2. Chronik 14
14
Kjennich Asa un sien gooda Erfolch
(1Kjen 15,9-12)
1Asa deed, waut goot un rajcht wia un däm Harn, sienen Gott, jefoll. 2Hee leet jieda Aultoa un jieda huage Opfastäd von de framde Jetta vestieren, de Jedenkjsteena entwei schlonen un de Ascherabilda omhaken 3un foddad daut Volkj von Juda opp, däm Harn, äare Vodasch äaren Gott, to jehorchen un sien Jesaz met aule Jebooten to befoljen. 4Un hee riemd ut aule Städa en Juda de huage Opfastäden un de Ruakopfa Aultoaren von de framde Jetta rut. Un daut Kjennichrikj haud Fräd unja am. 5Un hee bud fauste Städa en Juda, wiels daut Launt Fräd haud un en dise Joaren kjeen Kjrich jäajen am wia, wiels de Har am Fräd veschauft haud. #2Chr 15,15 6Un hee säd to Juda: Lot ons dise Städa utbuen met Mieren un Torms, un Puaten waut stoakj to veräajlen gonen, soolang aus daut Launt noch ons jehieet; wie haben dän Harn, onsen Gott, jesocht, un hee haft ons aun aule Jrensen Fräd jejäft. Un soo buden see, un kunnen de Oabeit uk jlekjlich to Enj brinjen. 7Un Asa haud eene Kjrichsmacht ut däm Staum Juda von 300.000 Mana, waut met groote Schilten un Spiessen bewaufnet wieren, un ut däm Staum Benjamin 280.000, waut met runde Schilten un Flizboages bewaufnet wieren. Dit wieren aules Soldoten, dee eenen Heldenmoot hauden.
Asa sien Siech äwa de Armee von Kusch
8Serach von Kusch, kjeem toom Kjrich jäajen an met eene Armee von 1.000 mol 1.000 Mana un 300 Woages, un see kjeemen bat Marescha. 9Un Asa jinkj am entjäajen; un de beid Armeeen stalden sikj em Zefata Tol bie Marescha toom Kaumf opp. 10Un Asa roopt dän Harn, sienen Gott, aun un säd: Har, wan een schwaka met eenen stoakjen kjamfen mott, kaun am kjeena soo biestonen aus du. Halp ons, Har, ons Gott; wie veloten ons gaunz opp die! En dienen Nomen sent wie jäajen dise Äwamacht jekomen. Har, du best ons Gott, jäajen die kaun kjeen Mensch waut utrechten. #1Sam 14,6
11Un de Har schluach de Armee von Kusch ver Asa un Juda, soo daut see flichten musten. 12Un Asa juach an met daut Volkj toop waut bie am wia, hinjaraun bat Gerar. Doabie follen ut de Armee von de Kusch soo väl, daut see sikj nich mea saumlen kunnen. Wiels see worden venichtent jeschloagen ver däm Harn un sien Häa. Un Juda saumeld sikj väl Kjrichskaptol en. 13See kunnen uk aule Siedlungen runtom Gerar ennämen, wiels de Har eenen grooten Schrakj äwa de Enwona haud komen loten. Un see plindaden aule Städa, wiels doa väl Kaptol bennen wia. 14See äwafollen uk de Zeltloagasch, wua de Veehoads wonden, un neemen sikj eene groote Häad Schop un Kameelen met un kjeemen wada trigj no Jerusalem.
Currently Selected:
2. Chronik 14: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
