2. Chronik 3
3
Salomo but Gott eenen Tempel
(1Kjen 6,1-38)
1Un Salomo funk aun, opp dän Boajch Morija en Jerusalem daut Hus fa däm Harn to buen. Dän Plauz haud sien Voda David aul bestemt, wiels de Har sikj am doa opp dän Jebusita Arauna sienen Draschplauz jeopenboat haud. #1Chr 21,18-26 2Aum 2. Dach en de 2. Moonat en sien 4. Rejierungsjoa funk hee aun to buen. 3Un dit sent de Moten, wuano Salomo daut Gotteshus bud: De Lenjd wia 30 Meeta, un de Breed wia tieen Meeta. 4Un de väaschte Stow, waut aun de väaschte Kaunt kjeem, wia uk soo aus daut Hus tieen Meeta breet, de Hecht oba wia 60 Meeta. Un hee leet de Wenj von bennen en de väaschte Stow met reinet Golt betrakjen. 5De groote Stow leet hee met Ziepressenholt utnoaglen un leet daut uk met daut baste Golt betrakjen. Un doa worden noch Paulmbeem un Kjäden met Bloomen nenjeoabeit. 6Daut gaunze Hus leet hee met diere Steena utstraumen. Daut Golt, waut to disen Bu jebrukt wort, staumd von Parwajim. 7Un met daut Golt wort daut gaunze Hus von bennen, de Baulkjes, de Schwalen, de Däaren un de Wenj betrocken. Un aun de Wenj worden noch Bilda von Cheruben nenjeoabeit. 8Dän hinjaschten Rum, daut Aulaheilichste, muak Salomo tieen Meeta lank uk tieen Meeta breet, soo aus de Breed von daut gaunze Jebied wia. Uk dee wort von bennen met reinet Golt betrocken, waut 600 Zentna Golt brukt. 9Un hee jeef uk fa de Näajel 50 Lot Golt aun Jewicht. Un uk de Wenj von de Bowastowen worden met Golt betrocken. 10Fa daut Aulaheilichste leet Salomo twee Cheruben, sea schmock utoabeiden un met Golt betrakjen. 11Un de Lenjd von de Cheruben äare Flichten toopjenomen wia tieen Meeta. Jieda Flicht wia 2,50 Meeta. Eene Flicht von een Cherub rieekjt bat aun de Waunt von de Stow un de aundre Flicht rieekjt bat de Medd Stow un rieekjt bat aun de Flicht von däm aundren Cherub. 12Soo haud uk de aundra Cherub siene Flichten von 2,50 Meeta un rieekjt met eene Flicht bat aun de Waunt vom Hus, un met de aundre, bat de Flicht von däm ieeschten Cherub. 13De utjespaunde Flichten von de Cheruben wieren soo breet aus de Stow, tieen Meeta. Un see stunden opp äare Feet, un wieren met däm Jesecht no däm Engank jedreit. 14Un Salomo leet eene Gardien ver daut Aulaheilichste moaken. Dee wia met Twierem jewäft, un met bleiwe, roode un scharlachroode Woll wieren doa Cherubenbilda nenjewäft. #2Mo 26,31
De beid bronsne Past ver däm Tempel
(1Kjen 7,15-22)
15Un Salomo leet ver däm Tempel twee Past oppstalen, waut 7,50 Meeta huach wieren, un de Baul doa bowen maut 2,50 Meeta. 16Un fa dise Past worden Kjäden jemoakt un dee bowen aun de Past aunjemoakt, un dan worden 100 Granatapel jemoakt un dee aun de Kjäden naunjemoakt. 17Salomo leet de Past ver daut Tempelhus oppstalen, eenen aun de rajchte Sied, un eenen aun de linkje Sied. Däm aun de rajchte Sied nand hee Jachin (Hee recht opp) un däm aun de linkje Sied nand hee Boas (En am es Krauft).
Currently Selected:
2. Chronik 3: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
