2. Chronik 17
17
Kjennich Joschafat siene goode Rejierunk
1Un Asa sien Sän Joschafat wort Kjennich en siene Städ. Un hee wort Israel jäajenäwa stoakj. #1Kjen 15,24 2Hee sad en aule fauste Städa von Juda Soldoten nenn un stald Aumtslied aun en daut Launt Juda, un uk en de Städa en Efraim, waut sien Voda enjenomen haud. 3Un de Har stunt am bie, wiels hee läwd soo aus sien Staumvoda David jeläft haud un socht nich de Baal Jetta. 4Hee socht siene Vodasch äaren Gott un befoljd siene Jebooten un deed daut nich soo, aus Israel daut deed. 5Doawäajen stoakjt de Har siene Kjennichs Macht. Un gaunz Juda brocht Joschafat Jeschenkja, un hee wort sea rikj un kjrieech een grootet aunseenen. #2Chr 18,1 6Wiels hee däm Harn jehorchen deed, wort hee emma mootja, un leet de huage Opfastäden von de framde Jetta un de jeweide Pols, en Juda vestieren.
7En sien dreddet Rejierungsjoa schekjt Joschafat siene hechste Beaumte Ben Hajil, Obadja, Secharja, Netanel un Michaja, daut see en de Städa von Juda lieren sullen. 8Un de Leviten Schemaja, Netanja, Sebadja, Asael, Schemiramot, Jonatan, Adonija, Tobija un Tob Adonija jinjen met an met, un uk de Priestasch Elischama un Joram. 9See worden aula vom Kjennich jeschekjt un jinjen derch aule Städa von Juda. See hauden däm Harn sien Jesazbuak bie sikj un lieeden daut Volkj, soo aus de Kjennich daut aunjeordnet haud.
Joschafat siene Macht
10De Har leet eenen Schrakj komen äwa aule Kjennichrikjs von de Lenda, waut runtom Juda wieren, soo daut sikj kjeena woagd am auntojriepen. 11Soogoa eenje von de Filista brochten Joschafat Jeschenkja un Selwa aus Aufgowen; un uk de Araba brochten am 7.700 Schopsbakj un uk 7.700 Kosenbakj. #1Kjen 5,1
12Soo wort Joschafat siene Macht emma jrata. Hee bud en Juda vesechade Städen un Städa met Korn Spikjasch 13un haud väl Väarot un Soldoten en de Städa von Juda, un sea stoakje un mootje Soldoten, en Jerusalem. 14Un dit wia äare Deenstordnunk no äare Volkjsgruppen no: En Juda wieren de väaschte äwa 1.000: Adna, de väaschta, un unja am 300.000 stoakje Soldoten. 15Johanan, de väaschta, un unja am 280.000. 16Amasja, Sichri sien Sän, dee sikj friewellich em Deenst fa däm Harn stald, un met am wieren 200.000 stoakje Soldoten. 17De väaschta äwa Benjamin wia: Eljada, een Kjrieja met eenen Helden Moot, un unja am 200.000, waut met Schilt un Flizboagen bewaufnet wieren; 18Josabad, wia de väaschta äwa 180.000 Mana, waut goot bewaufnet wieren toom kjamfen. 19Dise stunden däm Kjennich em Kjrich aula to Vefiejunk, buta dee, dee de Kjennich noch en de vesechade Städen en de Städa von gaunz Juda enjesat haud.
Currently Selected:
2. Chronik 17: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
