2. Chronik 16
16
Asa deit met Bascha von Israel kjriejen
(1Kjen 15,17-22)
1Em Asa sien 36. Rejierungsjoa kjeem Bascha, de Kjennich von Israel, jäajen Juda opp un bud de Staut Rama ut, om de Wäaj, waut von Juda nenn un rut jinjen, kontrollieren to kjennen. 2Oba Asa neem von daut Kaptol ut däm Tempel un von daut Kaptol ut daut Kjennichshus Selwa un Golt un schekjt no Ben Hadad, däm Kjennich von Aram, dee en Damaskus rejieed, un leet am sajen: 3Ekj mucht eenen Bunt met die schluten, soo aus dee tweschen onse Vodasch bestonen haft. Horch emol, ekj schekj die Selwa un Golt, om daut du dän Bunt met Bascha, däm Kjennich von Israel, bräakjen un sien Launt aunjriepen deist, daut hee sikj von mie trigjtrakjt. 4Ben Hadad jinkj opp daut en, wua Kjennich Asa am no fruach, un schekjt siene väaschte Befälshaba jäajen de Städa en Israel. See schluagen de Städa Ijon, Dan un Abel Majim un en Naftali aule Städa met Korn Spikjasch. 5Aus Bascha daut hieed, stald hee met Rama utbuen en, un hieed met daut gaunze Woakj opp. 6Oba de Kjennich Asa foddad gaunz Juda opp, un see holden de Steena un daut Holt, waut Bascha fa dän Bu reedjemoakt haud, von Rama wajch. Un Asa leet doamet de Städa Geba un Mizpa utbuen.
De Profeet Hanani
7To dee Tiet kjeem de Profeet Hanani no Asa, däm Kjennich von Juda, un säd to am: Wiels du die opp dän Kjennich von Aram veloten hast un nich opp däm Harn, dienen Gott, doawäajen es däm Kjennich von Aram sien Häa ut diene Macht jekomen. #Jer 17,5 8Hauden de Lied von Kusch un Libien nich eene groote Armee met sea väl Woages un Rittasch? Oba de Har jeef dee en diene Henj, wiels du die opp am veleetst. #2Chr 14,8-12 9De Har helt de gaunze Ieed em Uag, om dee bietostonen, waut am met een onjedeeldet Hoat vetruen. Du hast ditmol sea onweis jehaundelt, doawäajen woascht du von nu aun uk Kjrich haben. 10Doa wort Asa soo wuttich äwa dän Profeet, daut hee däm de Feet en eenen Klotz enschluten leet. Un hee funk don uk aun, eenje vom Volkj to meshaundlen. #2Chr 18,26; Mat 14,3
Daut Enj von Asa siene Rejierunk
(1Kjen 15,23-24)
11De Rejierungs Jeschicht von Asa, es vom Aunfank bat Enj, notoläsen en daut Kjennichsbuak von Juda un Israel. 12Un Asa wort en sien 39. Rejierungsjoa krank aun siene Feet, un uk aus de Krankheit sea bedenkjlich wort, socht hee de Help bloos bie de Doktasch, un socht nich dän Harn. 13En sien 41. Rejierungsjoa storf Asa. 14Un hee wort en daut Grauf begroft, waut hee sikj en de Davidstaut haud uthaken loten. Un see läden am opp sien Loaga, waut see met Balsam un aundret scheenrikjendet Stoff, waut konstvoll reedjemoakt wia, jefelt hauden. Uk een grootet Fia wort am to ieren aunjestekjt. #2Chr 21,19; Jer 34,5
Currently Selected:
2. Chronik 16: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
