2. Chronik 19

1Kjennich Joschafat von Juda oba kjeem wada en Fräd trigj no Hus no Jerusalem. 2Un dan jinkj de Profeet Jehu, Hanani sien Sän, däm Kjennich Joschafat entjäajen un säd to am: Saust du soo däm gottloosen halpen un dee goot sennen, waut däm Harn nich lieden kjennen? Doawäajen kjemt däm Harn sien Oaja äwa die! 3Waut goodet es oba doch aun die jefungen worden. Du hast de Ascherabilda ut daut Launt rutjeschauft un die bemieecht, Gott sienen Wellen to doonen. #2Chr 17,3.6

Joschafat deit de Rajchtsordnungen fresch ordnen

4Von doa aun bleef Joschafat en Jerusalem un jinkj nich noch emol no Samaria. Un hee reisd wada mank sien Volkj rom, von Beerscheba bat opp de Efraim Boaj un brocht dee wada trigj nom Harn, äare Vodasch äaren Gott. 5Hee stald Rechta aun en de fauste Städa von Juda, en jieda Staut, 6un säd to de Rechta: Bedenkjt daut, waut jie doonen! Jie hoolen nich em Oppdrach von Menschen Jerecht, jie doonen daut en däm Harn sienen Oppdrach, un hee es met junt, wan jie eenen Rajchtspruch utspräakjen. #5Mo 1,17 7Doawäajen lot Gottesforcht bie junt sennen, un doot junen Deenst jewessenhauft! Bie däm Harn, onsen Gott, es kjeen orrajcht, doa woat nich een Unjascheet von Persoonen jemoakt uk nich bekjeepen jeloten. #2Mo 18,21; 5Mo 10,17; Reema 2,11 8Uk en Jerusalem stald Joschafat eenje von de Leviten un Priesta un uk de Leida von de Volkjsgruppen en Israel aus Rechta aun, dee en däm Harn sienen Nomen äwa de Strietfroagen von de Enwona en Jerusalem rajcht spräakjen sullen. #5Mo 17,8-9; 19,17 9Joschafat säd to de Rechta: Doot junen Deenst em Jehuarsom däm Harn jäajenäwa, met Opprechtichkjeit un een onjedeeldet Hoat! 10Wan june Breeda, de Rechta en aundre Städa, junt äare Froagen väalajen, äwa Falen von Mort un aundre Doodesfalen, ooda aundre Veschuldjungen jäajen Jesazen, Väaschreften, Aunordnungen un Räajlen, dan sell jie dee belieren un woarnen, daut see sikj nich ver däm Harn veschuldjen un sien Oaja äwa junt un june Breeda kjemt. Soo sell jie daut moaken, om daut jie nich schuldich woaren. 11Horcht, en aule Aunjeläajenheiten, waut däm Harn sien Jesaz aunjeit, haft de Huagapriesta Amarja de latste Veauntwuatunk, un Sebadja, Jischmael sien Sän, de Staumleida von Juda, haft daut latste Wuat fa aule Aunordnungen vom Kjennich. De Leviten sellen junt aus Vewaultasch deenen. Nu got entschloten aun june Oppgowen! Un de Har woat met dee sennen, waut daut rajchte doonen.

Currently Selected:

2. Chronik 19: PB

Highlight

Compare

Copy