Sän jejäft haft, dee däm Harn een Hus buen well un uk een Hus fa sikj aus Kjennich! 12Ekj woa die eenen begowden un vestendjen Maun schekjen, mienen Beroda, Hiram. #1Kjen 7,13 13Hee es de Sän von eene Fru ut däm Staum Dan, sien Voda oba es hia von Tierus. Dee vesteit sikj met aule Oabeiten von Golt, Selwa, Brons, Iesa, Steena un Holt, un soo uk met roode, bleiwe un bleiwroode Woll un Lienzeich to oabeiden, un uk aule Sorten Bilda uttoschnieden. Hee kaun sikj von aules, waut du am oppjefst, een Mosta moaken, un es wellens met diene Kjensla, un met mienen Harn, dän Kjennich David, dienen Voda, siene Kjensla toop to oabeiden. #2Mo 31,2-6 14Un nu mien Har, dän Weit, Joascht, Eelj un Wien, wuavon mien Har jerät haft, mucht hee siene Deena schekjen. 15Wie wellen daut Holt opp däm Libanon haken, sooväl aus du brukst, un wellen daut met Flotten opp daut Wota no Jafo brinjen. Von doa motten diene Menschen daut dan no Jerusalem brinjen.
16Salomo leet en gaunz Israel de Menschen talen, waut ut aundre Velkja staumden un aus framde em Launt läwden, no däm aus sien Voda David dee aul eemol jetalt haud. Un doa fungen sikj 153.600 Mana. #(16 un 17) 1Chr 22,2 17Doavon stald Salomo 80.000 manke Boaj en Juda aus Steenhakasch aun, un 70.000 aus Lausten Droagasch om de Steena no äaren Plauz to brinjen un 3.600 aus Oppsechta, om de Lied aun de Oabeit to hoolen.
Currently Selected:
2. Chronik 2: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
