2. Chronik 13
13
Kjennich Abija
(1Kjen 15,1-8)
1En däm Kjennich Jerobeam sien 18. Rejierungsjoa, wort Abija Kjennich äwa Juda 2un rejieed dree Joa en Jerusalem. Siene Mutta heet Michaja, un wia Uriel von Gibea siene Dochta. Un uk tweschen Abija un Jerobeam jeef daut Kjrich. 3Abija muak sikj reed toom Kjrich met eene Armee von 400.000 utjeläsde Mana. Jerobeam muak sikj oba jäajen am toom Kaumf reed, met eene Armee von 800.000 utjeläsde stoakje Mana.
4Un Abija stald sikj bowen opp dän Boajch Zemarajim han, dee opp daut Boajlaunt en Efraim licht, un roopt: Horcht mie aun, Jerobeam un aule Israeliten! 5Weet jie nich, daut de Har, Israel äa Gott, daut Kjennichsaumt äwa Israel fa emma David jejäft haft, am un siene Säns derch eenen Soltbunt? #3Mo 2,13; 4Mo 18,19 6Oba Jerobeam, Nebat sien Sän, dee David sienen Sän Salomo sien Kjnajcht wia, wort grootsch un muak sikj von sienen Harn loos. 7Un am schlooten sikj onwirdje beese Menschen aun, un worden stoakja aus Rehabeam, Salomo sien Sän, wiels Rehabeam wia noch junk un onenschloten, daut hee sikj nich jäajen an wäad. 8Nu denkj jie junt to erhäwen jäajen däm Harn sien Kjennichrikj, waut enne Haunt von David siene Säns es, wiels jie eene groote Armee sent un de goldne Kjalwa bie junt haben, waut Jerobeam junt to Jetta jemoakt haft. #1Kjen 12,28 9Hab jie nich däm Harn siene Priesta, Aaron siene Säns, un de Leviten vedräwen un junt june ieejne Priesta enjesat, soo aus de aundre Velkja uk doonen: Wäa doa kjemt un aus Opfagow eenen jungen Boll un säwen Schopsbakj brinjt, woat toom Priesta jeweit fa soone Jetta, waut äwahaupt kjeene sent! #2Mo 28,41; 2Chr 11,15 10Wie oba sent ons secha: De Har es ons Gott; un wie haben am nich veloten; De Priesta, dee däm Harn deenen, sent Aaron siene Säns, un de Leviten stonen en äaren Deenst, 11om dän Harn jieda Morjen un jieda Owent Brauntopfa un Ruakopfa to brinjen. Un wie haben daut jeweide Broot opp dän goldnen Desch ligjen, un jieda Owent woaren de Laumpen opp dän goldnen Laumpenhoola aunjestekjt; wie hoolen ons aun däm Harn, onsen Gott siene Aunordnungen, jie oba haben am veloten. #4Mo 28,3-8 12Denkjt doaraun: Gott selfst steit opp onse Sied un fieet ons! Uk siene Priesta sent hia un stonen reed, om met de Trompeeten daut Tieekjen toom aunjriepen to jäwen. Jie Mana von Israel, got nich en eenen Kjrich jäajen dän Harn, june Vodasch äaren Gott! Wiels daut woat junt nich jlekjen! #4Mo 10,9
13Oba Jerobeam schekjt eene Grupp von hinjen rom, daut see an von hinjen äwafaulen sullen, soo daut see ver Juda uk hinja Juda wieren. 14Aus dee von Juda daut sagen, daut see von väaren uk von hinjen aunjejräpen worden, schrieejen see nom Harn om Help, un de Priesta blosden met de Trompeeten, 15un aule Mana von Juda stemden een Kjrich Jeschrech aun. Un aus see soon Jeschrech muaken, schluach Gott Jerobeam un gaunz Israel ver Abija un Juda trigj. 16Un de Mana von Israel randen fa Juda, un Gott jeef dee en äare Henj. 17Abija un siene Armee bekjamften de Israeliten sea hoat, soo daut von Israel 500.000 stoakje Mana dootjeschloagen ligjen bleewen. 18Dan wort Israel jedeemooticht, oba de Mana von Juda bleewen stoakj, wiels see veleeten sikj opp däm Harn, äare Vodasch äaren Gott. 19Abija vefoljd Jerobeam noch wieda un neem de Städa Betel, Jeschana un Efron met de Siedlungen waut doabie jehieeden toop en, 20soo daut Jerobeam kjeene Macht mea kjrieech, soolang aus Abija läwd. Un de Har schluach am, daut hee storf.
21Abija siene Macht oba wort emma jrata. Hee fried sikj 14 Frues, un dee brochten am 22 Säns un 16 Dajchta to Welt. 22Waut noch mea von Abija to sajen es, sien Waundel un siene Wieed, daut steit jeschräwen en de Berechten von däm Profeet Ido. #2Chr 12,15 23Un aus Abija storf, begrowden see am en de Davidstaut. Un sien Sän Asa wort Kjennich en siene Städ. Unja Asa siene Rejierunk haud daut Launt tieen Joa Fräd.
Currently Selected:
2. Chronik 13: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
