2. Chronik 18
18
Joschafat sien Bunt met Ahab von Israel
(1Kjen 22,1-12)
1Joschafat wort sea rikj un haud huaget aunseenen. Un hee befried sienen Sän met eene Dochta ut daut Kjennichshus Ahab. #2Chr 17,5 2Un no atelje Joaren besocht hee Ahab en Samaria. Un Ahab leet fa am un fa daut Volkj, waut bie am wia, väl Schop un Rinda schlachten. Un hee beräd am, met am toop de Staut Ramot en Gilead auntojriepen. 3Ahab, de Kjennich von Israel, fruach Joschafat, däm Kjennich von Juda: West du met mie jäajen Ramot en Gilead gonen? Joschafat säd to am: Ekj moak met, un met miene Truppen kaust du räakjnen soo aus met diene; wie wellen met die toop en dän Kaumf gonen.
4Oba Joschafat säd to däm Kjennich von Israel: Froag doch ieescht däm Harn, waut hee doatoo sajcht! #2Kjen 3,11 5Dan vesaumeld de Kjennich von Israel de Profeeten, 400 Mana, un säd to an: Sell wie de Staut Ramot en Gilead aunjriepen gonen ooda nich? See säden: Go han! De Har woat dee en diene Macht jäwen. 6Joschafat oba fruach: Es hia nich noch irjentwua eena von däm Harn siene Profeeten, daut wie derch am dän Harn befroagen kjennen? 7De Kjennich von Israel säd to Joschafat: Hia es noch een Maun, wuaderch eena däm Harn befroagen kaun; oba ekj kaun däm nich lieden, wiels hee mie niemols goodet, un bloos emma Ojjlekj aunsajen deit. Daut es Micha, Jimla sien Sän. Joschafat oba säd: Soo sull de Kjennich nich räden!
8Dan roopt de Kjennich von Israel eenen Hoffbeaumten un säd: Brinj soo schwind aus mäajlich Micha, Jimla sienen Sän, hiahan! 9De Kjennich von Israel un Joschafat, de Kjennich von Juda, sauten jieda opp sienen Troon, aunjetrocken met äare kjennichliche Kjleeda. See sauten opp dän frieen Plauz ver daut Stautspuat von Samaria, un aule Profeeten fungen aun, ver an tookjinftje Sachen to profezeien. 10Un Zidkija, Kenaana sien Sän, haud sikj eenen Kjrichshoot met iesane Hieena oppjesat un säd: Soo sajcht de Har: Met dit woascht du de Aramäa dolsteeten, bat du dee venicht hast. #2Chr 18,23 11De aundre Profeeten stemden däm bie un säden: Go bloos jäajen Ramot en Gilead! Daut woat die jlekjen, de Har woat de Staut en däm Kjennich siene Macht jäwen!
Een onbeleewda Profeet
(1Kjen 22,13-28)
12De Maun, waut jeschekjt wia Micha to holen, säd to am: De Profeeten haben däm Kjennich eenstemmich Siech verhäa jesajcht. Nu lot doch uk diene Wieed soo sennen aus äare Wieed sent un räd goodet! 13Micha oba säd: Soo secha aus de Har läft: Waut Gott mie sajen woat, daut well ekj räden.
14Aus Micha ver däm Kjennich kjeem, säd de Kjennich to am: Micha, sell wie no Ramot en Gilead toom Kaumf gonen, ooda saul ekj doavon loten? Hee säd: Jo, got han! Daut woat junt jlekjen, see woaren en june Henj jejäft woaren. 15De Kjennich oba säd to am: Woo foaken saul ekj die beschwieren, daut du en däm Harn sienen Nomen nuscht to mie sajchst aus de reine Woarheit! 16Dan auntwuad Micha: Ekj sach gaunz Israel vestreit oppe Boaj soo aus Schop, waut kjeenen Hoad haben. Un de Har säd: Dise haben kjeenen Harn mea. See sellen en Fräd trigjgonen, jieda eena no sien Hus! #Mat 9,36 17De Kjennich von Israel dreid sikj no Joschafat un säd: Säd ekj die nich, hee sajcht äwa mie bloos Ojjlekj, oba nuscht goodet verut? 18Micha oba säd: Nu horcht no däm Harn sien Wuat! Ekj sach däm Harn opp sienen Troon setten, un daut gaunze himlische Häa aun siene rajchte uk aun siene linkje Sied stonen. #Jes 6,1 19Un de Har säd: Wäa well Ahab, dän Kjennich von Israel, doatoo brinjen, daut hee Ramot en Gilead aunjript un doa toom Faul kjemt? Un aus eena soonen un een aundra eenen aundren Väaschlach hauden, 20kjeem een Jeist äwadäl un stald sikj ver däm Harn un säd: Ekj woa am doatoo velocken. De Har oba säd to am: Met waut? #Hiob 1,6 21Hee säd: Ekj woa aus een lieejenda Jeist ut aul siene Profeeten äa Mul räden. Dan säd de Har: Du woascht am velocken un daut Woakj utfieren; foa han un doo daut! 22Nu kaust seenen, de Har haft eenen lieejenden Jeist en daut Mul von dise diene Profeeten nenjejäft, un de Har haft dienen Unjagank beschloten. 23Dan muak Zidkija, Kenaana sien Sän sikj opp un schluach Micha oppe Bak un säd: Opp woonen Wajch saul däm Harn sien Jeist mie veloten haben, om nu derch die to räden? #2Chr 18,10 24Micha säd: Du woascht daut aun janen Dach seenen, wan du von eene Stow en de aundre ranen woascht, om die to vestäakjen. 25De Kjennich von Israel oba säd: Nämt Micha un brinjt am no Amon, dän Stautskommandaunt, un no Joasch, däm Kjennich sienen Sän, 26un sajcht to an: Soo sajcht de Kjennich: Stopt disen Maun em Jefenkjnis un jäft am sea spoasom Broot un Wota, bat ekj en Fräd trigjkom! #2Chr 16,10 27Micha oba säd: Wan du en Fräd trigjkjemst, dan haft de Har nich derch mie jerät. Un hee säd: Horcht jie Velkja aula, no daut waut ekj saj!
De Profeet haud rajcht
(1Kjen 22,29-35)
28Soo reisden de Kjennich von Israel un Joschafat, de Kjennich von Juda, loos no Ramot en Gilead. 29Un de Kjennich von Israel säd to Joschafat: Ekj well mie vekjleeden om en dän Kaumf to gonen, du oba hool diene kjennichliche Kjleeda aun! Un de Kjennich von Israel vekjleed sikj, un soo jinjen see en dän Kaumf. 30De Kjennich von Aram oba haud siene Befälshaba äwa de Kaumf Woages jesajcht: See sullen nich jäajen de aundre kjamfen eendoont auf daut jerinje ooda aunjeseene wieren, see sullen bloos jäajen däm Kjennich von Israel kjamfen. 31Un aus de Befälshaba äwa de Kaumf Woages Joschafat sagen, dochten see, dit es de Kjennich von Israel, un see omkjrensten am, om jäajen am to kjamfen. Dan schrieech Joschafat om Help. Un de Har holp am, un Gott lenkjt an von am auf. 32Aus de Woagenkjamfa daut moakjten, daut hee nich de Kjennich von Israel wia, dreiden see von am auf. 33Een Maun oba trock sienen Flizboagen opp un schoot eenen Feil soo von ojjefäa auf, un troff dän Kjennich von Israel tweschen de Droagbenja un dän Paunza. Dan säd hee to sienen Fuamaun: Wenj om un fia mie ut däm Kaumf rut, wiels ekj sie vewunt! 34Oba de Kaumf wort emma hoada aun däm Dach, un de Kjennich von Israel must stonent opp sienen Woagen jäajen de Aramäa derchhoolen bat aum Owent; un hee storf, aus de Sonn unjajinkj.
Currently Selected:
2. Chronik 18: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
