1. Samuel 7
7
Samuel em Rechta Aumt
1Un de Lied von Kirjat Jearim kjeemen un holden sikj däm Harn siene Kjist un brochten dee en Abinadab sien Hus nenn. Dee wond doa opp däm Boajch. Un see säajenden däm sien Sän Eleasar en, daut hee äwa däm Harn siene Kjist sull de Wajchta sennen. #3Mo 8,1-36 2De Kjist bleef lang en Kirjat Jearim, bie 20 Joa. Un aule Israeliten bäden Gott om Help. #1Sam 6,21; 4,22; 1Chr 13,6
3Un Samuel säd to de Israeliten: Wan jie met jun gaunzet Hoat trigj no däm Harn komen wellen, dan riemt opp met de framde Jetta dee jie haben, un sat jun gaunzet vetruen opp däm Harn un deent bloos am. Dan woat hee junt ut de Filista äare Macht raden. #1Mo 35,2; Jos 24,23 4Un dan riemden see äare Baals un Astarten tosied un deenden bloos däm Harn. #Rech 10,16 5Dan säd Samuel to de Israeliten: Komt emol aula toop bie Mizpa un dan woa ekj däm Harn aunbäden fa junt. #Jos 18,26; Rech 20,1; 1Sam 10,17 6Un daut Volkj kjeem no Mizpa. Doa holden see waut Wota opp un gooten daut ut ver däm Harn, un see deeden dän gaunzen Dach fausten. Dan säden see: Wie haben jesindicht ver däm Harn. Un Samuel wia Rechta äwa daut Volkj Israel en Mizpa. #2Sam 23,16
7Aus de Filista hieeden daut sikj daut Volkj bie Mizpa jesaumelt haud, jinjen de Volkjsleida von de Filista met äare Kjrieja jäajen an. Aus de Israeliten daut hieeden, ferchten see sikj, 8un see säden to Samuel: Hia nich opp met däm Harn onsen Gott auntobäden. Bäd daut hee ons von de Filista äare Macht raden woat. #(8 un 9) 1Sam 12,23; 1Mo 20,7; 1Kjen 13,6; Jer 37,3; 7,16 9Dan neem Samuel een Laum, waut noch suen deed, un opfad daut gaunz aus een Brauntopfa fa däm Harn. Un Samuel bäd däm Harn aun fa daut Volkj, un de Har auntwuad am. 10Ea Samuel foadich wia met daut Brauntopf, kjeemen de Filista opp, om Israel auntojriepen. De Har, oba, leet daut dän Dach soo sea vom Himmel rumlen daut de Filista gaunz vewillat worden un trigj randen. #1Mo 35,5; 2Mo 14,24; 23,27; Jos 10,10; Rech 4,15 11Un de Mana von Israel jinjen von Mizpa de Filista hinjaraun un schluagen väle doot, bat aun Bet Kar. 12Dan neem Samuel eenen Steen un stald dän opp tweschen Mizpa un Schen un nand dän: “Eben Eser”. Hee säd: Soo wiet haft de Har ons jeholpen.
13Dit schluach de Filista soo, daut see nich wada bat en Israel nenkjeemen. Däm Harn siene Haunt wia jäajen de Filista, soo lang aus Samuel läwd. 14Aul de Städa, dee de Filista von de Israeliten jenomen hauden tweschen Ekron un Gat, worden trigj no Israel jejäft, soo daut de Israeliten aul äa Launt trigj kjrieejen. Doa wia uk Fräd tweschen de Israeliten un Amorita.
15Samuel wia de Rechta äwa Israel fa sien gaunzet Läwen. #Rech 10,1-5; 12,7-14 16Jieda Joa jinkj hee rom no Betel, Gilgal, un Mizpa, un hilt doa daut Jerecht auf. 17Dan jinkj hee wada trigj no Rama, wua sien Hus wia. Hee rejieed daut Launt von doa. Hee bud doa uk eenen Aultoa fa däm Harn. #Jos 18,25
Currently Selected:
1. Samuel 7: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
