1. Samuel 6
6
De Bundeskjist kjemt trigj
1Fa säwen Moonat wia däm Harn siene Kjist bie de Filista. 2Un de Filista fruagen äare Priesta un de Mana, waut soont utlajen, waut noch emol komen saul: Waut sell wie met däm Harn siene Kjist doonen? Sajcht ons, waut wie sellen met dee met schekjen. 3Un dee säden: Wan jie de Kjist fa de Israeliten äa Gott trigjschekjen, dan schekjt doa onbedinjt waut met fa een Schultopfa. Dan woa jie jeheelt woaren, un jie woaren weeten, wuarom siene Macht es jäajen junt jewast. 4Un de Mana fruagen: Waut fa een Schultopfa sull wie met schekjen? Dee auntwuaden: Schekjt fief Schwäaren von Golt jemoakt un fief Mies von Golt jemoakt. Moakt daut fief, wiels doa fief Volkjsleida von de Filista sent. De Ploag wia en aul june Städa un opp aul june Volkjsleida. #Jos 13,3 5Jie sellen von Golt soone Schwäaren un Mies moaken, aus waut junt un jun Launt jeploacht haben. Jäft Gott de Iea. Veleicht lat hee no met siene Macht äwa junt un june Jetta un jun Launt. 6Wuarom sull wie hoat jäajen am enjestalt sennen, soo aus de Ägipta un äa Kjennich wieren? No däm daut de Israeliten äa Gott aun an jewäsen haud, woo stoakj hee wia, leeten see de Israeliten doch gonen. #2Mo 4,21; 12,31 7Jie sellen eenen nieen Woagen moaken un twee Malkj Kjieej nämen, dee noch nienich en een Joch jewast sent, un dee aunspaunen. Hoolt oba de Kjieej äare Kjalwa tus. 8Stalt de Kjist fa däm Harn opp däm Woagen, un en eene Doos biesied de Kjist lajcht de goldne Schwäaren un Mies nenn fa daut Schultopfa. Dan lot dee gonen, soo aus see wellen. 9Un paust opp auf dee nopp no Bet Schemesch gonen no Israel. Wan dee doonen, dan es daut dee äa Gott, waut ons dit aunjedonen haft. Wan dee eenen aundren Wajch gonen, dan weet wie, daut dit nich von däm Gott kjemt oba es jrod soo jekomen.
10De Mana deeden daut. See neemen twee Malkj Kjieej un spaunden dee ver een Woagen un hilden de Kjalwa tus. 11See saden de Kjist fa däm Harn opp däm Woagen un uk de Doos met de goldne Schwäaren un goldne Mies. 12Un de Kjieej jinjen jlikj delenjd dän Wajch no Bet Schemesch. De Kjieej jinjen un brelden un dreiden nich rajchtsch uk nich linkjsch vom Wajch rauf. De Volkjsleida von de Filista jinjen dee hinjaraun bat aun de Jrens von Bet Schemesch. #Jos 15,10 13Dit wia krakjt aus de Lied von Bet Schemesch äa Weit en daut Tol arnten deeden. Un aus see oppkjikjten un sagen de Kjist aunkomen, freiden see sikj. 14De Woagen kjeem bat en Joschua von Bet Schemesch sien Flekj un doa hilt dee stell. Doa wia een groota Steen. Un de Lied spoolden daut Holt von däm Woagen un muaken een Brauntopfa fa däm Harn met de Kjieej. 15Un de Leviten neemen däm Harn siene Kjist un de Doos, waut doa biesied wia, wua de goldne Dinja bennen wieren, vom Woagen rauf un saden dee opp däm Steen. Un de Mana von Bet Schemesch muaken dän Dach Brauntopfa un aundre Opfa fa däm Harn. 16Aus de fief Volkjsleida äwa de Filista daut sagen, jinjen see dän Dach noch trigj no Ekron.
17De Filista schekjten de goldne Schwäaren, eent fa Aschdod, eent fa Gaza, eent fa Aschkelon, eent fa Gat, un eent fa Ekron, no däm Harn aus een Schultopfa. 18Krakjt soo schekjten see uk eene goldne Mus fa jieda eenen von äare Städa wua see eenen Volkjsleida hauden. Dit wia fa Städa met ooda uk onen eene Mia. De groota Steen opp Joschua von Bet Schemesch siene Stap, wua see däm Harn siene Kjist raufsaden, es vondoag noch een Aundenkjplauz fa waut doa don passieed.
19Un de Har bestroft de Lied en Bet Schemesch, wiels eenje en däm Harn siene Kjist hauden nenjekjikjt. Doa storwen 70 Mana doaderch, un de Lied truaden sea daut de Har soon grooten Schoden mank an jebrocht haud. #4Mo 4,20; 2Sam 6,6-7 20Un de Mana en Bet Schemesch säden: Wäa kaun daut ver däm Harn uthoolen, ver disen heiljen Gott? Oba wua kjenn wie de Kjist bloos hanbrinjen? 21Un see schekjten waut Mana no Kirjat Jearim un säden to an, daut de Filista hauden däm Harn siene Kjist trigjebrocht. Un see sullen sikj dee komen holen. #1Chr 13,6; Psa 132,3-6
Currently Selected:
1. Samuel 6: PB
Highlight
Copy
Compare
Share
Want to have your highlights saved across all your devices? Sign up or sign in
Plautdietsch Bible © 2003 Kindred Productions and United Bible Societies Association, Inc.
