2. Chronik 12
12
Schischak, de Kjennich von Ägipten deit Juda äwafaulen
(1Kjen 14,25-28)
1Aus Rehabeam sien Kjennichrikj ieescht stoakj jeworden un jesechat wia, fruach hee nich mea no däm Harn un sien Jesaz, un daut gaunze Volkj uk nich. 2En daut fefte Rejierungsjoa von Rehabeam kjeem Schischak, de Kjennich von Ägipten jäajen Jerusalem opp, wiels see sikj aun däm Harn vesindicht hauden. 3Schischak kjeem met eene Armee von 1.200 Woages un 60.000 Rittasch; un daut Volkj wia nich to talen, waut met am ut Ägipten kjeem, doa wieren Mana von Libien, von Sukki un von Kusch. 4Un hee neem de fauste Städa en, waut en Juda wieren, un kjeem bat aun Jerusalem. #2Chr 11,5-10
5Dan kjeem de Profeet Schemaja no Rehabeam un no de väaschte von Juda, waut sikj en Jerusalem ut Forcht fa Schischak vesaumelt hauden, un säd to an: Soo sajcht de Har: Jie haben mie veloten; doawäajen hab ekj junt uk veloten un en Schischak siene Macht jejäft. 6Dan deeden de väaschte von Juda un de Kjennich sikj deemootjen un säden: De Har es jerajcht! 7Aus de Har daut sach, daut see sikj deemootjen deeden, kjeem dän Harn sien Wuat no Schemaja: See haben sikj jedeemooticht; doaroms haulwen well ekj an nich vedoawen, ekj woa an boolt raden, daut mien Oaja sikj nich derch Schischak äwa Jerusalem utjeeten deit. 8Oba see sellen am unjadon sennen, daut see enwoaren, waut daut bediet, mie to deenen ooda Kjennichs von aundre Lenda to deenen.
9Soo kjeem Schischak, de Kjennich von Ägipten en Jerusalem nenn, un neem daut Kaptol ut däm Harn sien Hus un daut Kaptol ut daut Kjennichshus; un uk de goldne Schilten, waut Salomo haud moaken loten, neem hee aula wajch. 10Un en dee äare Städ leet de Kjennich Rehabeam bronsne Schilten moaken un äwajeef dee däm väaschten von de Wajchta, dee daut Puat aum Kjennichshus bewoakten. 11Un jiedatsmol, wan de Kjennich en däm Harn sien Hus jinkj, kjeemen de Wajchta un druagen dise Schilten un brochten dee dan wada trigj en de Stow wua dee hanjehieeden. 12Wiels Rehabeam sien orrajcht enjeseenen haud, trock de Har sienen Oaja von am trigj, un vedorf am nich gaunz, wiels en dee Tiet wia noch väl goodet en Juda. #2Chr 32,26
Daut Enj von Rehabeam siene Rejierunk
(1Kjen 14,21-24.29-31)
13De Kjennich Rehabeam jewonn wada aun Macht en Jerusalem un rejieed wieda. Rehabeam wia 41 Joa oolt, aus hee Kjennich wort, un rejieed 17 Joa en Jerusalem en de Staut, waut de Har jewält haud mank aule Städa en Israel, daut hee sienen Nomen doa wonen leet. Rehabeam siene Mutta heet Naama, eene Amonitarin. #2Chr 6,20 14Oba hee deed schlajchte Doten, wiels hee nich no däm Harn sienen Wellen fruach. 15De Jeschicht von Rehabeam, es von Aunfank bat Enj notoläsen en de Berechten von de Profeeten Schemaja un Ido. Doa steit uk von däm Kjrich waut Rehabeam un Jerobeam derch äa gaunzet Läwen hauden, un uk daut Rejista von siene Famielje es doa to finjen. #2Chr 13,22 16Un aus hee storf, wort hee en de Davidstaut begroft. Un sien Sän Abija wort Kjennich en siene Städ.
Currently Selected:
2. Chronik 12: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
