2. Chronik 11
11
Gott sajcht daut auf, de tieen Stam trigj unja Rehabeam siene Jewault to brinjen
(1Kjen 12,21-24)
1Un aus Rehabeam no Jerusalem kjeem, saumeld hee von ut de Stam Juda un Benjamin, 180.000 stoakje Kjrieja, om jäajen Israel to kjriejen, om daut Kjennichrikj aun Rehabeam trigj to brinjen. #(1-4) 1Kjen 12,21-24 2Oba däm Harn sien Wuat kjeem no Schemaja, däm Gottesmaun: 3Saj Rehabeam, Salomo sienen Sän, däm Kjennich von Juda, un aul dee von Israel, waut en Juda un Benjamin wonen: 4Soo sajcht de Har: Jie sellen nich loosgonen jäajen june Breeda to kjriejen. Wenjt om un got trigj no Hus! Wiels daut es von mie soo jefieet! Un see jehorchten däm Harn sien Wuat, wongen om un jinjen nich jäajen Jerobeam.
De ieeschte Tiet von Rehabeam siene Rejierunk
5Rehabeam haud sienen Rejierungs Plauz en Jerusalem. Un en daut Launt von Juda un Benjamin bud hee Städa ut to fauste Schutzplaza. 6Un daut wieren: Betlehem, Etam, Tekoa, 7Bet Zur, Socho, Adullam, 8Gat, Marescha, Sif, 9Adorajim, Lachisch, Aseka, 10Zora, Ajalon un Hebron. Daut wieren de fauste Städa en Juda un Benjamin. 11Rehabeam leet dise Schutzstäda stoakj moaken un sad doa Befälshaba nenn, un uk Väarot aun Äten, Eelj un Wien, 12un uk een Jewäaren Loaga met Schilten un Spiessen, om dise Städa no aule Sieden han sea stoakj to moaken. Un Juda un Benjamin wieren am unjadon.
De Priesta un Leviten schluten sikj Rehabeam aun
13De Priesta un de Leviten, dee äwaraul en Israel wonden, hilden sikj en daut gaunze Launt oba to Rehabeam. 14De Leviten veleeten äa Hab un Goot un äare Weidflekja un trocken no Juda un Jerusalem, wiels Jerobeam un siene Säns an ut däm Priesta Deenst vestaden, daut see dän Priesta Deenst fa däm Harn nich mea verechten kunnen. #2Chr 13,9 15Jerobeam haud siene ieejne Priesta aunjestalt fa de huage Opfastäden em Launt met äare beese Jeista un Jettabilda en Form von Bakj un Bolles, waut hee haud moaken loten. #1Kjen 12,31 16Un dee waut däm Harn, Israel äaren Gott, iernstlich sochten, jinjen ut aule Stam von Israel met de Leviten met no Jerusalem, un brochten äare Opfa däm Harn, äare Vodasch äaren Gott. #1Kjen 12,26-27 17Soo druagen see doatoo bie, daut Kjennichrikj Juda to stoakjen un Rehabeam, Salomo sienen Sän siene Rejierunk stoakj to moaken. Daut wia oba mau fa dree Joa, soo lang aus see en de Wäaj von David un Salomo waundelden.
Rehabeam siene Famielje
18Rehabeam fried sikj Mahalat, de Dochta von Jerimot, David sienen Sän, un äare Mutta wia Abihajil, de Dochta von Eliab, Isai sienen Sän. #1Sam 16,6 19Dee brocht am dise Säns to Welt: Jeusch, Schemarja un Saham. 20No däm fried hee sikj Maacha, Abischalom siene Dochta; von dee worden am Abija, Atai, Sisa un Schelomit jebuaren. 21Oba Rehabeam haud Maacha, de Dochta von Abischalom, leewa aus aul siene Frues un Näbenfrues, wiels hee haud 18 Frues un 60 Näbenfrues un von dee haud hee 28 Säns un 60 Dajchta. 22Un Rehabeam sad Abija, Maacha äa Sän, aus väaschten mank siene Breeda, aus Troonfolja en. Wiels hee plond am toom Kjennich to moaken. 23Rehabeam jinkj oba uk met siene äwaje Säns kluak om: Hee vedeeld dee en aule Jäajenden von Juda un Benjamin, en aule fauste Städa, un veschauft an een goodet Enkomen un väl Frues. #2Chr 21,3
Currently Selected:
2. Chronik 11: PB
Highlight
Share
Compare
Copy
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
