1. Samuel 8

Daut Volkj frajcht no eenen Kjennich

1Aus Samuel oolt wort, stald hee siene Säns aun aus Rechta en Israel. 2Sien ieeschtjebuarna Sän heet Joel, un de tweeda heet Abija. Dee beid wieren Rechta en Beerscheba. #1Chr 6,13; Amos 8,14 3Oba siene Säns haundelden nich soo aus Samuel haud. See wieren hinjaraun no Jelt, un leeten sikj bekjeepen un jeewen nich een opprechtjet Jerecht. #5Mo 16,19 4Dan vesaumelden de Leidasch en Israel sikj en Rama met Samuel #1Sam 7,17 5un säden to am: Horch emol. Du woascht oolt, un diene Säns haundlen nich soo aus du deetst. Wie wellen haben daut du eenen Kjennich fa äwa ons bestemmen woascht, daut wie eenen Kjennich haben soo aus de aundre Lenda daut haben. #5Mo 17,14-20; Hos 13,10; Apost 13,21 6Oba Samuel jefoll daut nich aus see säden daut see wullen eenen Kjennich äwa sikj haben toom an rejieren. Un Samuel bäd däm Harn doawäajen aun, 7un de Har säd to Samuel: Horch no aules waut daut Volkj to die sajcht. See haben nich die veschmäten, see haben mie aus äa Kjennich veschmäten. #2Mo 15,18; 4Mo 23,21; 5Mo 33,5; Psa 24,7-10; 74,12; Jes 6,5 8Von däm Dach aun aus ekj an ut Ägipten rutbrocht, haben see mie veschmäten un aundre Jetta aunjebät. Un nu doonen see to die, waut see aul lang to mie jedonen haben. 9Nu horch no an, oba lot an krakjt weeten, waut fa een rajcht de Kjennich äwa an haben woat.

10Un soo jinkj Samuel no de Lied, waut no eenen Kjennich jefroacht hauden, un säd an aules waut de Har am jesajcht haud. 11Hee säd: Wan jie woaren eenen Kjennich haben toom äwa junt rejieren, dan woat dee june Säns nämen, daut dee opp siene Kjrichswoages foaren, un opp siene Pieed rieden, un daut dee ver sien Woagen woaren ranen motten. 12Un hee woat sikj Kommandaunten äwa 1.000 un äwa 50 saten, un aundre daut see siene Flekja oabeiden un arnten sellen. Hee woat Oabeida aunstalen toom Jereetschoft fa dän Kjrich moaken un Jereetschoft fa siene Woages. 13Hee woat june Dajchta nämen daut see fa am Parfummoaka un Kjäakjsches un Bakja sent. 14Hee woat von daut baste von june Flekja un Wiengoades un Oliewengoades nämen un siene Deena daut jäwen. 15Hee woat een Tieendel von jun Jeträajd un von june Wiengoades nämen un siene aunjestalde un Rejierungs Mana daut jäwen. 16Hee woat von june Deena nämen un von daut baste von mank jun Vee un june Äsels. Un hee woat dee fa sikj aunstalen. 17Hee woat een Tieendel von june Schop un Kosen nämen, un jie woaren siene Sklowen sennen. 18Dan, aun dän Dach, woa jie wäajen junen Kjennich grunsen, dän jie junt jewält haben, oba de Har woat junt aun dän Dach kjeene Auntwuat jäwen.

19Daut Volkj, oba, horcht nich no waut Samuel to sajen haud. See säden: Nä, wie wellen eenen Kjennich haben äwa ons, 20daut wie uk soo sent aus aundre Lenda. Soo daut wie uk eenen Kjennich haben om ons to rejieren, un om ver ons rut to gonen, wan wie en däm Kjrich nengonen.

21Un aus Samuel aules jehieet haud, waut daut Volkj to sajen haud, säd hee däm Harn daut. 22Un de Har säd to Samuel: Horch no waut dee sajen un sat eenen Kjennich äwa an. Un Samuel säd to de Israeliten: Got een jiedra no jun Hus.

Currently Selected:

1. Samuel 8: PB

Highlight

Copy