2. Chronik 15
15
De Profeet Asarja un Asa muaken sikj nie opp
(1Kjen 15,13-15)
1De Jeist Gottes kjeem opp Asarja, Oded sienen Sän, 2soo daut hee Asa entjäajen jinkj un to am säd: Horcht no mie, Asa un gaunz Juda un Benjamin! De Har es met junt, wan jie met am sent; un wan jie am sieekjen, woat hee sikj von junt finjen loten. Wan jie am oba veloten woaren, dan woat hee junt uk veloten. 3Daut jeef eene lange Tiet, wua de Israeliten onen dän woaren Gott läwden. Doa hauden see uk kjeene Priesta, waut doa unjarechten, un see kjanden Gott sien Jesaz nich mea. #Hos 3,4 4Aus see sikj oba en äare Noot no däm Harn, Israel äaren Gott, dreiden un am sochten, leet hee sikj von an finjen. #Jer 29,13-14 5To dee Tiet jeef daut kjeene Sechaheit fa reisende Menschen; doa wia dan groote Onordnunk un Onsechaheit bie aul dee, dee en dise Lenda wonden. 6De Velkja bedrenjden sikj jäajensiedich, un eene Staut bekjamft de aundre, wiels Gott an met aule Sorten von Enjsten schrakjen deed. #Luk 21,10 7Jie oba, blieft stoakj un lot june Henj nich schlaup woaren, wiels jun Woakj woat beloont woaren! #1Kor 15,58
8Aus Asa dise profeetische Wieed hieed, waut Asarja, Oded sien Sän, utjesproaken haud, jinkj hee entschloten aum Woakj. Hee leet aule oppscheiselje Jettabilda oppriemen, ut gaunz Juda un Benjamin un ut aule Städa, waut hee opp de Boaj en Efraim enjenomen haud. Un däm Harn sienen Aultoa, waut ver däm Väarum vom Tempel stunt, leet hee en Ordnunk brinjen. 9Un dan vesaumeld hee gaunz Juda un Benjamin un aul dee ut de Stam Efraim, Manasse un Simeon, waut bie an wonden. Wiels doa wieren väle von Israel no am äwajegonen, aus see sagen, daut de Har, sien Gott, opp siene Sied stunt. #2Chr 11,16; Jer 41,5 10En de 3. Moonat, en Asa sien 15. Rejierungsjoa, vesaumelden see sikj en Jerusalem. 11See opfaden däm Harn aun däm Dach von daut Kjrichskaptol waut see metjebrocht hauden, 700 Rinda un 7.000 Schop. 12See jinjen dän Bunt en, dän Harn, äare Vodasch äaren Gott, met äa gaunzet Hoat un met aul äare Krauft to jehorchen. #Jos 24,25 13Wäa oba dän Harn, dän Gott en Israel, nich jehorchen wudd, sull stoawen, onen Unjascheet, auf aunjeseene ooda jerinje, auf Maun ooda Fru. 14Dit deeden see däm Harn met lude Stemmen schwieren, met een Freiden Jeschrech un blosen met Trompeeten un Posaunen von Schop Hieena. 15Un gaunz Juda wia froo doaräwa, wiels see hauden met äa gaunzet Hoat ver däm Harn äa Wuat jejäft, un sochten am met äaren gaunzen Wellen, un hee leet sikj von an finjen. Un de Har jeef an runtom aun aule Jrensen Fräd. #2Chr 14,5-6; 20,30
16De Kjennich Asa sad uk siene Mutta Maacha rauf, daut see nich mea Harin wia, wiels see de Jettin Aschera een oppscheiseljet Bilt jemoakt haud. Daut Bilt von de Jettin leet hee omhaken un fien schlonen un em Kidron Tol vebrennen. #(16-18) 1Kjen 15,13-15 17De huage Opfastäden en Israel oba worden nich doljeräten; oba en aul daut aundre jehorcht Asa däm Harn met een onjedeeldet Hoat sien gaunzet Läwen lank. 18Hee brocht daut goldne un selwane Jereetschoft, waut sien Voda däm Harn jeweit haud, en dän Tempel un weid däm Harn noch mea Golt un Selwa Jereetschoft. 19Un bat Asa sien 35. Rejierungsjoa jeef daut kjeenen Kjrich mea.
Currently Selected:
2. Chronik 15: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
